1 Petrus 5 - Porjanjian Boharu Torjomahan Baso Dilakng Soari-ari

Caro hidup dalapm kolompok urakng inyo pocayo

¹ Ko somuo ponotua' jomaat di antaro kaitn aku moonju' nosihat ni'in: Aku ninam ponotua' inyo momimpitn kolompok urakng pocayo samo sama'an kaitn. Agatn matoku siku', aku udah moniant Kristus mondorita'. Huatan nononyo Kristus paca'an datakng lalu monunju'an obai Sionam inyo bokuaso. Timpu nantai, aku pan tuyut dapat komulia'an jam. Jadi, aku minto kotakng sangant:

² Kobolo cam boko domba Allah inyo ado di kaitn. Kaitn gola' momimpitn sia' agatn sonang hati sosuai agatn kohonda' Allah. Jangan mooso toposo. Layati sia' obai kaitn bondar-bondar monulukng, bukainyo obai kaitn honda' bogoyap untukng.

³ Jangan buhau botindak ubo rajo, tohadap sia' inyo dipocayo'i Allah pakai' kaitn. Apo, kaitn gola' monjadi toladatn sia'.

⁴ Lalu, watu Kristus datakng, ia'an Gombala inyo moirikan somuo gombala, jadi kaitn paca'an mondapat'an mahkota inyo mulia. Mahkota nantai kinyo hilakng komulia'annyo.

⁵ Ubo nian jam, kaitn inyo muda': Kaitn gola' tundu' ko boko urakng inyo lobih tuho. Kaitn somuo gola' rondah hati hala molayati inyo bukai. Obai, pomandiran ni'in udah totulis di Buku Suci: “Allah molawatn urakng inyo buhau. Apo Sio monunju'an koboi'an-Nyo ko urakng inyo boi' hati.”

⁶ Obai nantai, kaitn gola' tundu' ko Tuhatn inyo bokuaso. Agatn ubo nian, Sio paca'an bulah kaitn monjadi tohormat watu inyo ditontuan-Nyo.

⁷ Jangan bogonang mongona'i la'apo pan, apo bodoacam ko Tuhatn oca' Sio mourus somuo mosalah kaitn. Obai, Sio mongombolo kaitn.

⁸ Apo kaitn gola' hala mongondalian diri kaitn, huatan hala bojojago. Rajo Sitatn nan musuh kaitn. Sitatn honda' mohancuran kopocaya'an kaitn. Sitatn nan samo sama'an singa inyo mondorah, bojalatn kolilikng-kolimbat bogoyap urakng inyo ulih ditolatnnyo.

⁹ Jadi, kaitn gola' totap pocayo kokuat pakai' molawatn Rajo Sitatn nantai. Obai, kaitn tohu obai boko somadikan soiman di soluruh dunia mondorita' jam samo sama'an kaitn jam.

¹⁰ Apo, pondorita'an nantai sotogalmo. Allah siku' paca'an bulah hidup kaitn monjadi sompurna. Sio pasti mohibur kaitn huatan bulah kaitn botahatn. Sio pasti monulukng kaitn oca' kaitn ulih pocayo agatn kuat. Sio inyo hala monunju'an koboi'an-Nyo. Sio bokuaso pakai' somanah-manahnyo, huatan Sio udah moningkau kaitn oca' mondapat bagian doi' kuaso-Nyo nantai obai kaitn pocayo ko Kristus.

¹¹ Sionam inyo bokuaso sampai somanah-manahnyo! Amin!

Pomandiran toahir Petrus dalapm suratnyo

¹² Aku monulis surat singkat ni'in di tulukng Silas. Io nam somadikan, somadikan soiman inyo sotia. Aku monulis surat ni'in pakai' momadahi huatan moonji'i somangant ko kaitn. Aku pan honda' oca' kaitn yakitn obai isi suratku ni'in bondar-bondar mongona'i koboi'an Allah. Kaitn gola' totap hidup dalapm koboi'an-Nyo nantai.

¹³ Salapm ko kaitn doi' jomaat kota Babel, inyo pan dipilih Allah jam. Salapm jam doi' Markus, inyo ku anggap sama'an ana'ku siku'.

¹⁴ Kohonda'nyo kaitn hala monyampaian salapm kasih sobondarnyo ko boko somadikan inyo sosamo pocayo. Ko somuo kaitn inyo pocayo ko Kristus, aku bodoa oca' Sio hala moonji'i kaitn sonang-asau di dalapm polindukan-Nyo.