1 Timotius 2 - Porjanjian Boharu Torjomahan Baso Dilakng Soari-ari

Paulus moonji'i nosihat oca' bodoa

¹ Aku monosihat'i kolai: Inyo kotakng pontikng ia'an doa. Bodoacam pakai' diri kolai siku' ongko pakai' urakng bukai. Moucap sukurcam ko Allah obai somuo urakng,

² tomansu' boko rajo huatan somuo pomimpitn. Bodoacam oca' timpu kito hidup taat ko Allah huatan bulah koboi'an ko somuo urakng, kito ulih hidup agatn tenang huatan sonang-asau.

³ Somuo doa sama'an nantai boi' ongko monyonangan hati Allah, Ponyolamant kito.

⁴ Obai Allah mongohonda'i oca' somuo urakng disolamant'an. Allah honda' somuo urakng mongotohu'i ajaran inyo bondar.

⁵ Obai, bayo siku' Allah inyo bondar. Bayo siku' Porontaro antaro Allah agatn somuo monsio, ia'an Kristus Yesus.

⁶ Yesus monyorahan diri sampai mati pakai' monanggukng hukupan dosa somuo urakng. Hal ni'in dibutian pas watu inyo ditontuan Allah.

⁷ Nianam Kabar Boi' inyo gola' aku boritoan. Nantaiam alasannyo aku diutus monjadi rasul pakai' momboritoannyo. Pomandiran aku ni'in bondar. Aku co bulah tumbukan. Aku dipilih pakai' mongajar boko urakng inyo bukainyo urakng Yahudi oca' sia' tohu la'apo inyo bondar mongona'i Yesus.

Ajaran mongona'i sombayakng pakai' lolaki ongko botina'

⁸ Obai nantai, ongko aku bohak momuhun ko somuo lolaki: Di mono aja' kaitn bokumpul, kaitn gola' bodoa. Apo bodoa agatn hati inyo borosih. Jangan monyimpatn ponggodi dalapm hati. Jangan bokonjahatan agatn urakng bukai.

⁹ Aku pan muhun ko somuo botina' pakai' bopakaian agatn caro inyo boi', sederhana, ongko sopatn. Jangan moatur rambut kaitn agatn caro inyo bolobihan. Jangan momakai pohiasan omas damo mutiara. Jangan momakai pakai'an inyo bokomahalan.

¹⁰ Apo caro inyo bondar bopakaian agatn bulah koboi'an. Caro nianam inyo soharusnyo dilabuhan somuo botina' inyo mongaku'i obai sia' monyombah Allah.

¹¹ Dalapm potomuan jomaat, somuo botina' gola' langunt pas pongajaran nantai disampaian. Sia' gola' mondinga' huatan monaati ajaran nantai.

¹² Aku co moijitan botina' pakai' mongajar. Somuo botina' co ulih momorintah boko lolaki. Sia' gola' langunt aman ado urakng inyo mongajar.

¹³ Obai Adapm inyo dipulah lobih doholu, lopas nantai hoyu' Hawa.

¹⁴ Solaitn nantai, bukainyo Adapm inyo ditipu ular. Hawa mo inyo ditipu sampai io bulah dosa.

¹⁵ Biar pan Hawa bodosa boko botina' ulih disolamant'an agatn molahiran ana'. Aman sia' hala pocayo ko Yesus, aman sia' mongasihi urakng bukai, huatan aman sia' hidup agatn caro inyo suci huatan ulih monjago dirinyo.