Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

1 Yohanes 5 - Porjanjian Boharu Torjomahan Baso Dilakng Soari-ari


Urakng inyo pocayo agatn Yesus ulihnyo molawatn somuo inyo jahat
( 5:1-5 )

1 Urakng inyo pocayo obai Yesus nam Kristus, Rajo Inyo Dijanjian Allah, urakng nantai am ana' Allah. Urakng inyo mongasihi Allah Bopai, mongasihi poana'an Allah jam.

2 Agatn caro inyo ni'in kito tohu obai kito mongasihi poana'an Allah: Ia'an nantai aman kito mongasihi Allah ongko monuruti boko porintah-Nyo.

3 Obai, aman kito mongasihi Allah rotinyo kito pan paca'an monuruti boko porintah-Nyo. Boko porintah-Nyo kinyo borat pakai' kito,

4 obai somuo ana' Allah ulih mongalahan kojahatan di dunia ni'in. Kito ulih molabuhan nantai obai kito pocayo ko Yesus Kristus.

5 Sopo pan inyo ulih mongalahan dunia? Ongkah urakng inyo pocayo am obai Yesus nam Ana' Allah.


Allah siku' mongatoan obai Yesus nam Ana'-Nyo
( 5:6-12 )

6 Yesus Kristusnam inyo datakng ko dunia. Huatan timpu nantai, ado hal inyo bosasi mongona'i sopo Sio sobondarnyo, ia'an nantai ara'i timpu Yesus dibaptis, huatan darah timpu Yesus mati. Co bayo ado ara'i, apo ado darah jam. Roh Allah jam bosasi mongona'i sopo Sio, obai Roh Allah bosasi somuo inyo bondar.

7 Jadi ado tigo hal inyo bosasi mongona'i sopo Yesus sobondarnyo:

8 ia'an nantai Roh Allah, ara'i ongko darah. Kotigo hal nantai bosasi hal inyo samo mongona'i Yesus.

9 Kito pocayo agatn kosasian monsio. Apo kosasian Allah lobih kuat agi'. Huatan Allah udah bosasi mongona'i Ana'-Nyo siku'.

10 Urakng inyo pocayo ko Ana' Allah, boroti io pocayo agatn kosasian Allah nantai dalapm hatinyo. Apo urakng inyo co pocayo agatn kosasian nantai, boroti io moanggap Allah bulah kotumbukan. Obai, io kinyo pocayo agatn kosasian Allah mongona'i Ana'-Nyo.

11 Ninam kosasian nantai: Allah udah moonju' ko kito kohidupan kokal molalu'i Ana'Nyo.

12 Urakng inyo pocayo agatn Ana'-Nyo, io bodapat kohidupan kokal. Apo urakng inyo kinyo pocayo agatn Ana'-Nyo, co bodapat kohidupan kokal.


Urakng inyo pocayo pasti mondapat'an kohidupan kokal di sorugo
( 5:13-21 )

13 Aku monulis surat ni'in ko kaitn inyo pocayo ko damo Ana' Allah. Ku tulis oca' kaitn tohu obai kaitn udah bodapat kohidupan kokal.

14 Kito jangan gola'am mohadap Allah obai ni'in: Sio paca'an mongabulan doa kito aman kito minto la'apo pan inyo sosuai agatn kohonda'-Nyo.

15 Obai kito tohu nantai, jadi kito pan tohu jam obai kito udah mondapat'an lapo ja' inyo udah kito pinto doi'-Nyo.

16 Aman ado di antaro kaitn inyo moniant somadikannyo bulah dosa, masudku ubo dosa inyo kinyo bulah io bosongkayo doi' Allah somanah-manahnyo, kaitn gola' bodoa pakai' io, lalu Allah tajahan moonji'i kohidupan inyo kokal ko urakng inyo bulah dosa inyo kinyo bulah io bosongkayo doi' Allah somanah-manahnyo. Apo ado dosa inyo tajahan bulah io bosongkayo doi' Allah somanah-manahnyo. Aku co momadahan obai kaitn gola' bodoa pakai' urakng inyo bulah dosa ubo nantai.

17 Somuo porbuatan jahat nantaiam dosa, apo ado dosa inyo kinyo bulah urakng bosongkayo doi' Allah somanah-manahnyo.

18 Kito tohu obai somuo urakng inyo monjadi poana'an Allah, sia' co hidup dalapm dosa. Sia' dilinduki Ana' Allah, ia'an Yesus Kristus. Rajo Sitatn kinyo ulih bulah la'apo pan agatn sia'.

19 Kito tohu obai kito boasal doi' Allah. Apo somuo urakng di dunia sia' ado di babah kuaso Rajo Sitatn inyo jahat.

20 Kito tohu obai Ana' Allah udah datakng ko dunia ni'in. Sio udah moonji'i pongorotian ko kito oca' kito mongonal Allah inyo bondar. Kito hidup bosatu agatn Allah inyo bondar. Kito pan gola' hidup bosatu agatn Ana'Nyo, Yesus Kristus. Sio nianam Allah inyo bondar. Sio nianam inyo moonji'i kohidupan kokal.

21 Poana'anku, jangan kaitn sampai monyombah boko lompatukng damo la'apo pan.

ကြှနျုပျတို့နောကျလိုကျပါ:



ကြော်ငြာတွေ