1 Timotius 6 - Porjanjian Boharu Torjomahan Baso Dilakng Soari-ari

Nosihat Paulus mongona'i boko hulutn (6:1-2a)

¹ Somuo hulutn inyo pocayo ko Yesus gola' mohormati habakng sia'. Sia' gola' sama'an nian oca' urakng bukai co mohayam Allah kito huatan ajaran kito.

^2a Aman habakng sia' pan urakng pocayo, jangan jam habakng nantai kurakng dirogo'i. Habakng inyo bodapat untukng doi' pokoroja'an hulutn nantai ia'an urakng inyo pocayo huatan somadikan inyo gola'an dikasihi. Obai nantai, hulutn gola' lobih mohormati habakngnyo inyo udah pocayo.

Ajaran inyo kinyo bondar huatan urakng inyo kaha'-kolobu' agatn duit

^2b Timotius, kolai gola' mongajar huatan moonji'i somangant ko urakng inyo pocayo pakai' monaati somuo hal ni'in.

³ Sopo pan urakng inyo mongajar ajaran inyo kinyo bondar, ajaran sia' songkayo doi' ajaran Yesus Kristus, Tuhatn inyo bokuaso. Ajaran sia' nantai kinyo monulukng urakng pakai' hidup sosuai agatn kohonda' Allah.

⁴ Sia' buhau. Padohal, sia' co tohu la'apo pan, sia' bayo gala' botikakng mo. Sia' bayo gala' hala botikakng mongona'i roti boko sotilah. Jadi, ado banya' baba'an inyo kinyo boi': Sia' tungi. Sia' hala bokolohi. Sia' hala bojahat urakng. Sia' hala bopikir inyo bukai bulah kojahatan.

⁵ Sia' hala botikakng co nyiant kotuntukannyo. Pikiran sia' udah rusa' sampai sia' co ulih agi' monyongkayoan inyo salah huatan inyo bondar. Sia' bopikir, aman sia' molabuhan ajaran agama mondatakan kodampuan.

⁶ Apo, aman kito mooso tokosih agatn la'apo inyo ado di kito, molabuhan ajaran agama suba' mombaba' kountukan inyo sobondarnyo bosar.

⁷ Timpu kito lahir, kito co mombaba' la'apo pan ko dalapm dunia ni'in. Timpu kito mati, kito co paca'an mombaba' la'apo pan doi' dunia ni'in.

⁸ Obai nantai, kito gola' mooso tokosih aman kito udah ado pomakatn huatan pakai'an.

⁹ Apo ado boko urakng inyo honda' monjadi urakng dampu. Obai nantai, watu sia' dicubo'i, sia' bulah dosa. Samo sama'an urakng kona' joyat inyo tuyut kohonda' inyo budu huatan mombohayoan. Baba'annyo, hidup sia' monjadi rusa' huatan paca'an bonaso.

¹⁰ Jadi, kaha'-kolobu' agatn duit bulah urakng molabuhan somuo macapm kojahatan. Ado boko urakng inyo udah kaha'-kolobu' agatn duit. Obai nantai, sia' udah co pocayo agi' ko Yesus. Sia' bulah diri sia' siku' ajab sonsaro. Samo sama'an sia' monuhu' diri sia' siku' agatn sundakng.

Paulus moahiri suratnyo

¹¹ Apo kolai, Timotius, jangan molabuhan boko porbuatan inyo jahat sama'an nantai. Kolai polayatn Allah. Kolai gola' bousaha hidup bondar di hadapan Allah, hidup sosuai agatn kohonda' Allah, pagutn sotia ko Allah, huatan mongasihi urakng bukai, botahatn mohadapi ajab sonsaro, bosikap lomah-lombut.

¹² Samo sama'an urakng bouyuh-jorih dalapm potandikan, kolai pan gola' bouyuh-jorih oca' kolai pagutn pocayo lalu mondapat'an hidup inyo somanah-manahnyo di sorugo. Pakai' hal nantaiam kolai udah ditingkau huatan udah mongatoan di hadapan urakng banya' obai kolai pocayo ko Yesus.

¹³ Allah moonji'i hidup ko somuo hal. Kristus Yesus momandiran la'apo inyo bondar mongona'i diri-Nyo siku' timpu Sio diadili di hadapan Pontius Pilatus. Jadi, di hadapan Allah huatan Kristus Yesus aku monyiuh ko kolai:

¹⁴ Labuhancam porintah nantai agatn kotakng boi' sampai watu Yesus Kristus, Tuhatn kito bobali' datakng agi'.

¹⁵ Yesus paca'an bobali' datakng agi' pas watu inyo ditontuan Allah. Ongkah Allah inyo monguaso'i somuo hal huatan inyo cucu' dipuji. Sio nantai Rajo inyo monguaso'i somuo rajo bukai. Sio nantai Tuhatn di pucu' somuo habakng bukai.

¹⁶ Ongkah Sioam inyo co paca'an mati agi'. Sio nontapm dalapm cohayo inyo torakng. Cohayo nantai kotakan torakng sampai urakng co ulih mohampiki-Nyo. Co nyiant monsio di dunia ni'in inyo kalo moniant Sio. Monsio di dunia co mampu moniant Sio. Sio bokuaso huatan cucu' dihormati pakai' somanah-manahnyo! Amin.

¹⁷ Poringant'ancam ko boko urakng dampu di dunia ni'in oca' sia' jangan buhau huatan oca' jangan pocayo ko boko kodampuan sia' inyo kinyo ulih botahatn somanah-manahnyo. Apo sia' gola' pocayo ko Allah obai Sio onsi' agatn urakng. Sio moonji'i somuo hal oca' kito ulih mooso'i ponyaman.

¹⁸ Poringant'ancam sia' oca' sia' bulah koboi'an. Sia' gola' banya' molabuhan porbuatan boi'. Sia' gola' onsi' agatn urakng, hala bobagi doi' kodampuan sia' pakai' monulukng urakng bukai.

¹⁹ Aman sia' molabuhan somuo nantai, sia' paca'an mondapat'an kodampuan di sorugo. Kodampuan nantai pasti huatan kinyo paca'an rusa', samo sama'an rumah agatn pondasi inyo kuat co paca'an rusa'. Sia' gola' molabuhan somuo nantai oca' sia' mondapat'an hidup inyo somombondarannyo.

²⁰ Timotius, jagocam somuo inyo Allah onju' ko kolai. Jangan mondinga'an boko urakng inyo bopandir mongona'i boko hal inyo kinyo boonsu'an, boko hal inyo kinyo mohormati Allah. Jangan mondinga'an boko urakng inyo mongatoan obai sia' ado ‘pongotohuan’. Apo, sobondarnyo sia' molawatn ajaran inyo bondar.

²¹ Udah ado urakng inyo pocayo agatn ajaran sia' inyo kinyo bondar nantai. Jadi, sia' udah co pocayo agi' ko Yesus. Aku bodoa oca' Tuhatn monunju'an koboi'an-Nyo ko kaitn somuo.