2 Korintus 11 - Porjanjian Boharu Torjomahan Baso Dilakng Soari-ari

Paulus morarakng jomaat Korintus tuyut boko urakng inyo mongajar ajaran inyo salah

¹ Apo, aku muhun kaitn sabar agatn aku obai aku gola' sodikit bopandir ubo urakng budu inyo momuji dirinyo siku'. Memang kaitn sabar agatn aku.

² Osonyo aku ngomburu aman sampai kaitn tuyut urakng bukai. Apo porasa'an ngomburu nantai doi' Allah. Obai, aku honda' kaitn tuyut Kristus ja'am. Kaitn samo sama'an daro inyo udah ku potunangan agatn siku' lolaki, ia'an Kristus. Aku honda' oca' kaitn suci di hadapan-Nyo.

³ Apo aku gola' kaitn paca'an ditipu, samo sama'an joman komai Hawa ditipu ular inyo licik nantai, ia'an Rajo Sitatn. Aman ubo nian, kaitn paca'an monjadi sosat huatan kinyo bobondar sotia ko Kristus.

⁴ Obai, kaitn siap monorima' urakng inyo datakng mombaba' ajaran inyo salah mongona'i Yesus. Nantai bukainyo doi' ajaran inyo bondar mongona'i Yesus inyo udah koi boritoan ko kaitn komai. Kaitn pan honda' monorima' roh inyo bukainyo doi' Roh Allah inyo udah kaitn torima' komai. Kaitn honda' pocayo ajaran inyo bukai doi' Kabar Boi' inyo udah kaitn pocayo komai.

⁵ Kaitn moanggap sia' nantai boko rasul inyo luar biaso. Apo, monurutku, sia' co lobih hebat doi' aku.

⁶ Mungkitn, dibandikan agatn sia', aku dianggap kurakng pandai bopandir. Apo aku kotakan mongotohu'i mongona'i ajaran inyo bondar. Nantai udah koi tunju'an ko kaitam sotiap watu dalapm boko hal.

⁷ Timpu aku momboritoan ko kaitn Kabar Boi' doi' Allah, aku co minto kaitn mombayarku. Kata'an nantai salah bai? Cado jam! Molabuhan lou' ubo nantai, aku morendahan diri oca' kaitn dihormati.

⁸ Timpu aku molayati kaitn, aku monorima' duit doi' boko jomaat inyo bukai. Ubonyo aku ‘mongolit’ doi' sia' oca' aku ulih molayati kaitn modas.

⁹ Timpu aku bosamo agatn kaitn, pas aku ado kokurakan, aku co morepotan kaitn. Obai, watu nantai, somuo inyo ku pontikan disodiaan boko urakng pocayo inyo datakng doi' Makedonia. Dalapm somuo hal, aku monjago oca' aku co kalo mombebat'i kaitn. Aku paca'an hala sama'an nian pakai' sotorusnyo!

¹⁰ Aku bangga obai aku co gola' minto la'apo pan doi' kaitn. Conyiant siku' urakng pan di soluruh doerah Akhaya inyo paca'an mohalaki ku momadahan mongona'i kobanggaanku nantai. Hal nantai kotakng bondar am samo sama'an ajaranku mongona'i Kristus bondar.

¹¹ Hibo aku co mominto la'apo pan doi' kaitn? Kata'an obai aku co mongasihi kaitn ai? Allah udah tohu obai aku mongasihi kaitn!

¹² Apo ninam alasan ku co kalo minto duit doi' kaitn samo sama'an boko urakng totontu nantai: Ia'an nantai, oca' sia' conyiant kosompatan pakai' momuji diri agatn bopandir sia' samo sama'an koi.

¹³ Obai, boko urakng totontu nantai mongolakar dalapm polayatan sia'. Sia' bopadah sia' nam boko rasul Kristus, apo sobondarnyo sia' boko rasul palsu.

¹⁴ Hal nantai co mohiratan. Obai, Rajo Sitatn pan borubah ruponyo oca' bulah monsio bopikir io nam molekat torakng doi' Allah.

¹⁵ Jadi, kinyo hiratn aman boko urakng inyo molayati Rajo Sitatn bulah samo sama'an nantai jam. Sia' bulah urakng bopikir, sia' nantai boko rasul inyo mongajar mongona'i hidup inyo bondar di hadapan Allah. Ahirnyo, sia' paca'an monorima' hukupan sosuai agatn boko porbuatan sia' inyo jahat.

