Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

2 Korintus 12 - Porjanjian Boharu Torjomahan Baso Dilakng Soari-ari


Paulus dionji'i poniant'an doi' Allah, apo io pan boponyakit oca' io kinyo buhau
( 12:1-10 )

1 Aku hala momuji diriku, biar pan conyiant gunonyo. Watu ni'in aku momuji diriku mongona'i boko poniant'an doi' Tuhatn, watu Sio momadahan boko hal ko aku.

2 Aku konal agatn siku' urakng inyo pocayo agatn Kristus. Ompat bolas tohutn komainyo, kali labuh Allah moangkat urakng nantai ko tompat inyo kotakan tinggi di sorugo. (Aku co tohu aman bukakng-tubuhnyo diangkat ko sorugo damo bayo rohnyo. Ongkah Allaham inyo mongotohu'i nantai.)

3-4 Apo, aku tohu urakng nantai diangkat ko sorugo. (Sokali agi', aku co tohu aman bukakng-tubuhnyo diangkat ko sorugo damo bayo rohnyo. Ongkah Allah am inyo mongotohu'i nantai.) Timpu urakng nantai di santai, io mondinga' boko hal inyo kinyo ulih disobut. Monsio dirarakng monyobut boko hal nantai.

5 Aku honda' momuji urakng nantai. Apo aku co honda' momuji diriku siku' kocuali aku momuji diri mongona'i hal inyo monunju' obai aku lomah.)

6 Umpamonyo aku totap honda' momuji diri, nantai kinyo boroti aku urakng inyo budu. Obai, aku ulih momuji diri mongona'i hal inyo bondar. Apo cuku molabuhan nantai oca' jangan ado urakng inyo bopikir aku kotakan hebat obai poniant'an nantai. Aku honda' oca' sia' bayo monilaiku bodasaran lapo inyo sia' tiat ku labuhan ongko lapo inyo sia' dinga' inyo ku pandiran. Kinyo lobih doi' nantai.

7 Tuhatn co honda' aku monjadi buhau obai boko poniant'an inyo luar biaso nantai. Nantaiam sobabnyo, aku dionji'i somacapm ponyakit sama'an duri di dalapm isiku. Ponyakit nantai ia'an alat Rajo Sitatn inyo mohontapmku oca' aku co monjadi buhau.

8 Udah tigo kali aku muhun ko Tuhatn oca' aku dinyamani doi' ponyakit nantai.

9 Apo Tuhatn co molabuhan nantai. Sio momandiran ko aku, “Aku monunju'an koboi'an ko kolai. Nantai cukup bagi kolai. Obai, timpu urakng lomah, justru watu nantai kuaso-Ku bondar-bondar ulih ditiat.” Nantaiam sobabnyo aku lobih sonang momuji diri mongona'i hal inyo monunju'an kolomahanku. Obai timpu lomah, Kristus monguat'anku agatn kuaso-Nyo.

10 Obai nantai am, aku sonang mohadapi bomacapm kosusahan pakai' molayati Kristus. Aku sonang aman aku lomah, aman aku dihanyam, aman aku mohadapi mosalah, aman aku disiksa, aman aku mondorita'. Obai, timpu aku lomah, watu nianam aku kuat.


Paulus kuatir aman jomaat Korintus co hidup monyonangan Tuhatn
( 12:11-21 )

11 Aku torus momuji diri samo sama'an urakng budu. Apo kaitn momoso ku molabuhan nantai. Obai gola' kaitn am inyo momuji botulukan ku. Biar pan aku ni'in urakng inyo conyiant ado rotinyo, aku co kalah agatn boko urakng totontu nantai inyo kaitn anggap sobagai boko rasul inyo luar biaso.

12 Timpu aku bosamo agatn kaitn, aku mombutiannyo ko kaitn obai aku ninam rasul inyo bondar. Agatn sabar aku molabuhan somuo macapm mujisat, boko porbuatan luar biaso inyo monunju'an kuaso Tuhatn.

13 Kata'an ado lou' inyo ku labuhan pakai' jomaat inyo bukai inyo kinyo ku labuhan pakai' kaitn? Conyiant jam, ongkah ado sobuti' hal ni'in: Ia'an aku co kalo monjadi bobatn pakai' kaitn. Aman kaitn moanggap hal nantai kinyo adil, amputi ku cam!

14 Porotianbo! Aku udah siap monjongu' kaitn kotigo kalinyo. Timpu nantai, aku totap kinyo tajahan jadi bobatn pakai' kaitn. Obai, aku cuku goyap kodampuan kaitn apo aku monggoyapi kaitn. Nantai wajar, obai kaitn samo sama'an boko bobia'ku. Boko bobia' kinyo gola' mongumpulan kodampuan pakai' urakng tuhonyo. Urakng tuhonam inyo gola' mongumpulan kodampuan pakai' poana'annyo.

15 Jadi, aku sonang mongurbatan umputnku. Malahan, aku siap monyorahan diriku siku' pakai' monulukng kaitn. Jadi, aman aku mongkitn mongasihi kaitn, pasti kinyo boi' aman kaitn mongkitn kurakng mongasihi ku!

16 Boi'am! Kito sotuju obai aku co kalo monjadi bobatn pakai' kaitn. Apo ado urakng inyo bopikir obai aku licik ongko monipu kaitn pakai' mondapat'an untukng doi' kaitn.

17 Kata'an aku mondapat'an untukng doi' kaitn molalu'i boko urakng inyo ku utus ko kaitn? Cado jam!

18 Aku udah minto oca' Titus monjongu' kaitn bosamo-samo agatn somadikan inyo bukainyo. Timpu nantai, kata'an Titus bayo goyap kountukan doi' kaitn ai? Cado jam! Caro bopikirnyo ongko caro hidupnyo jujur samo sama'an aku jam.

19 Somanahan ni'in, kaitn bopikir obai koi bousaha mombela diri tohadap kaitn. Apo, boko somadikan inyo ku kasihi, sobondarnyo ninam tujuan koi: (Koi mongatoan ni'in di hadapan Allah ongko sobagai urakng inyo hidup di dalapm Kristus.) Somuo inyo koi labuhan ia'an pakai' monulukng kaitn somongkitn kuat pocayo agatn Tuhatn.

20 Obai aku bogonang watu ku datakng nononyo, kolaku'an kaitn kinyo boi' sama'an inyo ku kohonda'i. Ubo nian jam, aku gola' monogur kaitn, tindakanku kinyo samo agatn kohonda' kaitn. Aku kuatir kaitn hala botikakng-bokolohi, tungi, ponggodian, molajuan kohonda' diri siku', monjahai'an urakng bukai, mohahadu, buhau, bulah kokacauan.

21 Aku bogonang watu ku datakng agi', Allahku paca'an bulah ku malu di hadapan kaitn. Aku paca'an monangis salu' obai banya' urakng di antaro kaitn ija' hidup dalapm dosa. Sia' bolupm moninggalan boko hal inyo kotor, boko hal kinyo sonunuh, bokohonda' kinyo patut.

ကြှနျုပျတို့နောကျလိုကျပါ:



ကြော်ငြာတွေ