1 Petrus 3 - Porjanjian Boharu Torjomahan Baso Dilakng Soari-ari

Caro hidup urakng laki bini

¹ Ubo nian jam, kaitn boko bini: Kaitn gola' mohormati laki kaitn sobagai kopala' koluarga, biar pan laki kinyo monuruti Pomandiran Allah. Kaitn gola' molabuhan nantai oca' sia' dapat monjadi pocayo. Kaitn pompadohan mongatoan la'apo pan ko sia'.

² Sia' dapat pocayo aman sia' moniant porbuatan kaitn inyo tulus huatan kaitn mohormati sia'.

³ Jangan bayo bousaha mombulah diri kaitn lobih boi' doi' luar aja', umpamonyo moatur rambut kaitn agatn caro inyo bolobihan, momakai pohiasan omas, damo momakai boko pakai'an mahal.

⁴ Apo, bousaha pulah diri kaitn lobih boi' di dalapm hati, samo agatn hidup inyo lomah-lombut huatan tenang. Pomboi' ubo nian tahatn sampai somanahnyo huatan kotakng borogo di mato Allah.

⁵ Caro hidup nantai samo agatn caro hidup boko botina' doi' joman komai inyo monyombah Allah, ia'an boko botina' inyo boharap ko Allah. Sia' bulah diri sia' boi' agatn caro mohormati laki sia' sobagai kopala' koluarga.

⁶ Samo sama'an Sara. Io monaati lakinyo, Abrahapm, huatan moningkau io habakngnyo. Kaitn ulih dianggap poana'an Sara, aman kaitn bulah koboi'an huatan co mooso gola' agatn la'apo pan.

⁷ Ubo nian jam, kaitn boko laki: Caro hidup kaitn gola' pongorotian bosamo agatn bini. Obai, kaitn tohu bini lobih lomah doi' laki. Kaitn gola' mohormati bini obai Allah monunju'an koboi'an-Nyo ko sia' jam, ia'an sia' pan ulih mondapat hidup kokaldi sorugo. Kaitn gola' molabuhan nantai oca' conyiant ado la'apo pan inyo mohalaki doa kaitn.

Caro hidup inyo monyonangan Allah

⁸ Kosimpulannyo, kaitn somuo gola' bosatu dalapm hati huatan pikiran, hala mohibur inyo bukai, hala mongasihi agatn boi' hati ko boko somadikan kaitn inyo bukai, huatan jangan buhau.

⁹ Aman ado urakng inyo bulah kojahatan agatn kaitn, jangan mombalasnyo agatn kojahatan. Aman ado urakng inyo momojah kaitn, jangan mombalas agatn momojahnyo. Apo, kaitn gola' mondoa'an oca' Allah momborokati sia' inyo jahat ubo nantai. Obai, Allah moningkau kaitn oca'nyo mondapat'an borokat.

¹⁰ Nantai sosuai agatn pomandiran ni'in dalapm Buku Suci: “Urakng inyo honda' monikmati hidup inyo boi' ongko mooso sonang, io gola' monjago tutu'-mulutnyo oca' io kinyo momandiran inyo jahat ongko co bulah kotumbukan.

¹¹ Sia' gola' botongga' bulah kojahatan, lalu bulah koboi'an. Sia' gola' bousaha bobondar pakai' hidup damai agatn urakng bukai.

¹² Obai, Tuhatn sonang agatn boko urakng inyo hidup bondar di hadapan-Nyo. Tuhatn monimbas doa sia'. Apo mato muho Tuhatn molawatn boko urakng inyo bulah kojahatan.”

Urakng pocayo gola' tahatn mohadapi pondorita'an

¹³ Aman kaitn rajitn bulah koboi'an, co nyiant ado urakng inyo tajahan monyakiti kaitn!

¹⁴ Apo, mungkitn tajahan ado boko urakng inyo monyakiti kaitn obai kaitn bulah kobondaran di hadapan Allah. Aman ubo nian, kaitn tajahan diborokati. Jadi, jangan gola' agatn sia'. Jangan kuatir,

¹⁵ Apo dalapm hati kaitn hormaticam Kristus sobagai Tuhatn inyo bokuaso pakai' kaitn. Kaitn gola' hala siap monjolasan alasan kaitn boharap ko Kristus. Kaitn gola' monjolasan nantai ko sotiap urakng inyo botakutn mongona'i hal nantai.

¹⁶ Apo, timbas cam sia' agatn hormat, lomah-lombut, tulus hati di hadapan Allah. Kaitn gola' molabuhan nantai oca' watu boko urakng monjahai'an mongona'i porbuatan boi' kaitn dalapm Kristus, jadi sia' tajahan komaluan.

¹⁷ Lobih boi' kaitn mondorita' obai bulah koboi'an, aman nantai kohonda' Allah, daripado kaitn mondorita' obai bulah kojahatan.

¹⁸ Obai, Kristus udah mati sokali pakai' somuo dosa kito. Sio kinyo bodosa, apo Sio mati pakai' boko urakng inyo bodosa oca' Sio mombimbikng kito ko Allah. Sio inyo udah dibunuh dalapm koadaan-Nyo sobagai monsio, apo Roh Allah mombulah Sio hidup agi'.

¹⁹ Ongko dalapm koadaan Roh nantai pan, Sio labuh momboritoan kabar doi' Allah ko boko roh inyo di ponjara'an.

²⁰ Ia'an nantai, boko roh doi' boko urakng watu joman Nuh inyo mati molalu'i pasakng obai sia' kinyo taat ko Allah. Allah sabar agatn sia' somanah Nuh mombulah kapal bosarnyo nantai. Apo bayo boboropo urakng mo disolamant'an, ia'an nantai dolapatn urakng. Sia' disolamant'an molalu'i ara'i nantai.

²¹ Hal nantai monggambaran baptisan inyo watu ni'in monyolamant'an kaitn. Baptisan ni'in bukainyo upacara pakai' mombulah bukakng kaitn borosih doi' kotoran. Baptisan ia'an upacara pakai' momuhun ko Allah oca' Sio mombulah hati kaitn borosih. Baptisan nantai monyolamant'an kaitn obai Yesus Kristus udah hidup agi' doi' komatian,

²² noi' ko sorugo, lalu dudu' di tompat tohormat di sopia' kanan Allah. Allah mombulah Kristus bokuaso di pucu' somuo molekat ongko somuo inyo ado kokuatan huatan kokuasa'an.