2 Korintus 6 - Porjanjian Boharu Torjomahan Baso Dilakng Soari-ari

¹ Sobagai urakng inyo bokorojo samo agatn Allah, jadi koi muhun ko kaitn: Jangannam bulah koboi'an Allah nantai monjadi sia-sia.

² Obai, di dalapm Buku Suci, Allah bopandir, “Watu Aku sotuju, Aku mondinga'an kolai. Watu ari kosolamant'an, Aku monyolamant'an kolai.” Dinga'ancam, boko somadikan! Watu ni'inan ia'an watu inyo sotuju nantai. Ari ni'in ia'an ari kosolamant'an nantai!

Paulus mongisahan la'apo inyo ado di hatinyo

³ Koi kinyo honda' polayatan koi disalahan. Obai nian, koi bousaha kinyo moonji'i alasan ko sosopo pan pakai' molabuhan hal nantai.

⁴ Apo, dalapm somuo la'apo pan inyo koi pulah, koi monunju'an obai koi ninam boko urakng inyo molayati Allah. Ia'an nantai, koi hala sabar mohadapi bomacapm pondorita'an.

⁵ Boko urakng boduda'an koi, monamoan koi ko ponjara, bulah korusuhan pakai' molawatn koi. Koi bokorojo humpas-pulas, hala kolaparan, opat co tidu'.

⁶ Koi molayati agatn hati inyo jujur, agatn pongotohuan doi' Allah, agatn sabar, agatn boi' hati, agatn dibimbikng Roh Allah, agatn kasih inyo sobondarnyo.

⁷ Koi hala momboritoan ajaran inyo bondar. Koi molabuhan boko la'apo pan agatn kuaso doi' Allah. Sio bulah koi hidup bondar dihadapan-Nyo. Caro hidup koi inyo bondar nantai samo sama'an sonjato inyo koi pakai mombela diri damo molawatn urakng bukai.

⁸ Kadakng urakng mohormati koi, kadakng sia' mohanyam koi. Kadakng urakng momuji koi, kadakng sia' mongonjaha'i koi. Koi hala bopandir bondar, apo ado inyo bopikir obai koi monipu urakng.

⁹ Koi di anggap kinyo tokonal, apo koi dikonal urakng banya'. Koi opat komponyalan, apo koi totap hidup. Koi hala disiksa, apo koi co mati.

¹⁰ Opat jam koi salu', apo hala adomo mooso sonang-nyamannyo. Koi jaro, apo bulah urakng banya' monjadi dampu dalapm Tuhatn. Koi conyiant ado la'apo pan, apo sobondarnyo koi dampu dalapm Kristus.

Paulus mombaba' jomaat Korintus oca' hidup jouh doi' dosa

¹¹ Boko somadikanku di Korintus! Udah koi pandiran torus-torakng ko kaitn. Koi mongisahan isi hati koi ko kaitn.

¹² Koi kotakan mongasihi kaitn kinyo tobatas. Apo kaitn monahan kasih kaitn tohadap koi.

¹³ Jadi, watu ni'in biaram aku bopandir ko kaitn samo sama'an boko poana'anku siku' obai koi mongasihi kaitn, sobagai balasannyo Aku muhun: tunju'an cam kaitn pan mongasihi koi jam.

¹⁴ Jangannam kaitn bosatu agatn urakng inyo kinyo pocayo inyo mombaba' kaitn monjouh doi' Kristus. Obai, co mungkitn urakng inyo boi' dapat bokumpul agatn urakng inyo jahat? Co mungkitn torakng ulih bosatu agatn golap?

¹⁵ Co mungkitn Rajo Inyo Dijanjian Allah sohoupm agatn Rajo Sitatn. La'apo posama'annyo antaro urakng inyo kinyo pocayo agatn urakng inyo pocayo?

¹⁶ Co mungkitn Rumah Allah bohubukan agatn berhala. Allah hala ada'an di antaro kito. Jadi, kito samo sama'an Rumah umputn Allah inyo hidup. Samo sama'an pandir Allah inyo ditulis di Buku Suci, “Aku tajahan diapm di antaro sia'. Aku tajahan hidup bosamo-samo agatn sia'. Aku tajahan monjadi Allah sia'. Sia' tajahan monjadi umant-Ku.”

¹⁷ Obai nantai am, Tuhatn Allah bopandir, “Koluar cam doi' boko urakng inyo kinyo pocayo agatn Aku. Songkayoan diri kaitn doi' sia'. Jangan moncama' boko hal inyo campah. Aman kaitn molabuhan boko porintah-Ku nantai, jadi Aku tajahan monorima' kaitn.

¹⁸ Aku tajahan monjadi Bopai kaitn. Kaitn tajahan monjadi boko ana'-Ku, inyo lolaki huatan botina'.” Sama'an nianam pomandiran Tuhatn Allah, Inyo Kotakan bokuaso.