1 Yohanes 4 - Porjanjian Boharu Torjomahan Baso Dilakng Soari-ari

Kito gola' mouji aman ajaran urakng bondar-bondar doi' Roh Allah kata'an cado

¹ Boko somadikanku inyo tokasih, udah ado banya' nabi palsu di dunia ni'in. Obai nantaiam, jangannam pocayo agatn somuo urakng inyo mongatoan obai Roh Allah ado di inyo. Apo poriso'icam lobih holu ajaran sia' nantai pakai' mongotohu'i aman roh inyo ado di inyo boasal doi' Allah kata'an cado.

² Agatn caro inyo ninam kaitn tohu aman roh inyo ado di inyo boasal doi' Allah: Aman urakng nantai moaku'i obai Yesus Kristus udah datakng ko dunia ni'inan monjadi monsio, rotinyo roh inyo ado di dalapm dirinyo nian boasal doi' Allah.

³ Apo aman urakng nian co moaku'i obai Yesus udah datakng ko dunia ni'in monjadi monsio, rotinyo roh inyo ado di dalapm dirinyo nian kinyo boasal doi' Allah. Roh nianan doi' Musuh Kristus. Kaitn udah mondinga' obai roh Musuh Kristus paca'an datakng. Timpu ni'inan, roh nantai udah ado di dunia ni'inan!

⁴ Apo, boko poana'anku, kaitn boasal doi' Allah. Kaitn udah mongalahan boko nabi palsu nantai. Obai, Roh Allah inyo ado di dalapm diri kaitn lobih bokuaso daripado roh Musuh Kristus inyo ado di dalapm dunia.

⁵ Boko nabi palsu nantai boasal doi' dunia ni'in. Obai nantai, sia' bopandir mongona'i boko hal inyo ado di dunia ni'in huatan boko urakng inyo ado di dunia ni'in pocayo ko sia'.

⁶ Apo, koi boasal doi' Allah. Urakng inyo mongonal Allah, monorima' ajaran koi. Urakng inyo co boasal doi' Allah, kinyo monorima' ajaran koi. Ubo nianam caronyo kito mongotohu'i pobedaan roh inyo ado di urakng nantai ia'an Roh Allah inyo monunju'an somuo inyo bondar ongko roh bukai inyo mombaba' ajaran kinyo bondar.

Obai Allah udah mongasihi kito, jadi kito gola' mongasihi urakng bukai

⁷ Boko somadikanku inyo tokasih, marabo kito hala mongasihi. Obai, kasih boasal doi' Allah. Urakng inyo mongasihi siku'-monyiku' nianam ana' Allah, huatan io mongonal Allah.

⁸ Urakng inyo co mongasihi urakng bukai, co mongonal Allah. Obai, Allah nam kasih.

⁹ Agatn caro inyo sama'an ni'in Allah monunju'an kasih-Nyo ko kito: Ia'an nantai, Allah udah moutus Ana'-Nyo inyo tunggal ko dalapm dunia. Oca' Ana'-Nyo ulih moonji'i hidup inyo sobondarnyo ko kito.

¹⁰ Ninam kasih nantai, bukainyo kito inyo udah mongasihi Allah, apo Allah inyo udah mongasihi kito: Sio moutus Ana'-Nyo pakai' mati oca' kito dapat dibebasan doi' hukupan dosa.

¹¹ Boko somadikanku inyo tokasih, obai Allah kotakng mongasihi kito, jadi kito pan gola' hala mongasihi.

¹² Conyiant ado siku' urakng pan inyo kalo moniant Allah. Apo, aman kito hala mongasihi, jadi Allah bosatu agatn kito, huatan kito bondar-bondar ado kasih Allah dalapm hati kito.

¹³ Ninam caronyo kito tohu obai kito bosatu agatn Allah, huatan Allah bosatu agatn kito: Ia'an nantai obai Allah udah moonju' Roh-Nyo ko kito.

¹⁴ Huatan obai koi udah moniant obai Allah Bopai kito udah moutus Ana'-Nyo monjadi Ponyolamant boko urakng di dunia. Koi momboritoan nantai.

¹⁵ Urakng inyo mongaku'i Yesus nam Ana' Allah, jadi Allah bosatu agatn urakng nantai huatan urakng nantai hidup bosatu agatn Allah.

¹⁶ Kito udah tohu huatan udah pocayo obai Allah mongasihi kito. Allah nam kasih. Jadi, urakng inyo hala mongasihi Sio ongko urakng bukai, urakng nantai hidup bosatu agatn Allah huatan Allah bosatu agatn io.

¹⁷ Agatn ubo ni'inan kito paca'an tohu aman kito bondar-bondar ado kasih Allah di dalapm hati kito: Ia'an nantai aman kito co gola'an Ari Ponghakipan nononyo. Kito jangan gola'am obai di dunia ni'in kito hidup agatn caro inyo samo sama'an Kristus.

¹⁸ Di dalapm kasih conyiant inyo dikogola'i: kasih inyo sobondarnyo mohilakan ponggola' obai di dalapm ponggola' ado hukupan ongko sosopo pan inyo gola' boroti io kinyo sobondarnyo di dalapm kasih.

¹⁹ Kito gola' mongasihi, obai Allah lobih doholu mongasihi kito.

²⁰ Aman ado urakng inyo bopandir, “Aku mongasihi Allah,” apo urakng nantai bonci'an somadikannyo, jadi urakng nantai bulah kotumbukan. Obai, urakng inyo co mongasihi somadikannyo inyo kotiat'an, co mungkitn io ulih mongasihi Allah inyo kinyo kotiat'an.

²¹ Nianam porintah inyo kito torima' doi' Sio: Urakng inyo mongasihi Allah, io gola' mongasihi somadikannyo.