2 Korintus 8 - Porjanjian Boharu Torjomahan Baso Dilakng Soari-ari

Paulus mominto urakng Korintus oca' moonji'i sumbakan pakai' monulukng boko jomaat di Yerusalem

¹ Boko somadikan, koi honda' momadahan ko kaitn mongona'i caro Allah monunju'an koboi'an-Nyo ko boko jomaat di propinsi Makedonia ni'in.

² Sia' diuji agatn bomacapm pondorita'an. Apo Allah mombulah hati sia' kotakan sonang. Sia' kotakan jaro, apo Allah mombulah hati sia' kotakan sonang moonji'i sumbakan pakai' monulukng urakng bukai.

³ Aku siku' bosasi obai sia' moonji'i sosuai agatn pongulihan sia', malahan lobih agi' doi' nantai.

⁴ Doi' hati sia' siku' sia' muhun bondar, ko koi aman sia' suba'mo monulukng moonji'i sumbakan ko boko umant Allah di Yerusalem.

⁵ Sia' moonji'i lobih banya' doi' inyo koi sangko. Mulonyo sia' monyonangan Tuhatn. Lopas nian, sia' monyonangan koi. Obai, caro nantai sosuai agatn kohonda' Allah.

⁶ Obai sia' molabuhan nantai, lalu koi minto oca' Titus monjongu' kaitn oca' jadiam mongumpulan sumbakan nantai doi' kaitn. Memang komai io inyo momula'i polayatan inyo boi' nantai.

⁷ Nah, kaitn molabuhan boko la'apo pan agatn boi' bondar. Ia'an nantai, kaitn kotakan kuat pocayo ko Yesus. Kaitn mongajar agatn caro inyo boi'. Kaitn mongotohu'i banya' boko hal. Kaitn kotakan bosomangant. Kaitn kotakan mongasihi koi. Samo sama'an kaitn molabuhan boko la'apo pan agatn boi' bondar, soharusnyo kaitn moonji'i sumbakan ni'in agatn boi' jam.

⁸ Aku momadahan nantai bukainyo sobagai porintah. Aku momadahan mongona'i bantu'an doi' boko urakng di Makedonia sobagai contoh pakai' kaitn. Agatn ubo nian aku honda' mouji aman kaitn bondar-bondar mongasihi boko somadikan kaitn inyo bukai.

⁹ Kaitn pan mongotohu'i obai Tuhatn kito, Yesus Kristus, monunju'an koboi'an-Nyo ko kaitn. Ia'an nantai, Sio moninggalan kodampuan-Nyo di sorugo lalu monjadi jaro. Sio monjadi jaro oca' kaitn ulih monjadi dampu agatn banya' borokat doi' Allah.

¹⁰ Jadi, ninam pondapatku mongona'i hal nantai. Ni'in paca'an boguno pakai' kaitn: Tohutn komai, kaitn udah mula'i moonji'i sumbakan nantai. Ongko kaitn bondar-bondar ado kohonda' pakai' molabuhan nantai!

¹¹ Jadi, watu ni'in, lajuancam nantai! Komai kaitn bosomangant honda' moonji'i. Sosuai agatn nantai, honda'nyo kaitn bosomangant jam molabuhannyo. Onju'cam doi' lapo inyo ado dikaitn.

¹² Aman ado kohonda' pakai' moonji'i, jadi Allah monorima' poonju' nantai. Allah honda' monorima' poonju' inyo sosuai agatn komampuan urakng. Urakng kinyo gola' moonji'i lobih doi' komampuannyo.

¹³ Aku co bomasud momoso kaitn moonji'i sumbakan pakai' monulukng urakng bukai sampai hidup kaitn monjadi jorih. Apo, aku bomasud oca' somuonyo soimbakng.

¹⁴ Watu ni'in, kaitn ado kolobihan. Jadi, soharusnyo kaitn monulukng sia' inyo ado kokurakan. Ubo nian jam, nononyo aman sia' ado kolobihan huatan kaitn ado kokurakan, jadi sia' ulih monulukng kaitn agatn ubo nantai, somuonyo soimbakng.

¹⁵ Samo sama'an inyo ditulis di dalapm Buku Suci, “Boko urakng inyo mongumpulan banya', sia' kinyo bokolobihan. Boko urakng inyo mongumpulan sodikit pan, sia' kinyo kokurakan.”

Paulus moutus Titus ongko duo somadikannyo bukai ko jomaat di Korintus

¹⁶ Koi bosukur ko Allah obai Sio bulah hati Titus bondar-bondar honda' monulukng kaitn samo sama'an koi jam bondar-bondar honda' monulukng kaitn.

¹⁷ Timpu koi minto io datakng ko kaitn, io sotuju. Apo, sobondarnyo dalapm hatinyo siku' io udah kotakan honda' monomu'i kaitn.

¹⁸ Kinyo haja' Titus, koi pan moutus siku' somadikan koi ko kaitn. Somuo jomaat mohormati io obai io monulukng dalapm polayatan momboritoan Kabar Boi'.

¹⁹ Bukainyo bayo nantai jam! Io pan udah di pilih boko jomaat pakai' monambahi koi dalapm pojalatan pakai' mombaba' sumbakan ko Yerusalem. Koi molabuhan polayatan nantai oca' Tuhatn dimuliaan, huatan oca' urakng ulih moniant obai koi bondar-bondar honda' monulukng urakng bukai.

²⁰ Koi moutus somadikan nantai obai koi honda' nggogamant'an. Jangan sampai ado urakng inyo ulih mongatoan koi culas timpu koi mourus sumbakan inyo bosar nantai.

²¹ Koi honda' molabuhan boko la'apo pan agatn jujur, bukainyo bayo di hadapan Tuhatn, apo di hadapan monsio jam.

²² Bosamo agatn sia' duo nantai, koi moutus somadikan koi inyo bukai agi'. Koi udah opat am mouji io. Tonyato io bondar-bondar honda' monulukng urakng bukai. Watu ni'in, io lobih bosomangant agi' obai io pocayo obai kaitn honda' moonji'i sumbakan nantai.

²³ Titus, io nam kawal ku inyo bokorojo samo agatn aku pakai' molayati kaitn. Ongko koduo somadikan inyo bukai nantai, sia' nam boko urakng inyo diutus boko jomaat. Sia' monunju'an obai Kristus mulia.

²⁴ Obai nantai, tunju'anbo ko sia' obai kaitn ado kasih. Koi udah mongatoannyo ko sia' banya' hal inyo boi' mongona'i kaitn. Jadi, tunju'anbo obai somuo hal nantai bondar. Agatn ubo nantai, jadi boko jomaat bukai pan ulih moniant somuonyo nantai.