2 Korintus 4 - Porjanjian Boharu Torjomahan Baso Dilakng Soari-ari

Paulus monjolasan hibo io co putus asa timpu io mondorita' molayati Tuhatn Yesus

¹ Allah monunju'an kasih sayang-Nyo dalapm polayatan ni'in ko koi. Obai nantai, koi co putus asa.

² Apo koi co molabuhan boko porbuatan inyo momaluan inyo gola' sampai diombakan. Koi co monipu urakng timpu koi momboritoan Pomandiran Allah mongona'i Kristus. Koi pan co moncampuran ajaran inyo salah agatn pomandiran Allah nantai. Sobali'nyo, koi mongajar boko hal inyo bondar agatn torus torakng. Ubo nian polayatan koi di hadapan Allah, jadi somuo urakng ulih monilai koi dalapm hati sia' siku'.

³ Mungkitn ado boko urakng inyo kinyo mongoroti Kabar Boi' inyo koi boritoan. Apo nantai ongkah boko urakng inyo paca'an bonaso,

⁴ ia'an boko urakng inyo kinyo honda' pocayo. Rajo Sitatn, inyo monguaso'i dunia ni'in, udah bulah sia' co mongoroti. Io bulah mato hati sia' monjadi buto oca' sia' co moniant cohayo, ia'an Kabar Boi' mongona'i Kristus inyo mulia, Kristus inyo nianam samo agatn rupo Allah.

⁵ Obai bukainyo diri koi siku' inyo koi boritoan. Apo, koi momboritoan mongona'i Yesus Kristus sobagai Tuhatn. Sio inyo moutus koi pakai' monjadi polayatn kaitn.

⁶ Obai, Allah inyo bopandir, “Kohonda'nyo ado torakng inyo bocohayo doi' kogolapan!” Sio jam inyo mombulah torakng bocohayo di dalapm hati kito. Ia'an, Sio mombulah oca' kito ngoroti agatn hal ni'in: Komulia'an Allah dapat ditiat di dalapm muho Kristus.

⁷ Kabar Boi' mongona'i Kristus inyo kotakan borogo nantai koi baba' dalapm diri koi inyo kinyo borogo, inyo dipulah doi' tanah. Agatn ubo nantai oca' nyata obai kuaso inyo luar biaso nantai boasal doi' Allah, bukainyo doi' diri koi siku'.

⁸ Hala ado boko urakng molawatn koi, apo koi co monyorah. Koi opat co tohu lapo inyo gola' koi labuhan, apo koi co putus asa.

⁹ Boko urakng momusuhi koi, apo Allah co moninggalan koi sonsiku'an. Boko urakng sampai mohompasan koi, apo koi co mati.

^10-11 Somanah koi hidup, koi hala diancapm mati obai koi molayati Yesus. Samo sama'an koi hala mombaba' komatian Yesus di dalapm bukakng-tubuh koi. Apo koi molabuhan nantai oca' kohidupan Yesus ulih di tiat di dalapm diri koi. Ia'an di dalapm bukakng-tubuh koi inyo paca'an mati.

¹² Jadi, rotinyo, koi mohadapi komatian di dalapm polayatan koi oca' kaitn mondapat'an kohidupan inyo somanah-manahnyo.

¹³ Samo sama'an inyo ado totulis, “Aku pocayo, jadi aku bopandir!” Na, koi pocayo jadi koi mongisahan mongona'i Yesus.

¹⁴ Obai, koi pocayo obai Allah inyo udah mombulah Tuhatn Yesus bobali' hidup, ubo nian jam paca'an bulah koi hidup agi' pakai' hidup kokal bosamo agatn Yesus. Allah paca'an mombaba' koi bosamo-samo agatn kaitn kopohadapan diri-Nyo.

¹⁵ Koi mohadapi somuo pondorita'an nantai pakai' koboi'an kaitn. Nantai tojadi oca' mongkitn banya' urakng moalapi koboi'an Allah. Jadi, lobih banya' urakng bosukur ko Allah. Agatn ubo nantai, Sio dimuliaan.

¹⁶ Nantaiam sobabnyo koi co putus asa. Biar pan bukakng-tubuh koi cocat tuho goluam, apo hati koi doi' ari ko ari diboharu'i.

¹⁷ Pondorita'an inyo koi hadapi watu ni'in bayo somontaromo. Apo hasilnyo koi mondapat'an borokat inyo somanah-manahnyo. Jadi, pondorita'an nantai lompukngmo dibandikan agatn borokat nantai inyo jouh lobih bosar doi' la'apo pan.

¹⁸ Obai nantai am, koi co momikiran boko hal di duniani'in inyo ulih ditiat. Apo koi momikiran boko hal di sorugo inyo kinyo kotiat'an. Obai, boko hal inyo di dunia bayo somontaromo, apo boko hal inyo di sorugo tahatn sampai somanah-manahnyo.