1 Korintus 9 - Porjanjian Boharu Torjomahan Baso Dilakng Soari-ari

Paulus ado boko hak sobagai rasul apo io kinyo monggunoannyo

¹ Allah udah mombebasan aku. Malahan aku udah moniant Yesus, Tuhatn kito. Aku bondar-bondar rasul inyo diutus Tuhatn. Malahan, kaitn pan ia'an hasil pokoroja'an inyo ku labuhan bagi Tuhatn.

² Mungkitn ado urakng bukai inyo kinyo moaku'i aku sobagai rasul. Apo pasti kaitn moaku'i aku sobagai rasul. Obai, hidup kaitn di dalapm Tuhatn ia'an buti aku ni'inam rasul.

³ Ko boko urakng inyo honda' monakutan aman aku ni'in sobondarnyo rasul kata'an cado, aku honda' monimbasinyo:

⁴ Sobondarnyo koi bohak pakai' mondapat'an pomakatn huatan minum doi' boko urakng pocayo inyo koi layati.

⁵ Rasul Petrus, boko somadikan Tuhatn Yesus, huatan boko rasul bukai mombaba' bini sia' inyo pocayo dalapm pojalatan polayatan sia'. Tontunyo koi pan bohak molabuhan nantai!

⁶ Urakng bukai inyo molayati kaitn kinyo gola' bogoyap pogota'an bukai pakai' moncukupi kopontikan hidup. Jadi, sobondarnyo aku huatan Barnabas pan bohak pakai' mondapat'an ungkus hidup soari-ari doi' kaitn.

⁷ Porotian boko contoh ni'in: Co nyiant siku' urakng projurit inyo gola' mombayar gajihnyo siku'. Urakng inyo bokobutn anggur, bohak bopua' buah hasil kobutn nantai. Urakng inyo mongombolo domba bohak minum susu doi' boko dombanyo.

⁸ Aku momandiran boko hal nantai kinyo bayo obai mansu' akal pakai' somuo monsio. Apo buku Hukupm Torat pan momandiran mongona'i nantai.

⁹ Musa monulis porintah huatan poraturan Allah dalapm buku nantai. Ado porintah inyo ditulis di santai, “Jangan mongobat nyao sapi inyo tongahan bokorojo moiri' gandupm oca' sapi nantai ulih makatn.” Agatn moonji'i porintah nantai, pasti Allah kinyo bomasud mongona'i sapi nantai

¹⁰ Sio bomasud obai urakng inyo monobas lakau damo urakng inyo moiri' gandupm udah sopantasnyo bokorojo agatn harapan pakai' monorima' sobagi'an doi' hasil pokoroja'annyo.

¹¹ Jadi, aman koi udah monanam Kabar Boi' ko kaitn, aku pikir kinyo bolobihan aman koi boharap potulukan hidup doi' kaitn.

¹² Aman urakng bukai bohak mondapat'an kopontikan hidup nantai doi' kaitn, sobondarnyo koi lobih bohak agi' mondapat'an kopontikan hidup nantai doi' kaitn. Apo koi co kalo monuntut hak nantai. Koi totap monanggukng la'apo pan. Obai, koi co honda' bulah sosuatu inyo ulih mohalaki urakng mondinga' Kabar Boi' mongona'i Kristus.

¹³ Pasti kaitn tohu mongona'i porintah Allah. Boko urakng inyo bokorojo dalapm Rumah Allah, sia' bohak mondapat'an pomakatn doi' posombahan di Rumah Allah nantai. Boko imam inyo molayati di meja tompat momposombahan bonatakng, sia' pan bohak mondapat bagian doi' dagikng inyo diposombahan di pucu' meja nantai.

¹⁴ Samo sama'an nantai jam, Tuhatn Yesus udah bulah poraturan ni'in: Boko urakng inyo momboritoan Kabar Boi', sia' bohak mondapat'an kopontikan hidup doi' pokoroja'an nantai.

¹⁵ Apo aku co kalo monuntut hak nantai. Aku pan kinyo monulisan ni'in oca' kaitn mula'i moonji'i bantu'an ko aku. Lobih boi' aku mati daripado nantai. Co nyiant urakng inyo ulih mohilakan porasa'an bompangkakanku nantai.

