2 Korintus 5 - Porjanjian Boharu Torjomahan Baso Dilakng Soari-ari

Paulus kinyo Putus asa mohadapi pondorita'an obai io yakitn kito mondapat'an bukakng-tubuh boharu

¹ Koi co putus asa, obai koi tohu ni'in: Bukakng-tubuh kito di dunia ni'in samo sama'an potungguan bayo pakai' somontaromo. Aman potungguan kito rusa', kito paca'an mondapat'an rumah di sorugo inyo paca'an tahatn somanah-manahnyo. Rumah nantai doi' Allah, kinyo dipulah monsio.

² Somanahan kito di dalapm potungguan ni'in, kito tohinu', obai kito kotakan rindu agatn bukakng-tubuh kito nantai inyo paca'an kito dapat di sorugo.

³ Aman kito mati, kito co monjadi roh inyo kinyo bobukakng-tubuh. Kito mondapat'an bukakng-tubuh kito inyo boharu.

⁴ Apo somanahan kito di dalapm bukakng-tubuh ni'in, kito mongoluh obai bobatnnyo borat. Bukainyo obai kito honda' mati, moninggalan bukakng-tubuh ni'in, apo obai kito honda' mondapat'an bukakng-tubuh boharu nantai. Kito honda' samo sama'an nantai oca' bukakng-tubuh ni'in inyo bayo somontaromo dikuaso'i inyo hidup.

⁵ Allah siku' inyo monyiap'an kito pakai' nantai. Sio moonju' Roh-Nyo ko kito sobagai jaminan obai Sio tajahan moonju' ko kito somuo inyo Sio janjian.

⁶ Obai nantai hati koi mooso kuat. Koi tohu obai somanahan koi ija' diapm di dalapm bukakng-tubuh koi ni'in, koi jouh doi' rumah inyo tajahan koi kodiapi bosamo Tuhatn.

⁷ Obai, caro hidup koi bodasaran boko hal inyo koi pocayo'i bukainyo boko hal inyo koi tiat.

⁸ Apo hati koi totap kuat. Koi lobih sonang mati, moninggalan bukakng-tubuh ni'in, lalu hidup bosamo-samo Tuhatn di sorugo.

⁹ Obai somuo nantai, boi' koi hidup damo mati, koi hala bousaha monyonangan hati Tuhatn.

¹⁰ Obai, nononyo kito somuo gola' mohadap tahta Kristus pakai' diadili. Sotiap urakng tajahan monorima' balasan sotimpal agatn porbuatannyo di dunia ni'in, ia'an porbuatannyo inyo boi' damo inyo jahat.

Paulus mombaba' urakng pakai' pocayo ko Yesus oca' sia' ulih bosatu agi' agatn Allah

¹¹ Koi tohu lapo rotinyo gola' agatn Tuhatn, obai nantai koi bousaha monyakitan urakng. Allah udah mongotohu'i obai hati koi tulus. Aku honda' oca' kaitn pan mongotohu'i nantai.

¹² Koi co bogoyap pujian doi' kaitn. Apo, koi honda' moonji'i alasan inyo boi' ko kaitn pakai' momuji koi di hadapan boko urakng inyo biaso momuji diri mongona'i boko hal inyo kotiat'an, bukainyo mongona'i hati.

¹³ Aman ado urakng inyo moanggap koi gogilo, co apomo, obai porbuatan koi pakai' molayati Allah. Aman ado urakng inyo moanggap koi pintar corodi', nantai pakai' molayati kaitn.

¹⁴ Apo alasan pakai' somuo porbuatan koi ia'an obai Kristus mongasihi koi. Obai koi tohu agatn ni'in: Aman siku' urakng udah mati pakai' somuo urakng, jadi somuo urakng nantai udah mati jam.

¹⁵ Masudnyo ubo ni'in: Kristus udah mati pakai' somuo urakng. Sio molabuhan nantai oca' boko urakng, inyo hidup, sia' co hidup pakai' monyonangan diri sia' siku', apo sia' hidup pakai' monyonangan Sio, ia'an Sio inyo udah mati ongko bobali' hidup agi' pakai' sia'.

¹⁶ Obai, nantai koi co agi' monilai urakng monurut ukuran kito. Koi kalo monilai Kristus monurut ukuran monsio. Apo ni'in co ija' sama'an nantaiam.

¹⁷ Boko urakng inyo ado di dalapm Kristus, sia' monjadi monsio boharu. Sia' udah botongga' hidup agatn caro inyo manah. Sobondarnyo, sia' hidup agatn caro inyo boharu.

¹⁸ Somuonyo nantai dilabuhan Allah. Molalu'i Kristus, Allah udah bulah kito bodamai agi' agatn diri-Nyo. Allah jam moutus koi pakai' monulukng urakng bukai oca' sia' ulih bodamai agi' agatn Sio.

¹⁹ Koi momboritoan obai molalu'i Kristus, Allah udah mombuka' jalatn oca' urakng ulih bodamai agi' agatn diri-Nyo. Sio kinyo mompohitukan kosalahan sia'. Sio udah moutus koi pakai' monyampaian kabar mongona'i podamaian nantai.

²⁰ Koi ni'in ia'an boko utusan Kristus. Molalu'i koi Allah siku' tontu-sama'an inyo moningkau urakng. Jadi, atas damo Kristus, koi momuhun, “Bodamaicam agi' agatn Allah.”

²¹ Kristus kinyo bodosa, apo Allah bulah Sio monanggukng hukupan dosa kito. Allah molabuhan nantai oca' di dalapm Kristus, kito ulih monjadi bondar di hadapan Allah.