2 Petrus 1 - Porjanjian Boharu Torjomahan Baso Dilakng Soari-ari

Salapm doi' Petrus

¹ Surat ni'in doi' ku, Simon Petrus, urakng inyo molayati Yesus Kristus. Aku pan diutus sobagai rasul-Nyo. Surat ni'in ko boko urakng inyo pocayo ko Yesus Kristus samo sama'an koi. Sio udah moonji'i kito kosompatan nantai obai Sio hala molabuhan inyo bondar. Sio nam Allah ongko Ponyolamant kito.

² Aku bodoa oca' Allah monunju'an koboi'an ongko moonji'i sonang-asau ko kaitn agatn bolimpah-limpah, obai kaitn mongonal Sio ongko Yesus, Tuhatn inyo bokuaso ko kito.

Caro hidup pakai' urakng inyo pocayo

³ Ninam caronyo Sio moningkau kito: Sio monunju'annyo ko kito obai Sio bokuaso huatan luar biaso boi' oca' kito dapat mongonal Sio. Obai nantai, Sio udah momakai kuaso-Nyo sobagai Allah pakai' dionju' ko kito boko sosuatu inyo dipontikan pakai' hidup inyo monyonangan Sio.

⁴ Agatn caro nantai, Sio udah moonji'i kito boko janji inyo kotakan borogo ongko kotakan pontikng. Sio moonju' boko janji nantai oca' kaitn dapat sipat inyo samo sama'an Allah ongko oca' kaitn dapat disolamant'an doi' boko kohonda' di dunia ni'in, boko kohonda' jahat inyo bulah urakng bonaso.

⁵ Nanam alasan kaitn gola' bobondar bousaha pakai' pocayo ko Yesus agatn kuat. Lopas nantai, kaitn pan gola' bousaha bulah koboi'an. Lopas nantai mongotohu'i ajaran inyo bondar.

⁶ Lopas nian, kaitn gola' bousaha kondalian diri. Lopas nantai, kaitn totap kuat dalapm mohadapi pondorita'an. Lopas nian, kaitn hidup monyonangan Allah.

⁷ Lopas nantai pan, kaitn gola' mongasihi boko somadikan kaitn bukai inyo pocayo. Kotakan toahir, kaitn gola' mongasihi somuo urakng.

⁸ Aman kaitn mongkitn hala molabuhan somuo nantai, jadi kaitn kinyo sia-sia mongonal Kristus, ia'an Yesus, Tuhatn kito.

⁹ Apo, urakng inyo kinyo molabuhan nantai, io samo sama'an urakng buto, damo urakng inyo bayo ulih moniant boko hal inyo di pohadapannyo mo. Io culih moniant boko hal doi' Allah, io tongkolupatn obai boko dosanyo komainyo inyo udah diamputi.

¹⁰ Obai nantaiam, boko somadikanku, bousahacam lobih kuat agi' molabuhan somuo nantai. Agatn ubo nian, kaitn lobih yakitn obai Allah udah momilih huatan moningkau kaitn pakai' monjadi umant-Nyo. Obai, aman kaitn molabuhan nantai, kaitn co paca'an jatu' ko dalapm dosa.

¹¹ Kaitn tajahan dionji'i hak ponuh pakai' mansu' ko dalapm Koraja'an Yesus Kristus, ia'an Ponyolamant ongko Tuhatn kito. Korajaan-Nyo tajahan botahatn somanah-manahnyo.

¹² Memang kaitn udah mongotohu'i somuo ni'inan. Kaitn udah kuat pocayo agatn ajaran bondar inyo udah disampaian ko kaitn. Apo, kohonda' ku pakai' hala moingant'an kaitn mongona'i somuonyo nantai.

¹³ Aku mooso nantai tugasku pakai' moingant'an kaitn mongona'i boko hal nantai somanahan ku ija' hidup di dunia ni'in.

¹⁴ Tuhatn kito, Yesus Kristus udah momadahannyo ko aku obai co manah agi' aku tajahan mati.

¹⁵ Jadi, aku bousaha agatn koras watu ni'in oca' kaitn tajahan hala moingant somuonyo nantai biar pan aku udah mati.

Petrus ongko boko rasul inyo bukai ulih dipocayo'i obai sia' momboritoan inyo bondar doi' Allah

¹⁶ Koi udah momadahannyo ko kaitn mongona'i kuaso Yesus Kristus, Tuhatn kito ongko mongona'i kodatakan-Nyo ko dunia ni'in. Nantai bukainyo kisah inyo dipulah-pulah boko monsio. Koi moniant agatn mato koi siku' obai Sio mulia.

^17-18 Koi ado bosamo agatn Sio di pucu' bukit inyo suci. Watu Allah Bopai-Nyo mohormati ongko momuliaan Sio. Allah inyo kotakan Bokuaso mongatoan, “Ninam Ana'-Ku inyo Ku kasihi. Io monyonangan hati-Ku.” Koi siku' mondinga' saro Allah doi' sorugo nantai.

¹⁹ Obai nantai, koi monjadi lobih yakitn agi' obai pomandiran boko nabi mongona'i Kristus bondar. Soboi'nyo kaitn pan gola' mondinga'an pomandiran boko nabi. Pomandiran nantai paca'an mombimbikng kaitn ko jalatn inyo bondar samo sama'an cohayo pompolitoan di tompat inyo potakng, sampai matoari moncara' ongko bintakng timur, ia'an Kristus, bosinar dalapm hati kaitn.

²⁰ Inyo kotakan pontikng kaitn gola' kotohu'i nianam: Roti doi' pomandiran boko nabi dalapm Buku Suci culih dirotian sokohonda' hati siku'.

²¹ Obai, boko nabi co kalo monyampaian pomandiran obai kohonda' sia'. Sia' monyampaian Pomandiran Allah obai Roh Allah ado di dalapm diri sia'.