1 Petrus 1 - Porjanjian Boharu Torjomahan Baso Dilakng Soari-ari

Salapm doi' Petrus

¹ Surat ni'in doi' aku, rasul Petrus, inyo diutus Yesus Kristus. Surat ni'in pakai' boko urakng inyo dipilih Allah inyo tongahan morantau di doerah Pontus, Galatia, Kapadokia, Asia Kocit huatan Bitinia.

² Allah, Bopai kito, momilih kaitn sosuai agatn roncana-Nyo. Roh Allah mombulah kaitn monjadi borosih doi' dosa oca' kaitn monaati Yesus Kristus. Allah molabuhan nantai jam oca' kaitn ulih monorima' hasil doi' darah Yesus Kristus inyo dicurahan ko kaitn watu Sio mati di kayu salib. Aku bodoa oca' Allah monunju'an koboi'an ongko moonji'i sonang-asau ko kaitn agatn bolimpah.

Urakng inyo pocayo ko Yesus dapat kosonangan obai sia' tajahan disolamant'an

³ Topujicam Allah, ia'an Bopai doi' Yesus Kristus, Tuhatn kito. Allah udah monunju'an koboi'an-Nyo inyo luar biaso ko kito agatn caro ni'in: Sio bulah Yesus Kristus hidup agi' doi' antaro urakng mati. Molalu'i nantai, Sio moonju' kohidupan boharu ko kito samo sama'an kito hoyu' lahir. Obai nantai, hal ni'in moonji'i kito pongharapan inyo kuat.

⁴ Ia'an kito ulih boharap agatn kuat obai kito paca'an monorima' borokat inyo Allah janjian. Borokat nantai disimpatn di sorugo pakai' kaitn. Borokat nantai tahatn bondar, kinyo tohu rusa', kinyo tohu buru', kinyo tohu kusap.

⁵ Obai kaitn pocayo ko Yesus, jadi Allah molinduki kaitn agatn kuaso-Nyo oca' kaitn ulih disolamant'an. Kosolamant'an kaitn nantai udah siap ditunju'an Allah watu ahir joman nononyo.

⁶ Sonangcam agatn hal nantai, biar pan somontaro watu ni'inan kaitn gola' monjadi salu' obai bomacapm-macapm poncoba'an.

⁷ Tujuan doi' somuo kosusahan nantai ia'an pakai' mombutian aman kaitn bondar-bondar pocayo ko Tuhatn kata'an cadoai. Kopocaya'an kaitn nantai lobih borogo daripado omas. Biar pan kinyo tahatn somanahnyo, omas pan diuji agatn api pakai' mombutian aman omas nian murni kata'an cado. Jadi, kopocaya'an kaitn pan diuji jam. Agatn ubo nantai, aman kaitn bobondar pocayo, nononyo kaitn tajahannyo dipuji, dimuliaan, ongko dihormati, nantai tajahannyo tojadi watu Yesus Kristus datakng agi' monyatoan diri-Nyo.

⁸ Kaitn bolupm kalo moniant Sio, apo kaitn totap mongasihi-Nyo. Watu ni'in, kaitn culih moniant Sio, apo kaitn totap pocayo ko Sio. Jadi, kaitn rindakng rigah ongko sonang-nyamanam inyo kotakan luar biaso sampai kinyo tokatoan.

⁹ Kaitn sonang sama'an nantai obai hidup kaitn udah disolamant'an. Nianam tujuan kaitn pocayo ko Yesus.

¹⁰ Boko nabi udah monyolidiki, mongona'i kosolamant'an nantai. Sia' udah momadahannyo doi' komai mo obai Allah tajahan monunju'an koboi'an-Nyo ko kaitn agatn caro monyolamant'an kaitn.

¹¹ Roh Kristus ado di dalapm sia'. Roh Kristus nantai momadahannyo ko sia' mongona'i pondorita'an inyo tajahan Kristus hadapi, apo lopas nian Sio tajahan dimuliaan. Jadi, boko nabi nantai monoliti ubo apo huatan sombilo kosolamant'an nantai paca'an tojadi.

