1 Yohanes 2 - Porjanjian Boharu Torjomahan Baso Dilakng Soari-ari

Yesus mati pakai' mombebasan kito doi' hukupan dosa

¹ Boko poana'anku! Aku monulis somuo ni'in ko kaitn oca' kaitn jangan bulah dosa. Apo, aman ado di antaro kito inyo bulah dosa, kito ado siku' urakng inyo monulukng kito di hadapan Allah. Urakng nantai ia'an Yesus Kristus inyo adil.

² Yesus mati oca' boko dosa kito diamputi. Bukainyo bayo pakai' dosa kito ja'am, apo pakai' dosa somuo urakng di dunia ni'in.

³ Aman kito monaati boko porintah Allah, hal nantai monunju'an obai kito bondar-bondar mongonal Sio.

⁴ Urakng inyo bopandir, “Aku mongonal Allah,” apo io co monuruti boko porintah-Nyo, urakng nantai bulah kotumbukan. Kobondaran conyiant di dalapm io.

⁵ Apo urakng inyo monuruti Pomandiran Allah, urakng nantai bondar-bondar ado kasih Allah di dalapm hatinyo. Hal nantai monunju'an obai kito hidup bosatu agatn Allah

⁶ Urakng inyo mongatoan obai io hidup bosatu agatn Allah, urakng nantai gola' hidup agatn caro samo sama'an Yesus Kristus.

Porintah oca' mongasihi

⁷ Boko somadikan inyo ku kasihi! Inyo ku tulis ko kaitn bukatnnyo porintah boharu. Apo porintah ni'in ia'an porintah inyo udah manaham disampaian ko kaitn doi' mulonyo. Porintah nantaiam Pomandiran Allah inyo kalo kaitn dinga' komainyo.

⁸ Biar pan ubo nian, porintah nantai ulih dianggap boharu jam. Obai kobondarannyo ulih ditiat dalapm diri Kristus ongko dalapm diri kaitn. Obai, kogolapan mongkitn mohilakng huatan torakng inyo bondar mula'i bocohayo.

⁹ Urakng inyo bopandir obai io udah hidup di dalapm torakng, apo io bonci'an somadikannyo, boroti io ija' hidup di dalapm kogolapan sampai watu ninam.

¹⁰ Urakng inyo mongasihi somadikannyo, io nianam urakng inyo bondar-bondar hidup di dalapm torakng. Conyiant ado lapopan di dalapm hidup io inyo bulah urakng bukai sosat.

¹¹ Apo urakng inyo bonci'an somadikannyo, boroti io ija' hidup di dalapm kogolapan. Io samo sama'an urakng inyo bojalatn di dalapm kogolapan. Io co tohu ko mono io bojalatn obai kogolapan nantai bulah io buto.

Yohanes moonji'i somangant ko boko urakng inyo pocayo

¹² Poana'anku! Aku monulisan ni'in ko kaitn obai dosa kaitn udah diamputi obai porbuatan Yesus Kristus.

¹³ Pombopaian! Aku monulisan ni'in ko kaitn obai kaitn udah mongonal Yesus Kristus, ia'an Sio inyo udah ado sobolupm dunia dipulah. Boko urakng muda'! Aku monulis ni'in ko kaitn obai kaitn udah mongalahan inyo jahat.

¹⁴ Poana'anku! Aku monulis ni'in ko kaitn obai kaitn mongonal Allah Bopaiku. Boko pombopaian! Aku monulis ni'in ko kaitn obai kaitn udah mongonal Yesus Kristus, ia'an Sio inyo udah ado sobolupm dunia dipulah. Boko urakng muda'! Aku monulis ni'in ko kaitn obai kaitn pocayo agatn kuat. Pomandiran Allah ado di dalapm hati kaitn huatan kaitn udah mongalahan kojahatan.

Jangan moncintai boko hal di dunia ni'in

¹⁵ Jangan moncintai dunia ni'in damo lapo pan inyo ado di dalapm dunia ni'in. Aman urakng moncintai dunia, rotinyo io co moncintai Allah Bopai.

