1 Timotius 3 - Porjanjian Boharu Torjomahan Baso Dilakng Soari-ari

Posaratan pakai' boko ponotua'

¹ Pomandiran ni'in bondar, “Aman ado urakng inyo honda' monjadi ponotua' jomaat, memang urakng nantai mongohonda'i pokoroja'an inyo boi'.”

² Obai nantai, siku' urakng ponotua' gola' hidup agatn caro inyo boi'. Io gola' hidup bujur bondar oca' urakng bukai co ulih monyalahan io. Io co ulih bisi bini lobih doi' siku'. Io gola' ulih mongondalian dirinyo. Io gola' pintar-corodi' huatan sopatn. Io gola' agatn coraca'an moonji'i koluntukan. Io gola' mampu mongajar urakng agatn boi'.

³ Io co ulih jadi urakng pomabu'. Io co ulih jadi urakng inyo hala boporap apo gola' lomah-lombut. Io co ulih jadi urakng ponggodian. Io co ulih kaha' agatn duit.

⁴ Io gola' moatur koluarganyo agatn boi'. Io gola' mondidik poana'annyo sampai sia' monaati huatan mohormati io.

⁵ Obai aman io co sanggup momimpitn koluarganyo siku', pasti io co sanggup momimpitn jomaat Allah.

⁶ Watu momilih urakng pakai' monjadi ponotua', jangan momilih urakng inyo hoyu' pocayo ko Yesus. Mungkitn urakng inyo hoyu' pocayo sama'an nantai buhau. Aman io buhau, Allah paca'an mohukupm io samo sama'an Rajo Sitatn obai io pan buhau.

⁷ Siku' urakng ponotua' pan gola' di konal sobagai urakng boi' di antaro boko urakng inyo bolupm pocayo ko Yesus. Aman io co dikonal sobagai urakng boi', boko urakng paca'an mohayam io. Aman io dihayam, nantai samo sama'an Rajo Sitatn momasakng joyat pakai' io. Mungkitn nononyo io paca'an kona' joyat nantai. Rotinyo, mungkitn io paca'an bulah dosa.

Posaratan pakai' boko diakon

⁸ Samo sama'an ponotua', boko diakon gola' hidup agatn caro inyo boi'. Sia' gola' tohormat. Sia' gola' jadi urakng jujur. Sia' co ulih jadi urakng ongkah hala mabu'. Sia' co ulih kaha'-kolobu'.

⁹ Boko diakon gola' hidup monuruti hati nurani inyo suci pakai' hala pocayo ko ajaran inyo bondar mongona'i Yesus inyo udah dinyatoan Allah ko kito.

¹⁰ Sobolupm boko diakon diangkat, sia' gola' diuji. Aman sia' hidup agatn caro inyo bondar, hoyu' sia' ulih diangkat pakai' molayati boko urakng inyo pocayo.

¹¹ Ubo nian jam, bini boko diakon gola' hidup agatn caro inyo boi'. Sia' gola' tohormat. Sia' co ulih hala bojahat urakng. Sia' gola' mongondalian diri. Sia' pan gola' dapat dipocayo'i dalapm somuo hal.

¹² Siku' urakng diakon co ulih bobini lobih doi' siku'. Io gola' momimpitn boko poana'annyo agatn boi', somuo koluarganyo huatan somuo urakng inyo bodiapm di rumahnyo.

¹³ Obai urakng inyo molayati jomaat agatn boi' paca'an mongkitn dihormati. Sia' pan paca'an mongkitn borani momboritoan mongona'i kopocaya'an sia' ko Kristus Yesus.

Jomaat mondukukng ajaran inyo bondar doi' Allah

^14-15 Timotius, aku boharap ulih socopatnyo datakng ko kolai. Apo ado komungkitan aku paca'an tolambat datakng. Obai nantai, aku monulis surat ni'in ko kolai. Aku monulis oca' kolai mongotohu'i ubo apo soharusnyo kito hidup sobagai koluarga umputn Allah. Koluarga umputn Allah nantai boko urakng inyo pocayo ko Yesus, boko urakng inyo monjadi umputn Allah inyo hidup. Boko jomaat nantai samo sama'an tihakng ponontakan sobuah bangunan huatan samo sama'an batu pondasi inyo monjadi kodudu'an ajaran inyo bondar.

¹⁶ Sobondarnyo la'apo inyo tosimpatn dalapm kopocaya'an kito kotakan luar biaso! Boko hal nantai monunju'an caro hidup inyo monyonangan Allah. Boko hal nantai ia'an: “Yesus moniant'an diri-Nyo dalapm rupo monsio. Roh Allah monyatoan obai inyo dilabuhan Yesus bondar. Yesus monyatoan diri-Nyo ko boko molekat. Boko urakng momboritoan mongona'i Yesus ko somuo banso. Boko urakng di soluruh dunia monjadi pocayo ko Yesus. Allah bulah Yesus noi' ko sorugo dalapm komulia'an.”