2 Korintus 7 - Porjanjian Boharu Torjomahan Baso Dilakng Soari-ari

¹ Boko somadikan inyo ku kasihi! Somuo janji Allah nantai pakai' kito. Obai nantai, marabo kito monjago bukakng-tubuh ongko roh kito oca' borosih doi' somuo hal inyo jahat. Agatn sama'an nantai, kito mongkitn hidup husus pakai' Allah kapikng kito gola' agatn Sio.

Paulus sonang obai suratnyo komai bulah hati sia' borubah

² Sokali agi' aku muhun, tunju'anbo obai kaitn mongasihi koi. Koi co kalo bulah salah agatn sopo pan di antaro kaitn. Koi co kalo morugian kaitn damo monipu-mongolakar kaitn pakai' mondapat'an kountukan.

³ Aku bopandir ubo nantai bukainyo pakai' monyalahan kaitn. Obai ubo nantaiam inyo udah kalo ku padahan, koi kotakan mongasihi kaitn. Kito ninam kawal sohidup somati.

⁴ Aku borani bopandir ko kaitn agatn torus-torakng. Apo, aku pan bangga bondar agatn kaitn. Biar pan koi mohadapi banya' pondorita'an, kaitn kotakan monguat'an hati koi. Jadi, hati koi kotakan sonang-nyaman.

⁵ Pas watu koi datakng di propinsi Makedonia, koi co sampat torahat. Koi mohadapi pondorita'an di mono-mono. Di luar ado urakng inyo molawatn koi. Di dalapm hati koi ado jam kokuatiran.

⁶ Apo Allah inyo monguat'an hati urakng inyo putus asa. Sio monguat'an hati koi agatn kodatakan Titus.

⁷ Hati koi dikuatan bukainyo aja' obai kodatakan Titus, apo io pan momadahan obai kaitn monguat'an hati io jam. Io momadahan ko koi obai kaitn rinduanaku, kaitn monyosal agatn porbuatan kaitn inyo salah sokomai, huatan ni'in kaitn bobondar honda' mondukukng ku. Somuo nantai bulah aku lobih sonang-nyamanam.

⁸ Aku tohu obai surat aku komai mombulah hati kaitn salu'. Apo, aku co monyosal monulis surat nantai. (Memang mulonyo aku monyosal obai aku tohu surat nantai bulah hati kaitn salu'. Apo, salu' bayo somontaromo.)

⁹ Jadi, ni'in aku sonang, bukainyo obai kaitn salu', apo obai ponyalu' nantai bulah kaitn moninggalan dosa. Ponyalu' ubo nian sosuai agatn kohonda' Allah. Jadi, koi co morugian kaitn samo sokali.

¹⁰ Obai, aman urakng mooso salu' agatn caro inyo Allah kohonda'i, akibatnyo urakng nian moninggalan dosanyo. Jadi, urakng nian disolamant'an. Jadi, io co monyosal obai porasa'an salu' nantai. Apo, aman salu' nantai boasal doi' dunia, moakibat'an komatian.

¹¹ Tiatbo somuo hasil doi' porasa'an salu' nantai inyo sosuai agatn kohonda' Allah! Watu ni'in kaitn lobih bobondar monuruti Tuhatn. Kaitn bousaha oca' kosalahan kaitn nantai disolosaian. Kaitn godi agatn dosa huatan lobih gola' agatn Allah. Kaitn rindu agatn aku. Kaitn lobih bosomangant bulah koboi'an. Kaitn mohukupm urakng inyo bosalah. Jadi, lopas jadi monorima' suratku nantai, kaitn mombutian obai kaitn mourus boko mosalah nantai agatn caro inyo bondar.

¹² Timpu aku monulis surat nantai ko kaitn, tujuannyo bukainyo bayo pakai' urakng inyo bosalah nian damo pakai' urakng inyo disalahan. Sobondarnyo, tujuan ku oca' kaitn monjadi sadar di pohadapan Allah obai kaitn kotakan mongasihi koi.

¹³ Obai hasil nantai, jadi hati koi dikuatan. Solaitn nantai, koi pan sonang bondar agatn moniant obai Titus sonang. Obai, kaitn somuo bulah hatinyo tenang.

¹⁴ Sobolupm Titus monjongu' kaitn, aku momadahannyo ko io obai kaitn nam urakng inyo boi'. Jadi, kaitn co bulah aku malu. Koi hala momadahan boko hal inyo bondar ko kaitn. Ubo nian jam, somuo koboi'an kaitn inyo koi padahan ko Titus, somuo nantai tonyato bondar jam.

¹⁵ Watu ni'in, io mongkitn mongasihi kaitn. Obai, io moingant kaitn monorima' io agatn hormat huatan kaitn somuo taat.

¹⁶ Jadi, aku sonang-nyamanam obai aku ulih pocayo agatn kaitn dalapm la'apo pan.