2 Petrus 3 - Porjanjian Boharu Torjomahan Baso Dilakng Soari-ari

Urakng pocayo gola' sotia mombulah koboi'an obai Yesus pasti paca'an bobali'

¹ Boko somadikan inyo ku kasihi, ni'in udah surat inyo koduo, inyo ku tulis ko kaitn. Di dalapm koduo surat nantai, aku bousaha monyadaran kaitn pakai' bopikir agatn caro inyo bondar.

² Aku honda' oca' kaitn moingant pomandiran inyo komai udah dipandiran doi' boko nabi Allah, huatan jam oca' kaitn moingant apo inyo boko rasul udah sampaian ko kaitn, ia'an boko porintah doi' Yesus Kristus, Ponyolamant huatan Tuhatn pucu' kito.

³ Inyo palikng utamo gola' kaitn kotohu'i ia'an: Pado ahir joman, paca'an ado boko urakng inyo gala' mohayam kaitn. Sia' nantai dikuaso'i hawa napsu inyo jahat.

⁴ Sia' tajahan bopandir, “Yesus udah bojanji Sio paca'an bobali' datakng agi'. Apo pomandiran-Nyo nantai kinyo bondar obai sampai watu ni'in Sio bolupm datakng. Tangga'i boko bopai kito mati, somuonyo totap samo aja'. Conyiant inyo borubah tangga'i dunia ni'in dipulah.”

⁵ Agatn songajo, sia' kinyo honda' tohu boko hal ni'in: ia'an obai komai Allah mombulah langit huatan bumi agatn Pomandiran-Nyo aja'. Sio mombulah bumi doi' ara'i huatan agatn ara'i.

⁶ Sama'an nian jam, Allah molonyapan bumi watu joman nantai agatn ara'i molalu'i pasakng bosar.

⁷ Apo, Allah mongombolo langit ongko bumi inyo ado watu ni'in agatn Pomandiran-Nyo jam. Sio mongombolo somuonyo nantai sampai watu Sio mohukupmnyo agatn api, ongko mombonasoan boko urakng inyo kinyo taat ko Sio.

⁸ Apo, pakai' kaitn, boko somadikanku inyo ku kasihi, jangan sampai kaitn tongkolupatn sobuti' hal ni'in: Tuhatn co mohitukng watu samo sama'an monsio. Pakai' Tuhatn, soari samo sama'an soribu tohutn. Soribu tohutn samo sama'an soari.

⁹ Ado boko urakng inyo bopikir Tuhatn moulur-ulur monopat'i janji-Nyo. Apo sobondarnyo Sio kinyo moulur-ulur. Sio sabar agatn kaitn. Obai, Sio kinyo honda' ado urakng inyo bonaso. Sio honda' oca' somuo urakng moninggalan dosa sia' ongko hidup monyonangan Sio.

¹⁰ Tuhatn pasti datakng huatan kodatakan-Nyo nantai samo sama'an pongolit. Kinyo ado urakng inyo tohu arinyo. Pado ari nantai paca'an ado bunyi inyo hebat huatan co paca'an ado langit agi'. Somuo hal inyo ado di langit paca'an lobur tocucul. Bumi huatan somuo hal inyo ado di dalapmnyo paca'an hilakng lonyap jam.

¹¹ Jadi, obai somuo hal tajahan hancur sama'an nantai, soharusnyo kaitn hidup agatn caro inyo mono? Kaitn gola' kinyo bodosa ongko hidup sama'an Allah kohonda'i.

¹² Kaitn gola' hidup sama'an nantai kapikng kaitn monanti arinyo Allah paca'an datakng. Agatn sama'an nian, kaitn mombulah ari nantai copat datakng. Pado ari nantai, langit paca'an lobur dicucul api. Somuo hal inyo ado di langit paca'an lobur obai hangantnyo api nantai.

¹³ Apo Allah udah bojanji pakai' mombulah langit boharu huatan bumi boharu. Kito monanti pakai' tompat nantai. Bayo boko urakng inyo hidup bondar ado di santai.

¹⁴ Obai nantai, boko somadikanku inyo ku kasihi, kapikng kaitn monanti pakai' somuo hal nantai tojadi, kaitn gola' bousaha oca' kaitn ado hubukan boi' agatn Allah. Kaitn gola' hidup agatn caro nantai oca' Sio moniant kaitn kinyo bodosa apo hidup suci di hadapan-Nyo.

¹⁵ Kaitn gola' sadar obai alasan Tuhatn kito sabar ia'an obai Sio moonji'i urakng kosompatan pakai' disolamant'an. Somadikan kito inyo ku kasihi, Paulus, pan udah monulis surat ko kaitn mongona'i nantai. Io monulis nantai agatn hikmat inyo Allah onju' ko inyo.

¹⁶ Dalapm somuo suratnyo, Paulus monulis mongona'i hal nantai. Memang dalapm boko suratnyo nantai ado boko hal inyo uyuh dimongoroti sampai ado boko urakng momutarbali'an hal nantai sosuai agatn pikiran sia' siku'. Apo sia' ia'an urakng inyo kinyo mongoroti huatan kinyo kuat pocayo. Sia' molabuhan hal nantai agatn boko hal inyo ditulis hulutn Allah inyo bukainyo jam. Obai nantai, sia' sikuꞌ moakibat'an kobinasoan sia' mo.

Boko Potunju' toahir

¹⁷ Apo kaitn, boko somadikan inyo ku kasihi, kaitn udah mongotohu'i mongona'i hal nantai. Jadi, bojojagocam tohadap boko urakng nantai inyo kinyo honda' hidup sosuai agatn porintah Allah. Jangan sampai sia' mombulah kaitn pocayo ajaran inyo salah sampai kaitn kinyo agi' pocayo kuat ko Yesus Kristus.

¹⁸ Apo, kaitn gola' botumbuh somongkitn mongonal Yesus Kristus, Ponyolamant huatan Tuhatn inyo bokuaso dipucu' kito. Kironyo kaitn somongkitn sadar mongona'i koboi'an-Nyo. Topujicam Sio, watu ni'in sampai somanah-manahnyo. Amin!