1 Tesalonika 5 - Porjanjian Boharu Torjomahan Baso Dilakng Soari-ari

Bososiapcam pakai' monantian kodatakan Yesus bobali' doi' sorugo

^1-2 Boko somadikan, koi kinyo pontikng monulis mongona'i watu Yesus paca'an bobali' obai kaitn udah mongotohu'i mongona'i nantai. Tuhatn paca'an datakng pasari kinyo disangko-sangko soumpamo pongolit inyo datakng watu ari malapm.

³ Paca'an ado boko urakng inyo mongatoan, “Somuonyo boi'-boi' mo.” Apo malahan watu nantai socaro sopongirap sia' paca'an dibonasoan samo sama'an siku' urakng botina' buntikan inyo socaro sopongirap moalapi mohidap-porut honda' boana'an. Botina' nantai co dapat moloukan doi' oso podih porut nantai. Ubo nian jam, sia' inyo co pocayo kinyo paca'an ulih moloukandoi' hukupan nantai.

^4-5 Boko urakng nantai kinyo bososiap samo sama'an boko urakng di dalapm potakng-hiru' inyo co tohu aman sia' paca'an didataki urakng pongolit. Apo, boko somadikan, kaitn kinyo samo sama'an sia'. Kaitn hidup di dalapm torakng watu ari siakng.

^6-7 Jadi, kito gola' bojago-jago huatan bososiap timpu Tuhatn datakng. Padohan hidup sama'an sia' inyo kinyo pocayo ko Yesus. Watu malapm, sia' ‘ado inyo tidu'’, ado jam inyo komabu'an sampai co bojago-jago huatan bososiap aman ado pongolit datakng.

⁸ Kito hidup di dalapm torakng. Obai nantai am, kito gola' bososiap agatn bojago-jago huatan molinduki diri. Kito gola' hala molinduki diri agatn totap hala pocayo ko Yesus, hala mongasihi, huatan bondar-bondar moharap'an Yesus inyo monyolamant'an kito. Boko hal nantai samo sama'an baju bosi huatan tokulu' bosi molinduki bukakng-tubuh siku' urakng projurit.

⁹ Kito gola' molabuhan nantai, obai Allah momilih kito oca' kito co kona' hukupan-Nyo. Sio momilih kito oca' kito disolamant'an molalu'i la'apo inyo dikorojoan Yesus Kristus, Tuhatn kito.

¹⁰ Sio udah mati pakai' monanggukng hukupan dosa kito. Pado watu Sio datakng agi', boi' kito ija' hidup damo pan udah mati, somuo kito inyo pocayo ko Sio paca'an hidup bosamo-samo agatn Sio.

¹¹ Obai nantai, gola' hala salikng moingant'an mongona'i ajaran nantai oca' hati kaitn masikng-masikng dikuatan. Gola' sosamo bontulukan oca' kopocaya'an kaitn ko Yesus monjadi lobih kuat. Memang kaitn tongahan molabuhan nantai jam.

Paulus moonji'i lobih banya' nosihat

¹² Boko somadikan, ado boko urakng inyo bokorojo koras pakai' molayati Tuhatn di antaro kaitn. Sia' momimpitn kaitn huatan momadahi kaitn oca' co bulah dosa. Sia' moingant'an kaitn oca' kaitn co bulah dosa. Koi muhun oca' kaitn morogo'i sia'.

¹³ Hormati huatan kasihicam sia' agatn somombondarannyo, obai moingant somuo hal inyo sia' labuhan. Koi pan muhun oca' kaitn somuo samo-samo hidup agatn damai.

¹⁴ Boko somadikan, koi pan momadahi kaitn oca' moolikan boko urakng inyo lola' bokorojo. Kuatan hati sia' inyo mooso gola'. Tulukngcam urakng inyo uyuh. Sabarcam tohadap somuo urakng.

¹⁵ Poniant'an oca' co nyiant di antaro kaitn inyo mombalas kojahatan agatn kojahatan. Sobali'nyo bousaha pakai' hala bulah koboi'an ko boko somadikan kaitn huatan ko somuo urakng.

¹⁶ Hala rindakng-rigahcam.

¹⁷ Hala bodoa.

¹⁸ Bosukurcam ko Allah dalapm somuo hal. Obai nantaiam kohonda' Allah pakai' kaitn di dalapm Kristus Yesus.

¹⁹ Jangan monongga'an Roh Allah doi' pokoroja'an-Nyo di antaro kaitn.

²⁰ Jangan moanggap gampakng boko posatn doi' Allah.

²¹ Apo ditoliti somuo hal apobai bondar-bondar doi' Allah kata'an cado. Kaitn gola' pocayo agatn boko hal inyo boi'.

²² Jangan molabuhan somuo macapm kojahatan.

Paulus moahiri suratnyo

²³ Ni'inan koi bodoa ko Allah inyo moonji'i kito sonang-asau huatan bulah kaitn mongkitn lobih suci dalapm somuo hal. Koi bodoa mudahan kinyo ado boko hal inyo jahat dalapm soluruh roh kolai, jiwa kolai huatan bukakng-tubuh kolai, timpu Yesus, Tuhatn kito nononyo datakng agi' ko dunia ni'in.

²⁴ Allah udah moningkau kaitn. Allah pan hala sotia momonuhi janji-Nyo. Obai nantai, pasti Sio paca'an moonji'i komampuan ko kaitn pakai' monjadi suci.

²⁵ Boko somadikan, tulukng doa'an koi jam.

²⁶ Sampaiancam salapm inyo ponuh kasih doi' koi ko somuo urakng inyo pocayo di santai.

²⁷ Aku minto ko kaitn dalapm kuaso Tuhatn Yesus oca' mombacoan surat ni'in ko somuo urakng inyo pocayo.

²⁸ Aku bodoa oca' Yesus Kristus, Tuhatn kito, hala monunju'an koboi'an-Nyo ko kaitn somuo.