1 Petrus 4 - Porjanjian Boharu Torjomahan Baso Dilakng Soari-ari

¹ Obai Kristus udah mondorita' socaro jasmani, jadi kaitn pan gola' monguat'an diri kaitn agatn pikiran obai kaitn tajahan mondorita' samo sama'an Sio jam. Obai, urakng inyo mondorita' socaro jasmani, io udah botongga'am bulah dosa.

² Kaitn molabuhan nantai oca' somanah kaitn ija' hidup di dunia ni'in, kaitn co monuruti kohonda' dunia, apo kaitn monuruti kohonda' Allah.

³ Komainyo, kaitn udah cukup manah monuruti kohonda' dunia ubo urakng inyo co mongonal Allah, ia'an kaitn molabuhan porbuatan kinyo sonunuh. Kaitn momuasan kohonda' diri kaitn inyo jahat. Kaitn gala' komabu'an, bopesta pora, bopesta minuman koras. Kaitn molawatn porintah Allah agatn monyombah boko lompatukng.

⁴ Apo ni'in kaitn co hidup ubo nantai agi'. Boko urakng hiratn mapo kaitn co moikuti caro hidup sia' inyo bodosa. Obai nantaiam, sia' monjahai'-jahai'an kaitn.

⁵ Apo sia' tajahan dihakipi. Sia' gola' moaku'i somuo dosa sia' ko Sio inyo mohakipi urakng inyo hidup ongko urakng inyo mati.

⁶ Nantaiam sobabnyo Kabar Boi' udah diboritoan jam ko boko urakng mati. Ia'an, oca' sia' dihakipi dalapm bukakng-tubuh samo sama'an somuo monsio. Apo oca' Roh Allah dapat mohidupi sia' jam monuruti kohonda' Allah.

Hidup agatn caro oca' Allah dimuliaan

⁷ Boko somadikan ahir dunia ni'in udah dampikam. Obai nantai, kaitn gola' kondalian diri kaitn, ongko hala siap oca' kaitn ulih bodoa.

⁸ Inyo kotakan pontikng, kaitn gola' bobondar hala mongasihi. Obai, urakng inyo mongasihi ulih moamputi boko kosalahan.

⁹ Kaitn gola' hala monorima' urakng pocayo inyo bukai dalapm rumah kaitn siku'-monyiku' agatn sonang hati. Jangan mongoluh.

¹⁰ Allah udah monunju'an koboi'an-Nyo ko kaitn agatn moonji'i somuo kaitn komampuan husus inyo bobeda-beda. Jadi, gunoancam komampuan husus doi' Allah nantai agatn caro inyo boi', ia'an kaitn gola' monggunoan komampuan husus doi' Allah nantai oca' hala molayati urakng pocayo inyo bukai.

¹¹ Aman ado urakng inyo dionji'i komampuan pakai' bopandir, io gola' bopandir monyampaian Pomandiran Allah. Aman ado urakng inyo dionji'i komampuan pakai' molayati urakng bukai, io gola' molayati agatn kokuatan inyo Allah onju' ko io. Pakaicam somuo komampuan kaitn oca' urakng bukai momuliaan Allah obai Yesus Kristus inyo bulah somuo nantai dapat tojadi. Sionam inyo mulia ongko bokuaso somanah-manahnyo. Amin!

Jangan hiratn aman kaitn gola' mondorita' sobagai urakng Kristen

¹² Boko somadikan inyo tokasih! Kaitn moalapi pondorita'an pakai' mouji iman kaitn bobondar pocayo agatn Yesus kata'an cadoai. Jadi, jangan kaitn hiratn ubonyo ado sosuatu inyo luar biaso tojadi agatn kaitn.

¹³ Apo, soharusnyo kaitn sonang obai kaitn mondorita' samo ubo Kristus jam. Agatn ubo nantai, kaitn tajahan sonang jam nononyo watu Sio datakng lalu monyatoan obai Sio bokuaso.

¹⁴ Sonangcam kaitn aman urakng bukai momojah kaitn obai damo Kristus. Obai, nantai rotinyo Roh inyo bokuaso ado di kaitn, ia'an Roh Allah.

¹⁵ Jangannam ado di antaro kaitn inyo gola' mondorita' obai kaitn mombunuh urakng bukai, mongolit, bulah kojahatan damo bulah korusuhan.

¹⁶ Apo, aman kaitn mondorita' obai kaitn urakng Kristen, jangan kaitn malu mongona'i nantai apo momuliaan Allah ja'am.

¹⁷ Ni'in, udah tuntukam watu Allah mohakipi somuo urakng. Sio mula'i agatn kito, ia'an boko urakng husus umputn Sio siku'. Aman ubo nantai, lapo inyo tajahan tojadi ko boko urakng inyo co pocayo Kabar Boi' doi' Allah? Pasti sia' pan paca'an dihukupm.

¹⁸ Nantai sosuai agatn tulisan ni'in di dalapm Buku Suci, “Boko urakng inyo hidup bondar di hadapan Tuhatn pan, sia' uyuh mondapat kosolamant'an. Jadi, lapo inyo tajahan tojadi agatn boko urakng bodosa inyo molawatn Tuhatn?”

¹⁹ Obai nantai, aman boko urakng mondorita' obai nantai kohonda' Allah, jangan am sia' botongga' bulah koboi'an. Apo sia' gola' monyorahan diri ko Sio inyo mombulah sia'. Sio hala sotia monopat'i somuo janji-Nyo.