1 Korintus 8 - Porjanjian Boharu Torjomahan Baso Dilakng Soari-ari

Mongona'i bopua' dagikng bonatakng inyo diposombahan ko boko duato

¹ Ni'in mongona'i dagikng bonatakng inyo diposombahan ko boko duato. Ado boko urakng bopandir, “Somuo kito ado pongotohuan.” Apo aman siku' urakng ado ‘pongotohuan husus’, ongko urakng nantai jadi buhau. Sobondarnyo kito gola' mongasihi urakng bukai. Nantaiam caronyo kito bulah urakng bukai monjadi lobih kuat socaro rohani.

² Aman ado urakng inyo bopikir obai io ado ‘pongotohuan husus’, sobondarnyo urakng nantai bolupm mongotohu'i boko hal inyo soharusnyo io kotohu'i.

³ Apo urakng inyo mongasihi Allah, urakng nantai dikotohu'i Allah. Ongko urakng nantai bondar-bondar pintar-corodi'.

⁴ Nah, mongona'i potakutan ni'in: Ulih cado kito bopua' dagikng bonatakng inyo diposombahan ko boko duato? Kito tohu, “co nyiant boko duato di dunia ni'in inyo bondar-bondar hidup.” Kito pan tohu, “Bayo ado siku' mo Allah inyo bondar. Co nyiant am inyo bukai.”

⁵ Memang ado urakng inyo pocayo obai di bumi huatan di sorugo ado banya' boko duato huatan banya' tuhatn inyo sia' pocayo'i.

⁶ Apo pakai' kito, bayo ado siku' mo Allah, ia'an Allah Bopai kito. Sio inyo monjadian somuo hal. Kito hidup pakai' monyombah Sio. Pakai' kito, bayo ado siku' Tuhatn, ia'an Yesus Kristus. Somuo hal dipulah molalu'i Yesus Kristus. Kito bodapat hidup inyo sobondarannyo obai Yesus Kristus.

⁷ Apo ado boko urakng inyo bolupm mongotohu'i somuo nantai. Komainyo nantai sia' udah biaso momposombahan dagikng bonatakng ko boko duato. Biar pan watu ni'in udah pocayo ko Yesus, sia' ija' bopikir aman bopua' dagikng nantai boroti monyombah duato. Sampai ni'in hati sia' kurakng yakitn jadi sia' mooso bosalah aman sia' bopua' dagikng nantai.

⁸ Sobondarnyo, kito kinyo monjadi lobih boi' di hadapan Allah aman kito kinyo bopua' pomakatn totontu. Allah pan kinyo moanggap kito lobih boi' aman kito bopua' pomakatn totontu.

⁹ Jadi, kaitn memang bebas aman honda' makatn. Apo, ingant agatn kaitn co bulah sia' inyo kurakng yakitn nantai molabuhan kosalahan.

¹⁰ Misalnyo, aman ado urakng inyo hatinyo kurakng yakitn lopas nantai moniant kolai tongahan dudu' makatn di dalapm rumah adat, kolai paca'an bohiri'i io oca' jumpat makatn jam, io mooso hal nantai salah.

¹¹ Agatn ubo nantai ‘pongotohuan’ kaitn mongona'i nantai, bulah io molabuhan dosa, sampai io monjadi bonaso agatn caro nantai, kaitn bodosa tohadap io. Padohal, Kristus mati pakai' monyolamant'an io jam.

¹² Jadi, aman kaitn bodosa tohadap urakng bukai inyo pocayo apo hatinyo kurakng pocayo, nantai samo sama'an kaitn bodosa tohadap Kristus.

¹³ Obai nantai, aman la'apo inyo aku pua'i bulah salah siku' doi' sia' bodosa, aku co paca'an bopua' dagikng agi' soumur hidupku. Bolai'ku bulah urakng bukai inyo pocayo bodosa.