1 Timotius 5 - Porjanjian Boharu Torjomahan Baso Dilakng Soari-ari

Nosihat ko Timotius pakai' momimpitn bomacapm kolompok urakng inyo pocayo Caro monosihat'i boko urakng agatn boi' (5:1-2)

¹ Aman kolai moolikan siku' urakng lolaki inyo lobih tuho doi' kolai, jangan kolai moolikannyo agatn koras. Apo momadahinyo socaro hormat samo sama'an kolai bopandir ko Bopai kolai siku'. Onji'i nosihat ko boko lolaki inyo lobih muda' doi' kolai samo sama'an adikng kolai siku'.

² Padahicam boko botina' inyo lobih tuho doi' kolai nantai samo sama'an indai kolai siku'. Ubo nian jam agatn botina' inyo lobih muda' doi' kolai, kolai gola' agatn hati inyo boi' moanggap sia' samo sama'an adikng kolai siku'.

Caro monulukng boko botina' balu (5:3-16)

³ Hormaticam boko botina' balu inyo co nyiant koluarganyo pakai' monulukng sia'.

⁴ Apo boko botina' balu inyo ado ana' cucunyo, gola' ditulukng boko ana' cucunyo siku'. Boko ana' cucunyo gola' bolajar caro hidup inyo monyonangan hati Allah agatn caro monulukng koluarga sia' siku', samo sama'an sia' dikobolo timpu sia' ija' kocit.

⁵ Siku' botina' balu inyo bondar-bondar gola' ditulukng doi' jomaat ia'an botina' balu inyo hidup sonsiku'an, co nyiant koluarga pakai' monulukng io. Io boharap ko Allah. Io bodoa siakng-malapm mominto potulukan doi' Allah.

⁶ Apo siku' urakng botina' balu inyo hidupnyo bayo monyonangan dirinyo siku', biar pan io ija' hidup sobondarnyo io udah mati socaro rohani.

⁷ Sampaiancam porintah nantai ko somuo urakng inyo pocayo oca' boko urakng bukai co ulih monyalahan caro hidup sia'.

⁸ Apo aman ado urakng inyo co monulukng boko koluarganyo apotolagi' kinyo monulukng koluarganyo siku' boroti io kinyo pocayo agi' ko Yesus. Io hidup agatn caro inyo lobih rusa' doi' urakng inyo bolupm pocayo.

⁹ Pulahcam daptar damo boko botina' balu inyo paca'an mondapat bantu'an doi' jomaat. Boko botina' balu nantai diharapan pakai' dilayati jomaat. Apo ado boboropo syarat: Sia' gola' boumur onam puluh tohutn ko pucu'. Sobolupm sia' monjadi botina' balu, sia' ongkah bolaki siku' mo.

¹⁰ Botina' balu nantai gola' dikonal sobagai urakng inyo hala bulah koboi'an. Contohnyo: io mombosaran poana'annyo agatn caro boi', io gola' agatn coraca'an bosodia moonji'i koluntukan, io gola' rondah hati molayati boko urakng pocayo huatan mombasu'i kaki sia', io gala' monulukng urakng inyo moalapi kosusahan. Io gola' moutamoan boko porbuatan boi' sama'an nantai dalapm kohidupannyo.

¹¹ Apo jangan moncatat damo boko botina' balu inyo ija' muda' dalapm daptar nantai. Obai aman sia' ado kohonda' bomporajoan agatn boko lolaki, lalu sia' paca'an bayo bopikir honda' bolaki agi'. Aman sama'an nian, sia' paca'an tongkolupatn janji sia' pakai' molayati Kristus.

¹² Jadi aman sia' tongkolupatn janji inyo potamo nantai pakai' molayati boko urakng pocayo, sia' paca'an dihakipi.

¹³ Solaitn nantai, boko botina' balu inyo ija' muda' biasonyo monjadi losa' bogota'-bokorojo. Sia' mombuakng-buakng watu koluar mansu' rumah boko urakng. Apotolagi', sia' gala' bocacai tumbukng. Sia' gala' sonjumpat'an urusan urakng bukai. Sia' bopandir boko hal sama'an nantai soharusnyo inyo kinyo boi' pakai' di kisahan.

¹⁴ Obai nianam, aku honda' somuo botina' balu ija' muda' bolaki agi'. Sia' gola' bolaki oca' ija' boana' lalu mourus rumah tanggo sia' masikng-masikng. Agatn caro nianam, boko urakng inyo molawatn kito, co nyiant ado alasan pakai' monjahai'an damo boko urakng inyo pocayo.

¹⁵ Porotian cam boko nosihat nantai, obai ado boboropo urakng botina' balu inyo ija' muda' udah tongga' am hidup monyonangan hati Allah lalu monyonangan Rajo Sitatn.

¹⁶ Boko botina' inyo pocayo gola' monulukng boko dongan somadikan sia' siku' inyo udah monjadi balu. Jadi, jomaat co nyiant bobatn monulukng boko botina' balu nantai inyo bondar-bondar pontikng ditulukng.

Tanggukng-jawab ko boko ponotua' (5:17-25)

¹⁷ Jomaat gola' bondar-bondar mohormati huatan monulukng kohidupan boko ponotua' inyo momimpitn agatn boi', hususnyo boko ponotua' inyo bohotbah ongko mongajar mongona'i Pomandiran Allah.

¹⁸ Obai ado totulis dalapm Buku Suci, “Jangan moirukng hidukng sapi inyo tongahan bokorojo moiri' gandupm. Huatan pan, urakng bokorojo bohak monorima' upah.”

¹⁹ Timotius, aman siku' ponotua' dituduh, jangan lansukng pocayo tuduhan nantai. Apo, tuduhan inyo ulih ditorima' aman ado duo urakng monjadi sasinyo, obai ponotua' nantai bondar-bondar bodosa.

²⁰ Sia' inyo bodosa gola' diolikan di hadapan jomaat. Kolai gola' moolikan sia' agatn caro nantai oca' somuo jomaat gola', lalu co honda' bulah dosa agi'.

²¹ Di hadapan Allah, Kristus Yesus, ongko boko molekat inyo dipilih Allah, aku momorintah kolai: turuticam boko porintah nantai ongko co momihak ko boko urakng totontu.

²² Jangan tolalu copat momilih urakng monjadi ponotua' lalu molota'an jari ko io pakai' monsahannyo. Aman ado urakng bukai bulah dosa, kolai pan jangan sonjumpat'an bulah dosa. Kolai gola' monjago diri oca' kolai hidup co bulah bodosa

^23-25 Boko dosa sobagi'an urakng paca'an copat kotohuan sobolupm io diuji. Apourakng inyo paca'an monjadi ponotua' gola' diuji obai boko dosa sobagi'an urakng bukai cukup manah sobolupm kotohuan. Sama'an nian jam, porbuatan boi'. Ado inyo lansukng kotohuan apo ado inyo kinyo kotohuan. Apo pogota'an boi' inyo kinyo samo-jatu' kotohuan, apo manah-komanahanyo paca'an kotohuan. (Bokona'an kolai hala podih porut huatan ponyakit bukainyo di bukakng-tubuh kolai jangan bayo minum ara'i modas, apo dicampur anggur sodikit).