1 Timotius 1 - Porjanjian Boharu Torjomahan Baso Dilakng Soari-ari

Paulus monyampaian salapm ko Timotius

^1-2 Ko Timotius: inyo bondar-bondar sama'an ana'ku dalapm Yesus. Salapm doi' aku, Paulus. Kristus Yesus ongko Allah moutus aku monjadi rasul-Nyo pakai' momboritoan mongona'i Sio. Allah nanam Ponyolamant kito huatan Kristus Yesus tompat kito boharap. Aku bodoa oca' kasih karunia ongko sonang-asau doi' Allah, Bopai kito, huatan Tuhatn Yesus Kristus monyoroto'i kolai.

Poringant'an mongona'i boko ajaran sosat

³ Watu aku botula' ko propinsi Makedonia, aku totap minto oca' kolai totap bodiapm di kota Efesus. Aku mongohonda'i sama'an nantai pakai' kolai monosihat'i boko urakng totontu oca' sia' tongga' mongajaran boko ajaran inyo monyosat'an.

⁴ Huatan oca' sia' jangan tolalu borotian boko kisah sangan damo boko daptar koturutan inyo co nyiant kotuntukannyo. Boko ajaran sama'an nantai bayo bulah boko urakng bomparakan mulut huatan co nyiant gunonyo pakai' hajat Allah, inyo kito kotohu'i agatn pocayo ko Sio.

⁵ Aku moonji'i nosihat ni'in oca' boko urakng inyo pocayo hala mongasihi agatn hati inyo jujur, agatn saro hati pakai' bulah koboi'an, huatan bondar-bondar pocayo ko Yesus.

⁶ Apo boko urakng totontu kinyo hidup sama'an nantai agi'. Sia' sosat obai mula'i bopandir mongona'i boko hal inyo kinyo boguno.

⁷ Sia' honda' monjadi boko guru Hukupm Torat. Sia' mongajar ajaran sia' agatn ponuh pocayo diri. Apo sobondarnyo sia' kinyo mongoroti la'apo inyo sia' pandiran.

⁸ Somuo porintah huatan poraturan Allah inyo ditulis Musa dalapm buku Hukupm Torat nantai boi', asal dipakai sosuai huatan topat agatn inyo dimasud Allah.

⁹ Kito tohu obai Allah moonji'i Hukupm Torat bukainyo pakai' mongomboi'i caro hidup boko urakng inyo bondar. Apo Sio moonji'i Hukupm Torat pakai' mongomboi'i caro hidup boko urakng inyo hidup sokohonda'nyo siku' huatan tikakng-bongkakan, boko urakng inyo kinyo boagama huatan boko urakng hala gala' bulah dosa, boko urakng inyo kinyo honda' hidup suci huatan boko urakng inyo kinyo mongonal Sio, boko urakng inyo mombunuh urakng bukai, tomansu' boko urakng inyo mombunuh indai Bopai sia'.

¹⁰ Allah pan moonji'i Hukupm Torat pakai' mongomboi'i caro hidup boko urakng inyo tukakng bomporajoan, boko urakng bokohonda'an agatn sosamo lolaki, boko urakng inyo monjual hulutnnyo, boko urakng inyo monyampaian kosasian tumbukannyo dalapm sidakng di pongadilan, boko urakng bulah kotumbukan, huatan somuo urakng inyo bulah boko hal botontakan agatn ajaran inyo bondar.

¹¹ Ajaran inyo bondar nantai sosuai agatn Kabar Boi' doi' Allah inyo bokuaso huatan cucu' mondapat pujian. Sio inyo moonju' tanggukng-jawab ko aku pakai' momboritoan Kabar Boi' nantai.

Paulus bosukur obai koboi'an hati Yesus

¹² Aku bosukur ko Kristus Yesus, Tuhatn inyo bokuaso. Sio hala moonji'i kokuatan ko aku pakai' molayati Sio. Aku bosukur obai Sio moanggap aku sotia. Jadi Sio momilih aku pakai' momboritoan Kabar Boi' mongona'i Sio.

¹³ Padohal, komai aku ninam urakng inyo mohayam Sio. Aku mondorako'i somuo urakng inyo pocayo ko Sio. Boko porbuatanku nantai kotakan jahat. Apo Yesus monunju'an kasih-Nyo ko aku. Sio molabuhan nantai obai aku bolupm pocayo ko Sio. Aku bolupm mongotohu'i boko porbuatanku nantai kotakan jahat.

¹⁴ Apo Tuhatn kito kotakan momborokati aku agatn caro bulah aku monjadi pocayo agatn Sio huatan ulih mongasihi.

¹⁵ Pomandiran ni'in memang bondar huatan gola' dipocayo bobondar: Kristus Yesus udah datakng ko dunia ni'in pakai' monyolamant'an boko urakng bodosa. Di antaro boko urakng bodosa, aku ninam inyo kotakng jahat.

¹⁶ Apo malah nantaiam inyo monjadi alasan Yesus monunju'an kasih-Nyo ko aku, oca' Sio ulih monunju'an kosabaran-Nyo. Agatn ubo nian hal ni'in paca'an tojadi jam ko boko urakng bukai inyo nononyo pocayo ko Sio, huatan mondapat'an hidup somanah-manahnyo di sorugo.

¹⁷ Marabo kito mohormati ongko momuji kobosaran Allah sampai somanah-manahnyo! Sio nanam Rajo inyo momorintah somanah-manahnyo, Allah inyo kinyo ulih ditiat huatan kinyo paca'an kalo mati. Ongkah Sio nanam Allah! Amin.

Posatn ko Timotius

¹⁸ Timotius, kolai sama'an ana'ku siku'. Ingant watu komai ado inyo momadahan posatn doi' Allah mongona'i diri kolai. Ni'in aku monugasan kolai: Gunoan cam posatn nantai pakai' molawatn kojahatan huatan usahaancam inyo boi' agatn hala pocayo agatn hati nurani inyo suci.

¹⁹ Ado boko urakng inyo monula' saro hati sia' ongko ajaran inyo bondar. Baba'annyo, sia' kinyo bondar-bondar pocayo agi' agatn Yesus.

²⁰ Himeneus ongko Aleksander ado di antaro boko urakng sama'an nantai. Aku udah monyorahan sia' ko Rajo Sitatn agatn caro monundukng sia' doi' posokutuan urakng pocayo. Agatn sama'an nantai, sia' ulih bolajar botongga' mohayam Allah.