1 Timotius 4 - Porjanjian Boharu Torjomahan Baso Dilakng Soari-ari

Paulus moharap'an Timotius pakai' totap momimpitn agatn boi'

¹ Ingantcam Roh Allah udah mongatoan agatn togas obai paca'an ado boko urakng inyo paca'an co pocayo agi' ko Yesus. Sia' paca'an pocayo ko boko urakng inyo mongajar boko ajaran inyo salah. Boko ajaran nantai doi' boko roh jahat.

² Boko urakng inyo mongajar boko ajaran nantai sobondarnyo sia' nantai boko urakng tumbukan, co nyiant hati sia'.

³ Boko urakng tumbukan nantai morarakng urakng pakai' kawitn. Sia' pan morarakng urakng pakai' makatn pomakatn totontu. Apo sobondarnyo Allah bulah somuo pomakatn oca' boko urakng inyo pocayo ajaran bondar monorima' pomakatn agatn oso sukur ko Sio.

⁴ Somuo inyo dipulah Allah nantai boi', tomansu' somuo pomakatn. Co nyiant pomakatn inyo pomali asal ditorima' agatn oso sukur ko Allah.

⁵ Obai somuo pomakatn dipulah monjadi suci agatn doa huatan pomandiran Allah.

⁶ Ajarancam boko hal nantai ko somuo urakng inyo pocayo. Aman ubo nian, kolai paca'an molayati Kristus Yesus agatn kotakng boi', kolai pan paca'an lobih kuat pocayo ko boko ajaran mongona'i kopocaya'an kito huatan dalapm ajaran inyo udah kolai jumpati somanah ni'in.

⁷ Apo jangan pondinga'an boko kisah sangan. Boko kisah sama'an nantai kinyo monulukng urakng oca' mohormati Allah. Kolai gola' hala bolatih oca' hidup sosuai agatn kohonda' Allah.

⁸ Ado porbaso: ‘Aman kito bolatih oca'’ bulah bukakng-tubuh kito lobih kuat, ongko gunonyo oca' kito hidup lobih boi' di dunia ni'in. Apo, aman kito bolatih oca' hidup sosuai agatn kohonda' Allah, ongko gunonyo kito kinyo bayo hidup lobih boi' di dunia ni'in, malah kito pan ulih hidup somanah-manahnyo di sorugo.

⁹ Porbaso nantai bondar. Soharusnyo somuo urakng pocayo hal nantai.

¹⁰ Pakai' hal nantai am kito bokorojo koras huatan bouyuh-jorih. Obai kito boharap ko Allah inyo hidup. Sio nam inyo monyolamant'an somuo monsio, hususnyo sia' inyo pocayo.

¹¹ Ajarancam somuo hal nantai ko jomaat. Siuhcam sia' pakai' monaati somuonyo.

¹² Jangan sampai ado urakng inyo mohayam kolai obai kolai ija' muda'. Kolai gola' monjadi contoh pakai' boko urakng pocayo, dalapm pomandiran huatan kolaku'an, dalapm mongasihi urakng bukai huatan sotia ko Tuhatn. Hidup co bulah dosa.

¹³ Kapikng monantian aku datakng, utamoancam boko hal ni'in dalapm polayatan kolai: Bacocam Buku Suci dalapm potomuan jomaat. Ajarancam boko ajaran inyo bondar. Padahicam huatan onji'i somangant ko sia' pakai' monaati somuonyo.

¹⁴ Ingantcam pado watu boko ponotua' molota'an jarinyo ko kopala' kolai. Pado watu nantai, ado inyo monyampaian posatn doi' Allah. Allah moonji'i komampuan husus ko kolai. Jangan botongga' monggunoan komampuan husus nantai.

¹⁵ Porotian somuo tugas inyo aku pandiran nantai. Labuhan somuonyo agatn rajitn. Agatn caro nantai somuo urakng moniant obai kolai somongkitn mampu mongajar huatan momimpitn agatn boi'.

¹⁶ Jagocam diri kolai oca' kolai hidup agatn caro inyo boi' huatan oca' kolai mongajar boko ajaran inyo bondar. Totap labuhan somuonyo nantai agatn sotia. Agatn caro nantai, Allah paca'an monyolamant'an kolai huatan monyolamant'an boko urakng inyo mondinga'an ajaran kolai.