1 Tesalonika 3 - Porjanjian Boharu Torjomahan Baso Dilakng Soari-ari

Paulus moutus Timotius botula' ko Tesalonika

¹ Koi co ulih agi' monahan oso togonang pakai' bobali' monjongu' kaitn. Jadi, somontaro koi totap tinggal di kota Atena,

² koi momutusan pakai' moutus somadikan koi, Timotius, ko kaitn. Timotius bokorojo samo agatn koi pakai' molayati Allah jam dalapm momboritoan Kabar Boi' mongona'i Kristus. Koi moutus io pakai' monguat'an hati kaitn oca' kaitn lobih kuat pocayo ko Yesus, huatan oca' io momadahi kaitn pakai' totap kuat timpu kaitn mohadapi ajab sonsaro.

³ Jadi kaitn co lomah somangant watu kaitn mohadapi ajab sonsaro. Kaitn siku' udah mongotohu'i obai ajab sonsaro nantai ia'an kohonda' Allah pakai' kito.

⁴ Komai, watu koi ija' bosamo agatn kaitn, koi udah opat momadahan obai kito inyo pocayo paca'an didorako'i sama'an nantai. Kaitn tohu pomandiran nantai bondar obai hal nantai udah tojadi.

⁵ Obai nantaiam aku gola' uti' Rajo Sitatn bohasil moncubo'i kaitn oca' co pocayo agi' ko Yesus. Soumpamonyo hal nantai tojadi, rotinyo somuo polayatan koi di antaro kaitn co nyiant pasalnyo. Aku co ulih monahan oso togonanganku agi', jadi aku moutus Timotius ko kaitn. Aku honda' mondinga' borito mongona'i kopocaya'an kaitn ko Yesus.

Timotius mombaba' kabar pas pulakng doi' Tesalonika

⁶ Ni'in Timotius udah pulakng doi' kaitn. Io mombaba' kabar inyo kotakan monyonangan. Io momadahan ko koi obai kaitn totap pocayo ko Yesus huatan totap mongasihi urakng bukai. Io mongisahan obai kaitn hala monggonang koi agatn boi'. Io pan momandiran obai kaitn kotakng rindu honda' botomu agi' agatn koi, samo jam sama'an koi rindu botomu agi' agatn kaitn.

⁷ Boko somadikan, koi ajab sonsaro di si'itn obai ado inyo mondorako'i koi. Apo lopas koi dapat kabar obai kaitn totap pocayo, hati koi monjadi sonang-nyaman.

⁸ Ni'inan koi hidup agatn sonang-nyaman obai kaitn ija' totap bodiritn kuat dalapm Tuhatn.

⁹ Obai nantai, koi kotakng rindakng-rigah. Jadi, watu koi bodoa di hadapan Allah, koi kotakng bosukur mongona'i kaitn.

¹⁰ Siakng-malapm koi somombondarnyo bodoa oca' koi ulih botomu agi' agatn kaitn huatan ulih moajaran boko hal inyo kaitn pontikan. Jadi, kaitn ulih pocayo ko Yesus agatn lobih kuat.

Paulus bodoa pakai' jomaat di Tesalonika

¹¹ Ni'inan koi bodoa ko Allah Bopai kito huatan ko Yesus, Tuhatn kito. Koi bodoa oca' Sio mombuka' jalatn ko koi pakai' monjongu' kaitn agi'.

¹² Koi pan bodoa oca' Tuhatn bulah kaitn hala mongasihi huatan kasih nantai mongkitn botambah-tambah sampai bokolobihan. Koi pan bodoa oca' Tuhatn bulah kaitn mongkitn mongasihi somuo urakng samo sama'an koi mongkitn mongasihi kaitn.

¹³ Koi bodoa oca' ni'inan Tuhatn monguat'an hati kaitn. Jadi, pas Yesus, Tuhatn kito agatn boko urakng suci umputn Sio, nononyo datakng, Allah Bopai kito moanggap kaitn kinyo bosalah huatan suci.