2 Korintus 3 - Porjanjian Boharu Torjomahan Baso Dilakng Soari-ari

Paulus momboritoan mongona'i Pojanjian Boharu inyo Allah pulah pakai' monsio

¹ Jangan bopikir koi mula'i momuji diri koi siku'. Boko urakng bukai nantai pontikng surat inyo momuji koboi'an sia' oca' kaitn pocayo ko sia'. Damo sia' pontikng surat doi' kaitn oca' urakng bukai pocayo sia'. Apo koi samo sokali co pontikng surat nantai.

² Obai, kaitn siku' samo agatn surat inyo momuji koi. Jadi, kaitn samo sama'an surat inyo ditulis dalapm hati koi. Inyo ulih dikotohu'i ongko dibaco ulih sotiap urakng.

³ Sia' dapat mongotohu'i obai somadikan samo sama'an surat Kristus, inyo di tulis molalu'i polayatan koi. Surat nantai ditulis bukainyo agatn tintah apo agatn Roh Allah inyo hidup, bukainyo jam di batu tulis apo di hati monsio.

⁴ Kristusnam inyo bulah koi yakitn mongona'i nantai di hadapan Allah.

⁵ Aku co bomasud obai koi ado komampuan siku' inyo bulah koi sanggup molabuhan polayatan ni'in. Apo, koi sanggup obai kuaso Allah.

⁶ Sio inyo bulah koi sanggup dalapm molayati pomboritoan mongona'i Pojanjian Boharu inyo Sio pulah pakai' monsio. Pojanjian Boharu nantai kinyo mongona'i monuruti boko porintah inyo ditulis, apo mongona'i monuruti Roh Allah. Obai, boko porintah inyo ditulis di Hukupm Torat nantai mombaba' komatian. Apo, Roh Allah mombaba' kohidupan.

⁷ Timpu pojanjian inyo mombaba' komatian nantai dipulah ongko diukir di batu, cohayo Allah bosinar torakng di mato-muho Musa. Cohayonyo inyo kotakan torakng nantai sampai bulah banso Israel kinyo tahatn mongilikng mato-muho Musa, biar pan cohayo di mato-muhonyo nantai mula'i hilakam timpu nantai. Nah, aman pojanjian inyo mombaba' komatian nantai datakng agatn komulia'an inyo kotakan bosar,

⁸ tontu pojanjian inyo dionju' Roh Allah datakng agatn komulia'an inyo lobih bosar agi'.

⁹ Obai monsio culih monaati somuo porintah huatan poraturan di Hukupm Torat, jadi polayatan Musa momimpitn monsio monjadi salah di hadapan Allah. Apo, polayatan Roh Allah momimpitn monsio monjadi bondar di hadapan Allah. Jadi, aman polayatan Musa mulia, polayatan Roh Allah pan lobih mulia agi'.

¹⁰ Komainyo, Hukupm Torat nantai dianggap mulia. Apo ni'in, Allah bulah Pojanjian Boharu agatn monsio. Pojanjian Boharu nantai lobih mulia doi' la'apo pan. Jadi, dibandikan agatn nantai, Hukupm Torat nantai kinyo mulia agi'.

¹¹ Hukupm Torat bayo somontaro apo Pojanjian Boharu somanah-manahnyo. Jadi, aman komai Hukupm Torat mulia, pasti Pojanjian Boharu lobih mulia.

¹² Obai koi yakitn moharap'an mongona'i hal nantai, jadi koi borani momboritoan mongona'i Pojanjian Boharu nantai.

¹³ Co sama'an joman komai timpu Musa moonju' Hukupm Torat ko banso Israel. Watu nantai, io momakai koitn pakai' monungkau'i mato-muhonyo oca' sia' co mongilikng cohayo inyo mongkitn hilakam doi' mato-muhonyo.

¹⁴ Pikiran sia' udah totutup. Sampai ari ni'in pan, sama'an nian jam. Jadi, timpu urakng Israel mombaco Pojanjian Manah di Hukupm Torat nantai, ubo ado koitn ponutup mato-muho inyo mombulah pikiran sia' buntu'. Sia' co mongoroti sobondarnyo tujuan Hukupm Torat nantai, obai urakng bayo mongoroti aman io di dalapm Kristus.

¹⁵ Malahan sampai ari ni'in, timpu urakng Israel mombaco Hukupm Torat inyo ditulis Musa nantai, ubonyo ija' ado koitn nantai inyo monutupi hati sia' bulah sia' co mongoroti.

¹⁶ Apo, aman hati siku' urakng bobali' oca' ado kohonda' monyonangan Tuhatn, jadi ubo koitn ponutup nantai dihilakan.

¹⁷ Nah, ‘Tuhatn’ inyo dimasud di si'itan ia'an Roh. Di mono ado Roh Tuhatn, di siatn ado kobebasan.

¹⁸ Somuo kito inyo di bimbikng Roh Tuhatn, Sio torus-monorus morubah kito monjadi mongkitn samo agatn Sio. Jadi, kohidupan kito monunju'an obai Tuhatn mulia, samo sama'an mato-muho kito co ditutupi koitn ponutup nantai.