2 Korintus 13 - Porjanjian Boharu Torjomahan Baso Dilakng Soari-ari

Paulus monogur urakng Korintus oca' sia' bobali' hidup sobagai urakng pocayo

¹ Aku paca'an datakng agi' ko kaitn kotigo kalinyo. Ado di Buku Suci, “Sotiap pokaro pontikng duo damo tigo sasi pakai' momastian pokaro nantai bondar-bondar tojadi.”

² Timpu aku bosamo agatn kaitn inyo koduo kalinyo komai, udah ku poringant'an ko somuo urakng, husus pakai' boko urakng inyo kinyo botongga' bulah dosa. Ubo nian jam, watu ni'in biar pan aku co bosamo agatn kaitn, ku poringant'an agatn pomandiran sama'an ni'in: Watu aku datakng agi', aku paca'an botindak togas.

³ Aku paca'an bulah ubo nantai, obai kaitn siku' mominto ku monunju'an obai Kristus bopandir molalu'i aku. Sio kinyo lomah tohadap kaitn, apo Sio monunju'an kuaso-Nyo di tongah-tongah kaitn.

⁴ Memang Kristus ulih dihukupm mati di kayu salib obai Sio ado bukakng-tubuh inyo lomah samo sama'an monsio. Apo Sio hidup obai kuaso Allah. Ubo nian jam agatn koi. Koi lomah obai koi mondorita' samo sama'an Kristus. Apo, dalapm caro koi mohadapi kaitn, koi paca'an hidup bosamo Kristus dalapm kuaso Allah.

⁵ Uji bo diri kaitn siku' aman kaitn bondar-bondar hidup ubo urakng inyo pocayo agatn Kristus. Poriso'i cam diri kaitn! Pasti kaitn tohu obai Kristus Yesus ado di dalapm hati kaitn. Aman Sio kinyo ado di dalapm kaitn, rotinyo kaitn kinyo bondar-bondar pocayo.

⁶ Apo, aku harap kaitn tohu obai koi lulus ujian inyo monunju'an koi bondar-bondar rasul Kristus.

⁷ Koi bodoa ko Allah oca' kaitn jangan bulah kojahatan. Nantai bukainyo pakai' mombutian obai koi memang lulus ujian sobagai rasul Kristus. Nantai bukainyo tujuan koi. Tujuan koi ia'an oca' kaitn bulah koboi'an, monjumpati ajaran inyo bondar. Ongko biar pan kotiat'annyo koi co lulus ujian kinyo apo-apo.

⁸ Koi kinyo ulih mombulah hal inyo bolawatan agatn la'apo inyo bondar. Koi bayo ulih molabuhan sosuatu inyo sosuai agatn hal inyo bondar.

⁹ Apo koi sonang bondar aman koi kotiat'annyo lomah sama'an nantai. Ni'inan koi doa'an, ia'an oca' kaitn bobondar hidup sobagai boko urakng inyo pocayo.

¹⁰ Nianam sobabnyo aku monulis surat ni'in timpu ku bolupm ado bosamo agatn kaitn. Oca' watu aku bosamo kaitn nononyo, aku co gola' botindak koras momakai kuaso inyo Tuhatn onju' ko aku. Sio moonju' kuaso nantai pakai' monulukng kaitn lobih kuat, bukainyo pakai' mohancuran kopocaya'an kaitn.

Paulus moahiri suratnyo

¹¹ Ahirnyo boko somadikanku bosonang nyaman cam! Bousaha cam hidup bobondar sobagai urakng inyo pocayo. Taat'icam boko nosihatku. Hidupcam sohati sopikiran, ongko hidup cam sonang-asau agatn siku'-monyiku'. Aman kaitn molabuhan nantai, jadi Allah paca'an momborokati kaitn. Sionam inyo sumber kasih ongko sonang-asau.

¹² Kohonda'nyo kaitn hala nogur-nyapo agatn ponuh kasih ko siku'-monyiku'. Salapm doi' somuo urakng husus umputn Allah di si'itan.

¹³ Aku bodoa oca' Tuhatn Yesus, monunju'an koboi'an-Nyo ko kaitn somuo. Aku bodoa jam oca' Allah hala mongasihi kaitn somuo. Aku pan mondoa'an oca' Roh Allah monyoroto'i kaitn somuo.