2 Petrus 2 - Porjanjian Boharu Torjomahan Baso Dilakng Soari-ari

Boboi'cam tohadap boko guru palsu

¹ Apo, pado joman komai ado boko nabi palsu jam di antaro boko urakng inyo pocayo ko Allah. Samo sama'an nantai, di antaro kaitn paca'an ado boko guru palsu. Sia' paca'an monipu urakng agatn boko ajaran salah inyo mombonasoan urakng. Malah sia' paca'an monyangkal Tuhatn Yesus inyo bokuaso atas sia', padohal Sio inyo udah monobus oca' sia' dapat dibebasan doi' hukupan dosa sia'. Obai porbuatan sia' siku' nantai, jadi sia' paca'an copat bonaso.

² Banya' urakng paca'an monumpakng caro hidup sia' inyo dikuaso'i hawa napsu inyo jahat. Obai sia' molabuhan nantai, jadi urakng bukai paca'an mohayam Jalatn Kristus Inyo Bondar.

³ Obai boko guru palsu nantai tama', jadi sia' paca'an bousaha moncari' untukng doi' kaitn agatn boko kisah inyo dipulah-pulah sia'. Apo, Allah udah manaham siap mohukupm sia'. Kinyo manah agi' sia' tajahan bonaso.

⁴ Ingantcam! Pas watu ado boko molekat inyo mombulah dosa, Allah kinyo mombebasan sia' doi' hukupan. Sio monikapan sia' ko dalapm noraka. Sia' dirantai di santai dalapm potakng sampai ari Ponghakipan nononyo.

⁵ Huatan jam, pado joman Nuh komai, ado boko urakng inyo molawatn Allah. Allah totap mohukupm sia'. Sio mombulah pasakng bosar sampai somuo sia' mati lomas. Sio ongkah monyolamant'an Nuh huatan tujuh urakng bukai, obai Nuh momboritoan mongona'i caro hidup inyo bondar di hadapan Allah.

⁶ Allah jam mohukupm kota Sodom huatan Gomora. Sio momusnahan boko kota nantai agatn api sampai monjadi habu. Agatn sama'an nian, Allah moonji'i poringant'an ko boko urakng inyo molawatn-Nyo di joman nononyo.

⁷ Apo, pado watu nantai, Allah monyolamant'an Lot doi' hukupan nantai. Lot ia'an urakng inyo hidup bondar di hadapan Allah. Lot hala mondorita'dalapm hatinyo obai io moniant caro hidup boko urakng di boko kota nantai. Sia' kinyo honda' hidup sosuai agatn porintah Allah. Sia' ongkah moikuti hawa napsu inyo jahat.

⁸ Lot, inyo hidup bondar nantai, bodiapm di tongah-tongah sia'. Sotiap ari io moniant huatan mondinga' boko porbuatan sia' inyo jahat nantai. Jadi, hatinyo oso tosiksa.

⁹ Obai Tuhatn udah molabuhan somuonyo nantai, jadi udah jolas Sio tohu caronyo monyolamant'an boko urakng bondar doi' ajab sonsaro di antaro boko urakng jahat. Tuhatn jam tohu caronyo mohukupm boko urakng jahat sampai hukupan toahir timpu ari Ponghakipan nononyo,

¹⁰ hususnyo boko urakng inyo moikuti hawa napsu inyo mombulah diri sia' kotor, huatan boko urakng inyo co mohormati kuaso Allah atas sia'. Boko guru palsu nantai kotakng borani huatan buhau sampai sia' kinyo gola' mohanyam boko mahluk inyo bokuaso.

¹¹ Boko molekat inyo jouh lobih kuat huatan bokuaso doi' boko guru palsu nantai pan, co monunju' boko mahluk mulia nantai agatn pomandiran inyo mohayam di hadapan Allah.

¹² Apo boko guru palsu nantai mohayam boko hal inyo kinyo sia' kotohu'i. Sia' samo sama'an bonatakng liar inyo kinyo boakal, inyo lahir ongkah pakai' ditangkap huatan dibunuh aja'. Porbuatan jahat sia' paca'an mombulah sia' bonaso samo sama'an bonatakng liar nantai jam.

¹³ Obai sia' mombulah urakng bukai mondorita', jadi sia' paca'an mondorita' jam. Nantaiam upah inyo sia' dapat. Watu siakng ari pan, sia' sonang bopesta pora. Timpu sia' dudu' makatn borindakan agatn kaitn, sia' tama' momuasan hawa napsu sia'. Agatn sama'an nian, sia' morusa' damo kaitn.

¹⁴ Sia' kinyo kalo suah bulah dosa. Mato sia' hala moncari' boko botina' inyo gala' bomporajoan. Sia' mompongaruhi boko urakng inyo bolupm pocayo agatn kuat. Hati sia' udah tolatih monjadi tama'. Jadi, Allah pasti mohukupm sia'!

¹⁵ Sia' udah moninggalan caro hidup inyo bondar. Sia' tuyut caro hidup inyo salah. Sia' tuyut caro hidup Bileam, ana' Beor. Timpu joman komai, nabi Bileam nantai opat monorima' upah doi' porbuatan inyo jahat.

¹⁶ Apo, Allah monogur io obai io honda' bulah kojahatan nantai. Allah mombulah koledainyo lansukng bopandir agatn saro monsio. Agatn caro nantai, nabi Bileam ditongga'an oca' kinyo molabuhan porbuatannyo inyo gogilo nantai.

¹⁷ Boko guru palsu nantai ia'an samo sama'an mato ara'i inyo rangkai, samo sama'an agatn kabut inyo ditiup ulih angin bonakau. Allah udah monyodia'an tompat pakai' sia' inyo kotakan potakng.

¹⁸ Obai, sia' mongajar agatn pomandiran solah-olah sia' kotakan pintar, apo sobondarnyo pomandiran sia' conyiant gunonyo. Agatn caro nantai, sia' mompongaruhi boko urakng pakai' moikuti hawa napsu inyo jahat, ia'an boko urakng inyo hoyu' pan koluar doi' kobiasa'an boko urakng inyo hidup agatn caro inyo salah.

¹⁹ Boko guru palsu nantai bojanji obai urakng inyo tuyut ajaran sia' paca'an hidup bebas. Apo sia' siku' samo sama'an hulutn obai dosa udah mongalahan sia'. Sama'an inyo dipandiran: urakng monjadi hulutn ko sopo aja' inyo mongalahannyo.

²⁰ Doi' komai, sia' hidup di babah kuaso dosa. Apo, lopas nantai sia' ulih mongonal Yesus Kristus, Ponyolamant huatan Tuhatn inyo bokuaso pucu' kito. Obai nantai, sia' ulih tolopas doi' kuaso dosa nantai. Apo, watu ni'in sia' udah bobali' tokobat hidup sama'an nantai. Jadi, koadaan sia' watu ni'in lobih buru' doi' sobolupmnyo.

²¹ Sia' kalo mongonal caro hidup inyo bondar inyo disampaian ko sia'. Apo, watu ni'in sia' monula' boko porintah doi' Allah nantai. Lobih boi' pakai' sia' aman sia' kinyo kalo ulih mongonal nantai.

²² Porbuatan sia' nantai monunju'an obai poumpamoan ni'in bondar: “Kudu' paca'an makatn agi' apo inyo udah dimutahannyo.” Huatan “Babi inyo udah dimandi'i paca'an bobali' agi' mongudakng di dalapm luta'.”