1 Petrus 2 - Porjanjian Boharu Torjomahan Baso Dilakng Soari-ari

Somuo urakng pocayo samo sama'an bangunan huatan Yesus sobagai batu ponjuru

¹ Obai nantai, kaitn gola' botongga'cam molabuhan boko kojahatan. Jangan bulah kotumbukan monipu urakng bukai. Jangan pompadah boi' hati. Jangan tungi. Jangan mongonjaha'i urakng bukai.

^2-3 Aman kaitn bobondar udah moalapi obai Tuhatn nantai boi', jadi kaitn gola' ado kohonda' bolajar lobih dalapm mongona'i ajaran inyo bondar, ia'an Pomandiran Allah. Samo sama'an bobia' inyo hoyu' lahir honda'an susu inyo murni. Agatn ubo nian, kaitn tajahan tumbuh di dalapm Kristus ongko disolamant'an.

⁴ Jadi, datakng cam ko Tuhatn, Yesus Kristus. Sio samo sama'an batu inyo hidup. Sio nantai ditula' ulih boko urakng inyo moanggap Sio nantai kinyo pontikng. Apo Sio nantai dipilih Allah inyo moanggap Sio nantai kotakan borogo.

⁵ Kaitn pan samo sama'an boko batu inyo hidup, ia'an boko batu inyo digunoan pakai' bulah Rumah Allah inyo Rohani. Sio momilih kaitn pakai' monjadi samo sama'an boko imam inyo husus pakai' molayati Sio. Jadi, kaitn gola' mombaba' boko poonju' pakai' monyombah Allah, ia'an boko posombahan rohani inyo monyonangan hati Allah obai Yesus Kristus.

⁶ Somuo nantai samo sama'an inyo totulis di dalapm Buku Suci: “Porotiancam! Aku udah momilih batu inyo kotakan borogo. Aku molota'an batu nantai di Sion sobagai batu ponjuru. Urakng inyo pocayo agatn-Nyo, kinyo dipulah malu.”

⁷ Yesus Kristus kotakan borogo pakai' kaitn inyo pocayo. Sio samo sama'an Batu inyo pontikng. Apo pakai' urakng inyo kinyo pocayo bolaku samo sama'an inyo totulis di dalapm Buku Suci, “Ado Batu inyo dibuakan boko tukakng bangunan. Apo, Batu nantai udah monjadi Batu ponjuru.”

⁸ “Nantai am ‘Batu bulah sia' topanjur.’ Batu inyo bulah sia' tokorahap.” Sia' topanjur ko batu nantai obai sia' kinyo monaati Pomandiran Allah. Nantaiam inyo udah ditontuan Allah pakai' sia'.

⁹ Apo kaitn nam banso inyo dipilih Allah. Kaitn nam boko urakng inyo molayati Kristus, samo sama'an boko imam molayati rajo. Kaitn nam umant husus umputn Allah, boko urakng inyo ado hubukan agatn Allah siku'. Allah momilih kaitn oca' kaitn ulih momboritoan mongona'i somuo porbuatan bosar inyo Sio labuhan, ia'an Sio inyo moningkau kaitn koluar doi' kogolapan, lalu mansu' ko dalapm torakng-Nyo inyo luar biaso. Samo sama'an inyo totulis di dalapm Buku Suci,

¹⁰ Komai, kaitn bukainyo boko urakng umputn Allah. Apo ni'in kaitn udah monjadi boko urakng umputn-Nyo. Komai, Allah co monunju'an koboi'an-Nyo ko kaitn. Apo ni'in Allah udah monunju'an koboi'an-Nyo ko kaitn.

Urakng pocayo gola' tundu' ko somuo urakng inyo bokuaso ko sia'

¹¹ Boko somadikan inyo ku kasihi. Kaitn samo sama'an urakng asikng diapm somontaro mo di dunia ni'in. Jadi, aku bondar-bondar momuhun ko kaitn oca' jangan monuruti boko kohonda' bukakng-tubuh inyo jahat. Somuo kohonda' nantai boparakng molawatn hati kaitn.

¹² Kaitn gola' hidup agatn caro inyo boi' di antaro boko urakng inyo bolupm mongonal Allah. Agatn ubo nantai, biar pan sia' mongatoan kaitn jahat, sia' tajahan moniant porbuatan kaitn inyo boi'. Akibatnyo, sia' pan tajahan momuliaan Allah watu Sio datakng nononyo.

¹³ Obai Tuhatn, kaitn gola' monaati somuo urakng inyo bokuaso di dunia ni'in: Taat'i jam rajo inyo kotakan bokuaso.

¹⁴ Taat'i jam boko gubernur. Rajo momilih boko gubernur nantai pakai' mohukupm urakng inyo bulah kojahatan ongko mohormati urakng inyo bulah koboi'an.

¹⁵ Kaitn gola' monaati somuo pomimpitn nantai obai ni'inan kohonda' Allah. Ia'an, oca' kaitn bulah koboi'an lalu boko urakng budu kinyo bopandir la'apo pan pakai' monjahai'an kaitn.

¹⁶ Kohonda'nyo kaitn hidup sobagai urakng merdeka, apo jangannam momakai komordekaan nantai pakai' monutupi kojahatan, apo hidup cam sobagai hulutn Allah.

¹⁷ Hormati cam somuo urakng, kasihi cam boko somadikan kaitn inyo sosamo pocayo, gola' cam agatn Allah, ongko hormati jam rajo.

¹⁸ Ko boko urakng di antaro kaitn inyo polayatn: Kaitn gola' monaati agatn hormat ko habakng kaitn, bukatn inyo bayo ko habakng inyo boi' ongko onsi'. Apo aman habakng kaitn congkit, kaitn totap gola' monaati io.

¹⁹ Aman kaitn sadar obai kohonda' Allah, kaitn kuat monanggukng pondorita'an inyo kinyo cucu' kaitn tanggukng jadi Allah paca'an momborokati kaitn.

²⁰ Aman kaitn bulah kojahatan jadi kaitn dipoduda'an, ongko kaitn totap kuat mohadapi pondorita'an, nantai kinyo ado rotinyo. Apo, aman kaitn mondorita' obai kaitn bulah koboi'an, ongko kaitn totap kuat mohadapi pondorita'an nantai, jadi Allah tajahan momborokati kaitn.

²¹ Obai, Allah momilih kaitn pakai' nantai. Kristus siku' moonji'i contoh oca' kaitn moniru porbuatan-Nyo. Ia'an, Sio udah totap kuat mondorita' pakai' kaitn.

²² Apo, Sio siku' co kalo bulah dosa. Sio co kalo mongatoan la'apo pan pakai' mongontumbuki monsio.

²³ Pas urakng momojah sio, Sio co mombalas momojah sia'. Pas urakng monyisa Sio, Sio co moancapm. Apo Sio monyorahan pokaro-Nyo ko Allah inyo hala mohakipi agatn adil.

²⁴ Kristus siku' pan udah monanggukng hukupan dosa kito watu Sio mati di kayu salib. Sio molabuhan nantai oca' kito jangan bulah dosa agi', oca' kito dapat hidup agatn caro inyo bondar di hadapan Allah. Obai boko luko Kristus, kaitn monjadi nyamanam.

²⁵ Komai, kaitn samo sama'an domba inyo sosat. Apo ni'in kaitn udah tuyut Kristus. Sio samo sama'an gombala inyo molinduki jiwa kaitn.