2 Korintus 1 - Porjanjian Boharu Torjomahan Baso Dilakng Soari-ari

Salapm doi' Paulus

¹ Surat ni'in doi' ku, Paulus. Aku dipilih pakai' monjadi rasul Kristus Yesus obai nantai kohonda' Allah. Salapm jam doi' Timotius, somadikan kito. Surat ni'in pakai' jomaat Allah di kota Korintus ongko somuo urakng inyo husus umputn Allah di somuo propinsi Akhaya.

² Aku bodoa oca' Allah Bopai kito ongko Tuhatn Yesus Kristus hala monunju'an koboi'an ongko moonji'i sonang-asau ko kaitn.

Paulus bosukur obai Allah monguat'an hati urakng pocayo inyo mohadapi pondorita'an

³ Topuji cam Allah, ia'an nantai Bopai doi' Yesus Kristus, Tuhatn kito. Sio nam Bopai inyo kotakan mongasihi. Sio nam Allah inyo hala monguat'an hati kito.

⁴ Sio monguat'an hati koi dalapm boko pondorita'an koi. Agatn ubo nian, Sio bulah koi ulih monguat'an hati boko urakng bukai dalapm boko pondorita'an sia'. Koi monguat'an hati sia' samo sama'an Allah monguat'an hati koi.

⁵ Obai, koi opat mohadapi pondorita'an samo sama'an Kristus. Apo ubo nian jam, Allah opat monguat'an hati koi molalu'i Kristus.

⁶ Timpu koi mohadapi pondorita'an dalapm polayatan koi, tujuannyo oca' hati kaitn dikuatan ongko oca' kaitn dapat disolamant'an. Timpu hati koi dikuatan, tujuannyo oca' hati kaitn dikuatan jam. Agatn ubo nantai, kaitn dapat botahatn dalapm mohadapi pondorita'an samo sama'an pondorita'an inyo koi alapi jam.

⁷ Koi yakitn obai kaitn paca'an botahatn. Koi co gangga'-gua'an mongona'i nantai obai koi tohu ni'in: samo sama'an kaitn mohadapi pondorita'an, ubo nantai jam hati kaitn paca'an dikuatan.

⁸ Boko somadikan, kohonda' koi oca' kaitn mongotohu'i mongona'i pondorita'an inyo koi alapi di propinsi Asia Kocit. Pondorita'an nantai kotakng borat sampai koi co sanggup botahatn. Koi putus asa, osonyo honda' mati ja'am.

⁹ Memang nantai porasa'an koi, samo agatn koi dihukupm mati. Apo pondorita'an nantai tojadi oca' koi jangan bompajakan kokuatan diri koi siku', apo bompajakan Allah inyo bulah urakng mati bobali' hidup agi'.

¹⁰ Sio udah monyolamant'an koi doi' bohayo komatian nantai. Sio pan paca'an torus monyolamant'an koi. Koi yakitn ongko boharap ko Sio obai Sio paca'an monyolamant'an koi agi'.

¹¹ Kaitn jam tuyut monulukng koi agatn banya' doa kaitn pakai' koi. Jadi, nononyo, timpu Allah monunju'an koboi'an-Nyo ko koi, jadi banya' urakng paca'an bosukur obai nantai.

Paulus monjolasan alasan io co bobali' mondataki jomaat Korintus

¹² Boko somadikan, koi bangga mongona'i ni'in: Dalapm hati koi siku', koi tohu obai caro hidup koi di dunia ni'in kinyo salah, hususnyo dalapm hubukan koi agatn kaitn. Koi molabuhan boko hal agatn hati inyo tulus ongko borosih. Hati ubo nantai doi' Allah. Koi molabuhan somuonyo agatn koboi'an-Nyo, bukainyo agatn Kobijaksana'an monsio.

^13-14 Obai, koi bayo monulis boko hal inyo dapat kaitn baco ongko ngoroti. Kaitn udah dapat ngoroti sobagi'an. Apo, ubo nantai jam, aku boharap kaitn paca'an mongoroti somuonyo. Agatn ubo nantai, aku boharap watu Tuhatn Yesus datakng, kaitn paca'an bangga ko koi samo sama'an koi paca'an bangga ko kaitn.

¹⁵ Obai aku yakitn kaitn paca'an bangga ko koi, jadi aku bohajat pakai' monjongu' kaitn duo kali, oca' kaitn diborokati duo kali. Hajatnyo aku holu monjongu' kaitn,

¹⁶ hoyu' monorusan pojalatan ko propinsi Makedonia. Lopas aku bobali' doi' Makedonia, aku honda' monjongu' kaitn agi' oca' kaitn dapat monulukng ku monorusan pojalatanku ko propinsi Yudea.

¹⁷ Apo aku gola' morubah hajat nantai. Jadi, ado bai kaitn bopikir aku gala' borubah-ubah hajatku? Apo bai kaitn bopikir aku gala' bulah hajat monurut kohonda' ku siku', sobobontar ‘Au’ sobobontar ‘Cado’?

¹⁸ Demi Allah inyo sotia momonuhi janji-Nyo, pomandiran koi ko kaitn co gangga'-gua'an di antaro ‘Au’ ongko ‘Cado’.

^19-20 Obai, Ana' Allah, Yesus Kristus, pan kinyo gangga'-gua'an di antaro ‘Au’ ongko ‘Cado’. Aku, Silas ongko Timotius udah momboritoan ko kaitn mongona'i Kristus, ia'an Rajo Inyo Dijanjian Allah. Molalu'i Sio, somuo janji Allah monjadi nyata, samo sama'an ado jawaban ‘Au’ doi' Allah. Jadi, di dalapm Kristus bayo ado ‘Au’. Nianam sobabnyo, watu kito mongatoan ‘Amin’ pakai' momuji Allah, kito mongatoan ‘Amin’ dalapm damo Kristus.

²¹ Allah inyo bulah koi ongko kaitn kuat bosatu agatn Kristus. Sio jam inyo momilih kito.

²² Sio udah monyegel kito monjadi umputn-Nyo huatan moonju' Roh-Nyo di dalapm hati kito. Agatn molabuhan nantai Allah monjamin Sio paca'an moonji'i somuo inyo Sio janjian.

²³ Jadi, aku moningkau Allah sobagai sasi inyo mongonal isi hatiku. Sio tohu obai ni'in bondar: Alasan ku co datakng ko Korintus obai aku co honda' bulah kaitn sakit hati agatn monogur kaitn.

²⁴ Aku co bomasud obai koi honda' momoso lapo inyo gola' kaitn pocayo. Obai, koi tohu kaitn pocayo agatn kuat ko Kristus. Apo, inyo ku masud ia'an koi honda' bokorojo samo oca' bulah kaitn bondar-bondar sonang-nyaman.