¹⁶ Boko lapopan inyo ado di dalapm dunia ni'in, ia'an kohonda' monsio, boko hal inyo ditiat lalu dikohonda'i, somuo hal lapo pan inyo monjadian urakng buhau. Somuo nantai kinyo boasal doi' Allah Bopai, apo doi' dunia.

¹⁷ Dunia ni'in huatan somuo inyo dikohonda'i monsio paca'an bonaso. Apo, urakng inyo monuruti kohonda' Allah totap hidup somanah-manahnyo.

Boboi'cam agatn musuh Kristus

¹⁸ Poana'anku! Joman ni'in am ari-ari toahir. Kaitn udah mondinga' obai Si Musuh Kristus paca'an datakng. Ongko watu ni'in banya' musuh Kristus udah ado. Ni'inam tandonyo, joman ninam ari-ari toahir.

¹⁹ Boko musuh Kristus nantai am boko urakng inyo udah koluar doi' kolompok kito. Apo, sobondarnyo sia' kinyo bobondar tomansu' kolompok kito inyo pocayo ko Yesus Kristus. Soandainyo sia' tomansu' kolompok kito, mungkitn sia' totap bosamo-samo agatn kito. Apo pas sia' moninggalan kito, hal nantai mombutian obai sia' somuo kinyo tomansu' kolompok kito.

²⁰ Apo kaitn udah monorima' Roh Allah doi' Sio Inyo Kudus. Nantai obainyo kaitn somuo mongotohu'i inyo bondar.

²¹ Aku monulis ni'in ko kaitn, bukainyo obai kaitn co mongotohu'i kobondaran, apo obai kaitn mongotohu'inyo. Obai kaitn pan mongotohu'i obai conyiant kotumbukan di dalapm ajaran inyo bondar nantai.

²² Sopo kironyo urakng inyo tumbukan nantai? Io nam urakng inyo bopandir obai Yesus bukainyo Rajo Inyo Dijanjian Allah, ia'an Kristus. Urakng inyo bopandir nantaiam musuh Kristus. Io monula' Allah Bopai huatan Yesus Kristus, Ana'-Nyo.

²³ Obai, urakng inyo monula' Ana', boroti urakng nantai kinyo hidup bosatu agatn Allah Bopai. Apo, urakng inyo monorima' Ana', boroti urakng nantai hidup bosatu agatn Bopai.

²⁴ Jadi, jangan kaitn tongga'an pocayo agatn ajaran inyo bondar, ia'an ajaran inyo udah kaitn dinga' doi' kaitn hoyu' mula'i pocayo. Aman kaitn molabuhan nantai, lalu kaitn paca'an hala hidup bosatu agatn Allah Bopai huatan Yesus Kristus, Ana'-Nyo.

²⁵ Ongko ninam inyo udah Sio janjian ko kito, ia'an hidup inyo somanah-manahnyo.

²⁶ Aku monulis somuo nantai ko kaitn oca' kaitn boboi' cam ko boko urakng inyo bousaha monipu kaitn agatn ajaran inyo salah.

²⁷ Apo kaitn udah monorima' Roh Allah doi' Yesus Kristus. Roh Allah totap ado di kaitn. Obai nantai, kaitn kinyo pontikng diajari urakng bukai. Roh Allahmo moajari kaitn mongona'i boko la'apo pan. Ajaran-Nyo bondar, kinyo tumbukan. Jadi, sosuai agatn lapo inyo Sio ajaran ko kaitn komai, kohonda'nyo kaitn totap hidup bosatu agatn Kristus.

Boko poana'an Allah hidup bondar di hadapan-Nyo

²⁸ Jadi, poana'anku! Kaitn gola' hidup bosatu agatn Kristus, oca' Sio datakng nononyo agi', kito co gola' huatan co malu mohadap Sio.

²⁹ Kaitn tohuam obai Kristus hidup bondar di hadapan Allah. Jadi, kaitn pan tohu obai sotiap urakng inyo hidup bondar nian ia'an ana' Allah.