1 Yohanes 3 - Porjanjian Boharu Torjomahan Baso Dilakng Soari-ari

¹ Porotianbo, kotakan bosar kasih Allah Bopai ko kito, obai nantai kito disobut poana'an-Nyo! Memang sobondarnyo kito ninam poana'an Allah. Obai, boko urakng di dunia ni'in co mongonal kito obai dunia co mongonal Sio.

² Boko somadikanku inyo ku kasihi, watu ni'in kito nam poana'an Allah. Kito co tohu pasti ubo apo Allah morubah kito nononyo. Apo kito tohu ni'inan: timpu Kristus datakng agi', kito paca'an monjadi samo sama'an Sio obai kito moniant Sio dalapm koadaan-Nyo inyo sobondarnyo

³ Somuo urakng inyo yakitn moharapan obai Sio paca'an mombulah nantai tojadi, sia' monjago diri oca' co bulah dosa samo sama'an Sio co bulah dosa.

⁴ Urakng inyo hala bulah dosa, inyo nian molanggar boko porintah Allah. Obai, bulah dosa samo agatn molanggar boko porintah Allah.

⁵ Kaitn tohu obai Kristus datakng pakai' moamputi dosa monsio. Sio samo sokali co bodosa.

⁶ Jadi, urakng inyo hidup bosatu agatn Sio, co bulah dosa agi'. Apo urakng inyo totap bulah dosa, rotinyo urakng nian co kalo mongoroti mongona'i Kristus. Urakng nian co honda' mongonal Sio.

⁷ Boko poana'anku! Jangan pocayo agatn ajarannyo salah doi' sopo pan. Urakng inyo hidup bondar di hadapan Allah nianam urakng inyo bondar, samo sama'an Kristus ia'an bondar.

⁸ Apo urakng inyo totap bulah dosa, rotinyo io ia'an ana' Rajo Sitatn. Nantai udah jolas obai Rajo Sitatn hala bulah dosa doi' sobolupm dunia dipulah. Nantaiam alasan Ana' Allah udah datakng ko dunia, ia'an oca' Sio monongga'an pokoroja'an Rajo Sitatn.

⁹ Urakng inyo monjadi ana' Allah, culih hala bulah dosa. Obai, tobiat Allah siku' ado di dalapmnyo. Allah nam Bopainyo, jadi io culih hala bulah dosa.

¹⁰ Doi' tando ni'in kito mongotohu'i sopo poana'an Allah huatan sopo poana'an Rajo Sitatn: Urakng inyo co hidup bondar di hadapan Allah, urakng nianan bukainyo ana' Allah. Ubo nian jam, urakng inyo co mongasihi somadikannyo. Urakng nantai bukainyo ana' Allah.

Kito gola' mongasihi agatn porbuatan

¹¹ Ninam borito inyo udah kaitn dinga' tangga'i mulonyo, ia'an nantai obai kito gola' hala mongasihi.

¹² Jangan kito sama'an Kain doi' joman komai. Sio nam ana' Rajo Sitatn inyo mombunuh adikngnyo. Hibo Kain molabuhan nantai? Obai somuo inyo io labuhan jahat apo somuo inyo dilabuhan adikngnyo bondar.

¹³ Boko somadikanku! Jangan kaitn hiratn aman boko urakng di dunia bonci'an kaitn.

¹⁴ Apo kito mongasihi somadikan kito. Obai nantai, kito tohu obai kito kinyo dikuaso'i komatian agi', apo kito udah borubah. Kito mondapat'an hidup inyo sobondarnyo. Urakng inyo co mongasihi, rotinyo io ija' dikuaso'i komatian.

¹⁵ Urakng inyo bonci'an somadikannyo samo agatn pombunuh. Kaitn tohu obai somuo urakng inyo mombunuh kinyo mondapat'an hidup kokal.

¹⁶ Apo kito udah mongotohu'i caro pakai' mongasihi urakng bukai doi' contoh ni'in: Yesus Kristus monyorahan hidup-Nyo pakai' monyolamant'an kito. Jadi, kito pan gola' rela monyorahan hidup kito pakai' boko somadikan kito.

¹⁷ Sopo pan inyo hidupnyo dampu, huatan io pan moniant somadikannyo jaro uyuh, apo io co honda' monulukng urakng nantai, ubo apo kasih Allah ado dalapm dirinyo!

¹⁸ Poana'anKu! Jangannam kito bayo bopandir obai kito mongasihi urakng bukai damo bopandir mongona'i kasih ja'am. Apo kohonda'nyo kito bondar-bondar mongasihi agatn porbuatan ongko dalapm kobondaran.

Aman kito monyonangan Allah, kito co gola' mohadap Sio

¹⁹ Aman kito bondar-bondar mongasihi sama'an nantai, jadi kito paca'an mongotohu'i obai kito boasal doi' kobondaran. Ubo nianam, hati kito tenang di hadapan Allah.

²⁰ Biar pan mungkitn hati kito honda' monyalahan kito, aman kito bondar-bondar mongasihi urakng bukai, kito totap tenang di hadapan Allah. Obai, Sio lobih bosar daripado hati kito. Sio mongotohu'i boko la'apo pan.

²¹ Jadi, boko somadikanku inyo tokasih, aman hati kito co monyalahan kito, jadi kito jangan gola' mohadapi Allah.

²² Sio moonji'i kito lapo ja' inyo kito minto obai kito monoruti somuo porintah-Nyo, huatan obai kito molabuhan la'apo pan inyo monyonangan hati-Nyo.

²³ Ninam porintah-Nyo: Kito gola' pocayo agatn damo Ana'-Nyo, ia'an Yesus Kristus. Huatan kito gola' hala mongasihi sosuai agatn porintah inyo Sio onju' ko kito.

²⁴ Urakng inyo monuruti boko porintah-Nyo, io hidup bosatu agatn Allah, huatan Allah hidup bosatu agatn io. Kito tohu obai Allah hidup bosatu agatn kito obai ni'in: Sio udah moonju' Roh-Nyo ko kito.