1 Tesalonika 4 - Porjanjian Boharu Torjomahan Baso Dilakng Soari-ari

Caro hidup inyo monyonangan Allah

^1-2 Solanjutnyo, boko somadikan, komai watu koi bosamo agatn kaitn, koi udah mongajar kaitn. Koi mongajar kaitn mongona'i caro hidup inyo monyonangan Allah. Memang kaitn udah mula'i hidup agatn caro nantai. Kaitn udah mongotohu'i obai Tuhatn Yesus moonji'i kuaso ko koi pakai' mongajar sama'an nantai. Obai nantai, ni'in koi kinyo bayo mombaba' apo koi monyosahan kaitn: Hidup pakai' monyonangan Allah lobih somombondarannyo.

³ Ninam kohonda' Allah oca' hidup kito mongkitn suci. Rotinyo, co ulih molaki-mbini bolupm dipojadi.

⁴ Masikng-masikng kaitn gola' mongondalian kohonda' diri siku'. Kaitn gola' molabuhan nantai oca' hidup kaitn suci ongko kaitn dihormati urakng bukai.

⁵ Jangan biaran diri kaitn dikuaso'i hawa napsu sama'an boko urakng inyo kinyo mongonal Allah.

⁶ Dalapm hal ni'in, jangan jam bulah dosa ko somadikan bukainyo inyo pocayo ko Yesus. Jangan monggogadati io. Obai Tuhatn paca'an mohukupm boko urakng inyo bulah dosa sama'an nantai. Sokomai, koi udah kalo moingant'an kaitn agatn togas mongona'i hal nantai.

⁷ Allah kinyo moningkau kito pakai' hidup dalapm dosa molaki-mbini bolupm dipojadi. Sio moningkau kito oca' kito hidup mongkitn suci.

⁸ Jadi, aman ado di antaro kaitn inyo monula' ajaran ni'in, io kinyo monula' monsio apo io monula' Allah. Ingantcam! Allah jam inyo moonji'i Roh-Nyo inyo suci ko kaitn.

⁹ Ni'inan, mongona'i hal mongasihi boko somadikan bukai inyo pocayo ko Yesus. Koi kinyo pontikng monulis surat agi' mongona'i hal nantai obai Allah udah mongajar kaitn pakai' hala mongasihi.

¹⁰ Ruponyo kaitn udah mongasihi somuo urakng inyo pocayo di somuo propinsi Makedonia. Apo koi momadahi oca' kaitn mongkitn lobih mongasihi.

¹¹ Koi udah kalo momadahi kaitn mongona'i boko hal ni'in, apo ni'in koi moingant'an kaitn agi'. Bousahacam hidup damai agatn urakng bukai. Jangan sonjumpat'an urusan urakng bukai apo urus ja'am diri kaitn siku'. Rajitncam bokorojo pakai' momonuhi kopontikan kaitn masikng-masikng.

¹² Jadi, kaitn kinyo paca'an hidup bogantukng ko urakng bukai. Aman kaitn hidup agatn caro sama'an nantai, boko urakng inyo bolupm pocayo ko Yesus paca'an mohormati kaitn.

Tuhatn Yesus paca'an datakng agi' ko dunia ni'in

¹³ Boko somadikan, koi kotakng honda' oca' kaitn mongotohu'i mongona'i la'apo inyo paca'an tojadi ko boko urakng inyo pocayo lopas sia' mati. Koi co honda' kaitn bulikng samo sama'an boko urakng inyo kinyo pocayo ko Yesus. Sia' co nyiant pongharapan obai boko urakng inyo mati paca'an bobali' hidup.

¹⁴ Apo kito pocayo obai Yesus mati huatan udah bobali' hidup. Obai nantai, kito yakitn obai boko urakng pocayo ko Yesus inyo udah mati paca'an hidup agi' jam. Obai nantai, kito yakitn obai molalu'i Yesus, Allah paca'an mongumpulan boko urakng pocayo inyo udah mati bosamo-samo agatn Yesus.

¹⁵ Koi honda' monyampaian ko kaitn pomandiran ni'in doi' Tuhatn Yesus: boko urakng pocayo inyo ija' hidup watu Sio datakng paca'an botomu Yesus. Apo kito kinyo paca'an mondoholu'i sia' inyo udah mati.

¹⁶ Nononyo, paca'an ado saro borakng inyo moonji'i porintah. Pomimpitn molekat paca'an mondorah. Trompet Allah paca'an bobunyi. Tuhatn Yesus paca'an turutn doi' sorugo. Watu nantai, urakng inyo pocayo ko Kristus inyo udah mati paca'an lobih doholu bobali' hidup.

¹⁷ Lopas nantai, kito inyo ija' hidup paca'an diangkat ko pucu' awatn sosamo agatn sia'. Kito paca'an botomu Tuhatn di langit. Doi' watu nantai sampai somanah-manahnyo, kito paca'an bodiapm sosamo agatn Sio.

¹⁸ Obai nantai, gola' hala salikng moingant'an mongona'i ajaran nantai oca' hati kaitn masikng-masikng dikuatan.