Paulus nam rasul inyo morendahan dirinyo ongko mondorita' oca' Kristus dipuji

¹⁶ Samo agatn ku pandiran tontai: Jangan ado urakng inyo moanggap aku budu. Apo aman kaitn moanggap aku budu, aku muhun kaitn monorima' aku sobagai urakng inyo budu. Agatn ubo nantai, aku ulih sodikit momuji diri.

¹⁷ Jadi aku honda' momuji diriku siku' apo bukainyo Tuhatn monyiuh aku mongatoan nantai. Apo pandirku momuji diri samo sama'an urakng inyo budu.

¹⁸ Banya' urakng momuji diri mongona'i boko hal di dunia ni'in. Jadi, aku honda' momuji diri sama'an sia' oca' kaitn paca'an monorima'ku jam.

¹⁹ Samo sama'an kaitn siap monorima' boko urakng inyo budu nantai. Timpu kaitn monorima' sia', kaitn bopikir kaitn kotakan bijaksana.

²⁰ Kaitn siap monorima' boko urakng nantai inyo momacalan kaitn, inyo monguaso'i kaitn, inyo monipu goyap kountukan doi' kaitn, inyo ongkah bompopangkakng am, inyo mohanyam kaitn.

²¹ Koi co boulahan kaitn ubo nian. Dalapm hal sama'an nantai koi memang lomah. Apo aman boko urakng totontu nantai borani momuji diri sia' jadi aku pan borani jam. (Rotinyo aku bopandir samo sama'an urakng inyo budu!)

²² Kata'an sia' momuji diri mongatoan obai sia' nam urakng asli Ibrani? Aku pan urakng asli Ibrani jam! Kata'an sia' doi' banso Israel ai? Aku pan doi' banso Israel jam! Kata'an sia' koturutan Abrahapm ai? Aku pan koturutan Abrahapm jam!

²³ Kata'an sia' mongatoan obai sia' molayati Kristus ai? Aku molayati Kristus agatn lobih boi'! (Aku gogilo momuji diri ubo ni'inan!) Aku bokorojo molayati lobih koras doi' pado sia'. Aku kotakng opat dimansu'an ko dalapm ponjara obai momboritoan mongona'i Kristus. Aku kotakng opat dipantu', opat jam hampir mati.

²⁴ Lima' kali urakng Yahudi monyisaku agatn moncambuk. Sotiap kali ponyiksa'an tigo puluh sombilatn bakal dicambuk.

²⁵ Tigo kali aku dipantu' agatn batakng kayu ulih boko urakng Roma. Sokali ado boko urakng inyo honda' mombunuh ku monikapm ku agatn batu. Tigo kali di lout aku karapm di kapal. Tomansu' sokali aku imba'-imbul di tongah lout soari somalapm.

²⁶ Dalapm banya' pojalatan, aku mohadapi bomacapm bohayo: bohayo doi' sungai, bohayo doi' porampok, bohayo doi' bansoku siku' urakng Yahudi, bohayo doi' boko urakng bukainyo urakng Yahudi, bohayo di kota, bohayo di padakng pasir, bohayo di lout, bohayo doi' boko urakng inyo pompadah sia' pocayo, apo sobondarnyo cado.

²⁷ Aku bosusah payah, bokorojo koras, opat kurakng tidu', opat kolaparan ongko korahakan, opat co makatn, opat kodinginan obai pakai'anku kinyo cukup.

²⁸ Banya' kosusahan agi' kinyo paca'an ku sobut, solaitn ni'in: Sotiap ari aku mooso dibobati obai boko pomosalahan mongona'i somuo jomaat.

²⁹ Aman ado anggota jomaat inyo lomah aku pan jumpat lomah jam. Aman ado anggota jomaat inyo disosatan, pasti hatiku oso ropu'-lolo.

³⁰ Aman aku toposo momuji diri, jadi aku paca'an momuji diri mongona'i hal inyo monunju'an kolomahanku.

³¹ Allah ia'an Bopai doi' Tuhatn kito, Yesus, topuji sampai somanah-manahnyo. Sio tohu obai aku co bulah kotumbukan.

³² Timpu aku di kota Damsyik, ado gubernur inyo diangkat Rajo Aretas. Gubernur nantai monyiuh tontara monjago boko pintu gerbakng kota nantai pakai' monangkap aku watu aku koluar.

³³ Apo ado boko urakng inyo monulukngku doi' io. Sia' mombaba' ku ko sobuah jondela di dindikng inyo mongoliliki kota nantai. Lalu, sia' monurutanku ko luar di dalapm taya' bosar.