¹⁶ Masudku, aku co bohak bompangkakan diri watu momboritoan Kabar Boi' doi' Allah. Obai, nantai inyo memang soharusnyo ku labuhan. Biar pan aku colako aman co momboritoan Kabar Boi' nantai.

¹⁷ Soumpamonyo aku momboritoan Kabar Boi' obai kohonda'ku siku', pasti aku bodapat upah. Apo sobondarnyo Allah inyo moutusku huatan mompocayoan tugas pakai' momboritoan Kabar Boi' nantai ko aku.

¹⁸ Jadi, la'apo upahku? Upahku ia'an aku dionji'i kosompatan pakai' momboritoan Kabar Boi' biar pan co nyiant bayaran! Nantaiam alasanku kinyo monuntut hakku pakai' mondapat'an kopontikan hidup doi' pokoroja'an nantai.

¹⁹ Sobondarnyo aku kinyo hulutn sopo pan. Apo aku bulah diriku monjadi hulutn somuo urakng. Aku molabuhan nantai oca' monulukng lobih banya' urakng sampai sia' pocayo ko Yesus.

²⁰ Masudku, aman aku bosamo agatn urakng Yahudi, aku hidup agatn caro urakng Yahudi. Aku molabuhan nantai oca' monulukng sia' pakai' pocayo ko Yesus. Aman aku bosamo agatn boko urakng inyo hidup monaati porintah huatan poraturan Allah inyo ditulis Musa dalapm buku Hukupm Torat, aku pan hidup monaati Hukupm Torat. Aku molabuhan nantai oca' monulukng sia' pakai' pocayo ko Yesus. Apo sobondarnyo aku bebas doi' tuntutan pakai' monaati Hukupm Torat.

²¹ Aman aku bosamo agatn boko urakng inyo hidup bebas doi' tuntutan pakai' monaati Hukupm Torat, aku pan hidup bebas doi' tuntutan monaati Hukupm Torat. Aku molabuhan nantai oca' monulukng sia' pakai' pocayo ko Yesus. Apo sobondarnyo aku kinyo bebas doi' monaati Porintah Allah. Aku sobondarannyo monaati Porintah Kristus.

²² Aman aku bosamo agatn boko urakng inyo lomah, aku hidup samo sama'an urakng inyo lomah. Aku molabuhan nantai oca' monulukng sia' pakai' pocayo ko Yesus lobih kuat. Pokoknyo, aku monyosuaian diri agatn caro hidup somuo urakng inyo aku layati. Aku molabuhan nantai oca' ado boboropo urakng di antaro sia' inyo disolamant'an.

²³ Aku hidup agatn somuo caro nantai oca' lobih banya' urakng monorima' Kabar Boi' nantai. Huatan oca' aku ulih monorima' somuo borokat inyo dijanjian dalapm Kabar Boi' nantai.

²⁴ Pasti kaitn tohu obai dalapm potandikan bolapat'an bonggidi'an, somuo sia' tuyut bonggidi'an. Apo bayo siku' inyo bodapat hadiah. Samo sama'an nantai, kaitn gola' bousaha hidup agatn caro inyo monyonangan Allah oca' bodapat hadiah inyo Allah onju'.

²⁵ Ubo nian jam, somuo urakng inyo tuyut dalapm potandikan gola' mongondalian diri dalapm somuo hal pakai' bolatih koras. Sia' molabuhan nantai pakai' mondapat'an hadiah. Hadiah sia' kinyo tahatn manah. Apo kito inyo pocayo mongondalian diri dalapm somuo hal oca' bodapat hadiah inyo kinyo paca'an rusa' somanah-manahnyo.

²⁶ Nantai sobabnyo, aku hidup bukainyo co nyiant tujuan. Aku co samo sama'an urakng inyo bonggidi'an co nyiant tujuan huatan aku co samo sama'an potinju inyo moninju angin.

²⁷ Apo aku molatih bukakng-tubuhku agatn koras. Aku mongondalian diriku. Aku molabuhan boko hal nantai oca' lopas momboritoan Kabar Boi' ko urakng bukai, jangan sampai aku malahan kinyo cucu' di hadapan Allah.