2 Korintus 10 - Porjanjian Boharu Torjomahan Baso Dilakng Soari-ari

Paulus ado kuaso doi' Tuhatn pakai' monguat'an urakng pocayo ongko monongga'an ajaran inyo salah

¹ Aku ninam, Paulus, udah tohu obai ado boboropo urakng di antaro kaitn inyo bopandir bunyi ni'in: “Timpu Paulus ado bosamo agatn kito, io sabar. Io borani monogur kito bayo agatn surat timpu io jouh doi' kito.” Jadi, ni'in, aku muhun ko kaitn agatn sabar samo sama'an Kristus jam sabar ongko boi' hati.

² Aku muhun agatn kaitn: Jangan momoso ku monunju'an obai aku borani monogur kaitn agatn koras timpu aku ado bosamo agatn kaitn nononyo. Aku bopikir gola' molabuhan samo sama'an nantai tohadap boko urakng totontu nantai inyo monyangko obai caro hidup koi ongkah monuruti kohonda' monsio.

³ Memang koi ija' hidup di dunia ni'in. Apo koi co bojuakng agatn caro monsio.

⁴ Boko sonjato inyo koi pakai dalapm pojuakan koi bukainyo sonjato dunia ni'in. Sonjato koi ado kuaso doi' Allah inyo ulih mohancuran boko bentekng musuh koi.

⁵ Musuh koi mombaba' ajaran inyo salah. Apo, koi mongalahan somuo nantai. Urakng inyo buhau bulah pagar inyo kotakan tinggi inyo mohalaki monsio mongonal Allah. Apo koi morobahan somuo nantai. Urakng ado pikiraninyo kinyo boi'. Apo, koi monangkap somuo pikiran nantai ongko mongajar oca' monsio monaati Kristus.

⁶ Lopas jadi koi taat agatn soponuhnyo, koi siap pakai' mohukupm somuo urakng bukai inyo kinyo taat.

⁷ Kaitn gola' bopikir boboi' mongona'i lapo inyo kaitn kotohu'i. Aman ado urakng inyo yakitn mongotohu'i obai io nam umputn Kristus, urakng nian gola' mongotohu'i ni'in: Koi pan umputn Kristus jam samo sama'an io jam.

⁸ Aku co malu aman aku tolalu bangga agatn kuaso inyo Tuhatn onju' ko koi. Obai, Tuhatn moonju' kuaso ko koi pakai' monulukng kaitn lobih kuat pocayo, bukainyo pakai' moruntuhan kopocaya'an kaitn.

⁹ Aku co bomasud bogola'i kaitn agatn boko suratku.

¹⁰ Aku tohu ado urakng inyo bopandir, “Dalapm boko suratnyo, Paulus momakai pomandiran inyo togas huatan koras. Apo timpu io ada'an samo agatn kito, sikapnyo lomah, huatan io kinyo pandai bopandir.”

¹¹ Urakng inyo sama'an nian gola' momporhatian: Samo sama'an koi momakai pomandiran inyo koras dalapm surat timpu koi co bosamo agatn kaitn, ubo nian jam nononyo porbuatan koi paca'an koras timpu koi ado bosamo agatn kaitn agi'.

Paulus mombela polayatannyo

¹² Ado boko urakng totontu inyo momuji diri sia' siku'. Soandainyo sia' memang hebat, koi co borani mongatoan diri koi samo hebat sama'an sia'. Apo sobondarnyo sia' budu. Obai, sia' ongkah mombandikan dirinyo agatn diri sia' siku'. Sia' momakai ponilaian sia' siku' monganggap dirinyo hebat.

¹³ Apo koi co ubo nian. Koi co momuji diri lobih doi' batasnyo. Koi co momuji diri agatn polayatan urakng bukai di doerah bukai. Koi bayo momuji mongona'i polayatan inyo Allah onju' ko koiam. Polayatan nantai tomansu' polayatan koi di antaro kaitn!

¹⁴ Obai, komai koi udah datakng ko kaitn lalu momadahan Kabar Boi' mongona'i Kristus. Jadi, koi co molalu'i batas nantai.

¹⁵ Koi co momuji diri agatn polayatan inyo urakng bukai labuhan di luar batas inyo Allah tontuan pakai' koi. Apo, koi momuji mongona'i polayatan koi di antaro kaitn. Polayatan nantai ija' dalapm batas inyo Allah tontuan pakai' koi. Koi boharap obai kaitn mongkitn kuat pocayo ko Kristus. Ongko obai nantai, kaitn paca'an lobih mohormati koi.

¹⁶ Agatn ubo nantai, koi ulih momboritoan Kabar Boi' di boko doerah bukai jam, ia'an nantai boko doerah inyo bolupm dilayati urakng bukai. Koi co gola' momuji diri agatn hasil polayatan inyo dilabuhan urakng bukai di doerah inyo Allah tontuan pakai' sia'.

¹⁷ Apo koi ulih bangga sosuai agatn pomandiran inyo ditulis dalapm Buku Suci: “Aman ado urakng inyo mooso bangga, biaram io bangga mongona'i lapo inyo dilabuhan Tuhatn.”

¹⁸ Obai, urakng inyo bondar-bondar cucu' dipuji ia'an urakng inyo dipuji Tuhatn, bukainyo urakng inyo momuji dirinyo siku'.