2 Korintus 2 - Porjanjian Boharu Torjomahan Baso Dilakng Soari-ari

¹ Jadi, aku udah bulah koputusan obai aku co paca'an datakng agi' ko kaitn huatan bulah ponyalu'.

² Obai, aman aku bulah hati kaitn salu', sopo ulih bulah hatiku rindakng? Conyiant urakng bukai cuali kaitn nam, inyo udah ku pulah salu'!

³ Nantai sobabnyo, daripado aku datakng, lobih boi' aku monulis surat holu ko kaitn. Aku co honda' datakng lalu kaitn mombulah ku salu'. Obai soharusnyo kaitn nam inyo bulah aku sonang-nyamanam! Jadi aku monulis surat holu, obai aku yakitn aman aku rindakng, jadi kaitn tajahan rindakng jam.

⁴ Memang aku monulis surat nantai agatn hati inyo hancur ongko podih, ongko pan banya' moncucuran ara'i mato. Apo aku co honda' bulah kaitn monjadi salu'. Kohonda'ku oca' kaitn tohu kotakan bosar kasihku ko kaitn somuo.

Paulus minto oca' sia' moamputi urakng nantai inyo udah moninggalan dosanyo

⁵ Mongona'i urakng inyo bulah ponyalu' komai, bukainyo ongkah aku am inyo salu' apo kaitn somuonyo pan salu' jam. (Mungkitn soboi'nyo aku mongatoan ‘sobagi'an doi' kaitn’ ja' oca' aku co mombosar-bosaran pokaro ni'in.)

⁶ Sobagi'an bosar doi' kaitn udah monogurnyo, nantai pan udah cukupam

⁷ Jadi, ni'in, kaitn gola' moamputi io, ongko mohibur io oca' hatinyo kinyo monjadi kotakan salu' sampai bulah io putus asa.

⁸ Obai nantai, aku muhun kaitn monunju'an obai kaitn bobondar mongasihi io.

⁹ (Dalapm surat ku komai, aku monulis ko kaitn boboropo potunju' pakai' mourus pokaro nantai. Tujuan ku pakai' mouji kaitn apobai kaitn taat dalapm la'apo pan.)

¹⁰ Aman kaitn moamputi urakng inyo bulah salah, jadi aku pan moamputi urakng nantai. Watu ku moamputi urakng, aman memang ado inyo gola' diamputi, aku molabuhan nantai pakai' koboi'an kaitn somuo. Aku pan molabuhan nantai di hadapan Kristus.

¹¹ Kito gola' moamputi oca' Rajo Sitatn kinyo mongacauan kito, obai kito tohu boko hajatnyo.

Paulus momboritoan Kabar Boi' agatn hati inyo tulus

¹² Timpu aku ko kota Troas pakai' momboritoan Kabar Boi' mongona'i Kristus, Tuhatn udah monunju'an jalatn pakai' molayati Sio di su'utan.

¹³ Apo, aku co botomu agatn somadikanku Titus di su'utan. Jadi, hatiku kinyo nyamanam. Obai nantai, aku bokotohuan lalu botula' ko propinsi Makedonia.

¹⁴ Apo bosukur ko Allah! Sio moirikan koi dalapm pawai boko urakng inyo monang obai koi hidup di dalapm Kristus. Allah momakai koi pakai' monyampaian borito mongona'i Kristus di mono-mono, samo sama'an bou harupm.

¹⁵ Obai koi diutus Kristus, jadi koi samo sama'an bou harupm inyo Kristus posombahan pakai' Allah. Bou nantai kociupan di tongah-tongah boko urakng inyo paca'an disolamant'an ongko urakng inyo paca'an bonaso.

¹⁶ Bagi urakng inyo paca'an bonaso, koi samo sama'an bou buru' inyo mombaba' komatian. Apo, bagi urakng inyo paca'an disolamant'an, koi samo sama'an bou harupm inyo mombaba' kohidupan inyo sobondarannyo. Apo sopo bai inyo sanggup molabuhan tugas inyo sama'an ni'in?

¹⁷ Obai, banya' urakng momboritoan Pomandiran Allah pakai' mondapat'an kountukan. Apo, koi co sama'an sia'. Koi momboritoan Pomandiran Allah agatn hati inyo tulus. Koi momboritoan sobagai urakng inyo diutus Allah, urakng inyo bopandir di hadapan Allah, urakng inyo hidup dalapm Kristus.