1 Tesalonika 2 - Porjanjian Boharu Torjomahan Baso Dilakng Soari-ari

Paulus monggonang timpu io molayati di Tesalonika

^1-2 Boko somadikan, kaitn udah tohu obai sobolupm koi monjongu' kaitn, koi momboritoan Kabar Boi' di kota Filipi. Watu nantai, koi dihanyam huatan di dorako'i. Apo Allah kito monulukng koi pakai' datakng ko kaitn pakai' momboritoan Kabar Boi' doi' Allah. Kaitn udah tohu kunjukan koi ko kaitn nantai kotakan bohasil.

³ Obai koi momboritoan Kabar Boi' inyo bondar. Co nyiant alasan inyo salah dalapm hati koi. Koi co moncubo ngontumbuki.

⁴ Apo sobali'nyo, koi momboritoan Kabar Boi' obai koi diutus Allah, obai Sio moanggap koi cucu' pakai' molabuhan polayatan nantai. Jadi, koi co bousaha monyonangan hati monsio. Koi bousaha monyonangan hati. Sio inyo mouji hati koi.

⁵ Kaitn udah tohu koi co kalo bopandir bayo pakai' nyaman kaitn dinga'. Koi pan co kalo bototapu' pakai' bogoyap duit. Jadi Allah pan tohu mo nantai.

⁶ Koi pan co kalo bogoyap pujian doi' monsio boi' doi' kaitn honda' pan doi' urakng bukai. Koi ado hak pakai' monuntut la'apo inyo koi pontikan doi' kaitn obai koi ni'in rasul Kristus.

⁷ Apo koi kinyo molabuhan nantai. Koi bosipat lomah-lombut di antaro kaitn. Samo sama'an siku' urakng indai morawat boko poana'annyo.

⁸ Koi kotakan mongasihi kaitn. Jadi, koi kotakan sonang momboritoan ko kaitn Kabar Boi' doi' Allah. Apo bukainyo bayo nantai. Koi pan kotakan sonang bulah la'apo aja' pakai' monulukng kaitn.

⁹ Boko somadikan, pasti kaitn ingant kotakng kuat koi bokorojo watu koi ado bosamo agatn kaitn di Tesalonika. Koi uyuh-jorih bokorojo siakng malapm pakai' momonuhi kopontikan koi siku'. Jadi, watu koi momboritoan Kabar Boi' doi' Allah, kaitn kinyo gola' momonuhi kopontikan koi.

¹⁰ Watu koi bosamo agatn kaitn inyo pocayo agatn Yesus, kaitn udah moniant agatn mato siku' caro hidup koi. Allah udah moniant jam. Koi hidup pakai' monyonangan Allah, co molabuhan kosalahan. Koi hala molabuhan inyo bondar.

¹¹ Kaitn tohu koi hidup di antaro kaitn samo sama'an Bopai mondidik poana'annyo agatn kasih.

¹² Koi hala momadahi ongko hala monguat'an hati kaitn huatan mominto oca' kaitn hidup monyonangan hati Allah. Obai Sio moningkau kaitn pakai' monjadi warga Korajaan-Nyo huatan bodapat komulia'an-Nyo.

Urakng inyo pocayo didorako'i

¹³ Koi hala bosukur ko Allah obai timpu koi momboritoan Kabar Boi' ko kaitn, kaitn pocayo nantai bondar-bondar doi' Allah huatan bukainyo doi' pikiran monsio. Kopocaya'an kaitn nantai pan udah morubah caro hidup kaitn.

¹⁴ Butinyo ia'an kaitn sonjumpat'an caro hidup inyo samo sama'an boko urakng inyo pocayo ko Kristus Yesus di doerah Yudea. Lopas kaitn monjadi pocayo, kaitn didorako'i boko urakng doi' banso kaitn siku'. Sama'an nantai jam, lopas boko urakng Yahudi di doerah Yudea monjadi pocayo, sia' didorako'i boko urakng doi' banso sia' sikuꞌ.

¹⁵ Ia'an, boko urakng Yahudi inyo molawatn Tuhatn Yesus sampai Sio dihukupm mati. Sia' jam inyo mombunuh boko nabi timpu joman komai huatan sia' jam mondorako'i koi. Sia' udah mombulah Allah kinyo sonang. Sia' jam momusuhi somuo urakng,

¹⁶ obai sia' bousaha monongga'an koi oca' co momboritoan Kabar Boi' ko urakng inyo bukainyo urakng Yahudi. Sia' kinyo honda' kaitn inyo bukainyo urakng Yahudi disolamant'an! Agatn boko porbuatan nantai, sia' torus-monorus monambah dosa sia' udah langkukng-lalu ongko. Ni'in, koponsuahannyo Allah pan godi. Pasti sia' paca'an dihukupm kotakng borat.

Paulus rindu honda' botomu agatn jomaat di Tesalonika

¹⁷ Boko somadikan, koi toposo moninggalan kaitn pakai' somontaro. Kaitn jouh di mato apo kinyo jouh di hati koi. Obai nantai koi kotakng togonang agatn kaitn, ongko koi udah boulakng kali bousaha koras pakai' ulih botomu agatn kaitn agi'.

¹⁸ Aku, Paulus, udah bousaha boboropo kali pakai' ulih monjongu' kaitn. Koi kotakng honda' bobali' apo Rajo Sitatn hala mohalaki koi.

¹⁹ Koi kotakan togonang honda' botomu kaitn obai kaitn bulah koi bangga huatan rindakng-rigah, timpu kodatakan Yesus.

²⁰ Somombondarannyo, kaitn bulah koi mooso bangga huatan rindakng-rigah.