¹² Allah momadahannyo ko sia' obai polayatan sia' nantai bukainyo pakai' sia' siku', apo pakai' kaitn. Ia'an, watu ni'in Kabar Boi' mongona'i kosolamant'an nantai udah diboritoan ko kaitn. Nantai tojadi obai Roh Allah inyo diutus doi' sorugo monyoroto'i boko urakng nantai pakai' momboritoan Kabar Boi' nantai. Boko molekat pan honda' mongotohu'i mongona'i Kabar Kosolamant'an nantai.

Urakng pocayo gola' hidup jouh doi' dosa

¹³ Obai somuo nantai, kaitn gola' bosiap-siap dalapm akal budi kaitn huatan hala mongondalian diri oca' monyonangan Tuhatn. Nononyo, Yesus Kristus tajahan datakng agi' monyatoan diri-Nyo. Timpu nantai, kaitn tajahan disolamant'an. Jadi, kaitn gola' bobondar boharap agatn koboi'an Allah nantai.

¹⁴ Kaitn gola' hidup monaati Allah. Jangan monuruti kohonda' kaitn siku', samo sama'an inyo kaitn labuhan sobolupm kaitn mongonal Tuhatn.

¹⁵ Apo, kaitn gola' hidup suci dalapm somuo hal inyo kaitn labuhan samo sama'an Sio inyo moningkau kaitn monjadi umant-Nyo ia'an suci.

¹⁶ Obai, ado pomandiran Allah inyo ditulis dalapm Buku Suci: “Obai nianam Aku suci, jadi kaitn pan gola' suci jam.”

¹⁷ Allah mohakipi somuo urakng sosuai agatn porbuatan sia' siku'-monyiku'. Sio kinyo momihak boko urakng totontu. Jadi, aman kaitn monyobut Sionam Bopai kaitn, jadi kaitn gola' hidup mohormati Sio, somanah kaitn monumpakng sobagai urakng asikng di dunia ni'in.

¹⁸ Kaitn udah ditobus-Nyo oca' kaitn dibebasan doi' caro hidup inyo sia-sia, ia'an caro hidup inyo angki-bayatn kaitn ajaran ko kaitn. Tobusan nantai dibayar bukainyo agatn barakng inyo mudah rusa' sama'an pira' damo omas.

¹⁹ Apo tobusan nantai dibayar agatn sosuatu inyo kotakan mahal, ia'an darah Kristus. Sio monjadi kurbatn inyo boi' pakai' mombayar hukupan dosa kito, samo sama'an ana' domba inyo kinyo bonoda huatan kinyo cacat.

²⁰ Allah udah momilih Sio sobolupm dunia dipulah. Apo, hoyu' ari toahir ni'in, Kristus udah datakng monyatoan diri-Nyo. Sio molabuhan nantai pakai' kaitn.

²¹ Ia'an, kaitn dapat monjadi pocayo ko Allah obai porbuatan Kristus nantai. Allah udah bulah Sio hidup agi' doi' antaro urakng mati lalu mombulah Sio monjadi mulia. Agatn ubo nantai, kaitn pocayo huatan boharap ko Allah.

²² Obai kaitn monaati kobondaran, kaitn udah monjadi suci di hadapan Allah. Jadi, kaitn dapat mongasihi somadikan kaitn inyo sosamo pocayo, agatn hati tulus. Obai nantai, kaitn gola' bobondar hala mongasihi agatn soponuh hati.

²³ Obai, kaitn dionji'i kohidupan boharu ibaratnyo kaitn lahir agi'. Kaitn dilahiran agi' bukainyo obai monsio inyo ulih mati apo obai kaitn pocayo agatn Pomandiran Allah mongona'i Kristus. Pomandiran Allah nantai hidup ongko botahatn sampai somanah-manahnyo.

²⁴ Ubo ni'inan inyo totulis di Buku Suci: “Somuo monsio inyo hidup samo sama'an rumput. Rumput nantai monjadi rangkai lalu mati. Somuo hal inyo bulah monsio hebat samo sama'an kombakng rumput, kombakng nantai jatu'.

²⁵ Apo, Pomandiran Tuhatn tahatn sampai somanah-manahnyo.” Boko somadikan, Pomandiran Tuhatn Allah nantai am Kabar Boi' inyo udah diboritoan ko kaitn.