1 Korintus 7 - Porjanjian Boharu Torjomahan Baso Dilakng Soari-ari

Ajaran mongona'i urakng kawitn

¹ Watu ni'in aku honda' bopandir mongona'i masalah inyo kaitn sobut dalapm surat kaitn komai. Aman sikuꞌ urakng lolaki kinyo bobini, nantai boi',

² apo banya' urakng inyo culih monahan kohonda' pakai' bulah dosa bomporajoan. Obai nantai, lobih boi' aman sotiap lolaki bisi siku' bini huatan sotiap botina' bisi siku' urakng laki.

³ Siku' urakng lolaki wajib kopal-kumpul agatn bininyo. Jadi, io gola' molabuhan kowajiban nantai. Samo jam, bini gola' molabuhan kowajiban ko lakinyo.

⁴ Bini co bokuaso agatn bukakng-tubuhnyo sikuꞌ, inyo bokuaso agatn bukakng-tubuhnyo ia'an lakinyo. Ubo nian jam, lakinyo kinyo bokuaso agatn bukakng-tubuhnyo siku'; inyo bokuaso agatn bukakng-tubuhnyo ia'an bininyo.

⁵ Jangan hala monula' kohonda' pakai' bohubukan laki-bini. Kocuali ado houpm-kubo bosamo pakai' somontaro watu oca' ulih moutamoan doa. Apo lopas nantai sia' duo kopal-kumpul. Aman cado, Rajo Sitatn ulih moncubo'i kaitn oca' obai kaitn co ulih monahan kohonda' diri kaitn siku'.

⁶ Aku bomasud pakai' moonji'i ijitn. Apo nantai bukainyo porintah.

⁷ Sobondarnyo aku honda' oca' sotiap urakng samo sama'an aku. Apo sotiap urakng ado komampuan husus masikng-masikng doi' Allah. Inyo siku' ado komampuan husus ni'in. Inyo bukainyo ado jam komampuan husus inyo bukai.

⁸ Ko boko botina' balu huatan boko urakng bukai inyo kinyo kawitn, aku moonji'i nosihat ni'in: Lobih boi' kaitn totap cado kawitn, samo sama'an aku.

⁹ Apo, aman kaitn co ulih monahan kohonda' diri kaitn, lobih boi' kaitn kawitn. Obai, lobih boi' urakng kawitn daripado hala bokohonda'an apo co kalo mooso'i ponyaman.

¹⁰ Ko boko urakng inyo udah kawitn, aku moonji'i porintah ni'in sobondarnyo porintah ni'in kinyo bayo doi' aku, apo doi' Tuhatn Yesus siku': Siku' urakng bini co ulih saya' doi' lakinyo.

¹¹ Apo aman memang io saya', io co ulih kawitn agi'. Damo io gola' bobali' ko lakinyo. Porintah ni'in pan bolaku pakai' boko laki. Siku' urakng laki co ulih saya' agatn bininyo.

¹² Ko boko urakng bukai, aku moonji'i porintah ni'in - sobondarnyo porintah ni'in kinyo doi' Tuhatn Yesus, apo monurut aku palikng boi'. Porintah ni'in ko boko lolaki pocayo inyo bisi bini bolupm pocayo. Aman bini kaitn totap honda' hidup bosamo agatn kaitn, jangan monyaya'nyo.

¹³ Ubo nian jam ko boko botina' pocayo inyo bisi laki bolupm pocayo. Aman laki kaitn totap honda' hidup bosamo agatn kaitn, jangan monyaya'nyo.

¹⁴ Obai siku' urakng lolaki inyo bolupm pocayo udah monjadi umputn Allah obai bininyo pocayo. Ubo nian jam siku' urakng bini inyo bolupm pocayo udah monjadi umputn Allah obai lakinyo pocayo. Aman cado ubo nian, poana'an sia' pan co monjadi umputn Allah. Apo sobondarnyo poana'an sia' udah monjadi umputn Allah jam.

¹⁵ Apo mungkitn siku' urakng inyo bolupm pocayo honda' saya' agatn urakng inyo pocayo nantai. Aman ubo nian, biaram sia' saya'. Dalapm situasi nantai, urakng inyo pocayo kinyo tokobat agi'. Apo Allah moningkau kaitn oca' bousaha hidup agatn damai.

¹⁶ Obai co nyiant inyo tohu la'apo inyo paca'an tojadi. Hai boko bini, kaitn mungkitn ja'am bulah laki kaitn disolamant'an. Hai boko laki, kaitn mungkitn ja'am bulah bini kaitn disolamant'an.

Hidupcam dalapm koadaan inyo samo watu kaitn monjadi pocayo

¹⁷ Pokoknyo, ko somuo urakng pocayo aku monosihat'i: Hidupcam dalapm koadaan inyo samo watu kaitn ditingkau Allah monjadi umat-Nyo. Niannam koadaan inyo udah ditontuan Tuhatn pakai' kaitn. Aku moajaran porintah nantai di somuo jomaat.

¹⁸ Umpamonyo, aman ado urakng inyo udah disunant watu io ditingkau Allah, padohan urakng nantai bousaha mohilakan boko tando sunant nantai. Aman ado urakng inyo kinyo disunant watu io ditingkau Allah, jangan nam urakng nantai minto disunant.

¹⁹ Obai, aman kito disunant damo kinyo disunant, nantai kinyo pontikng. Inyo pontikng kito monaati boko porintah Allah.

²⁰ Sokali agi', aku mongatoan: Hidupcam dalapm koadaan inyo samo watu kaitn ditingkau Allah.

²¹ Contohnyo agi', aman kaitn siku' urakng hulutn watu kaitn ditingkau Allah, nantai kinyo mosalah mo. Apo memang, soumpamo kaitn bodapat kosompatan pakai' monjadi bebas, gunoan cam kosompatan nantai.

²² Obai, watu siku' urakng hulutn ditingkau Tuhatn, io monjadi siku' urakng bebas dalapm pomandakan Tuhatn. Ubo nian jam, watu siku' urakng bebas ditingkau, io monjadi siku' urakng hulutn inyo molayati Kristus.

²³ Sio udah momboli kaitn huatan mombayar lunas rogonyo. Obai nantai, jangan kaitn monjadi hulutn monsio.

²⁴ Sokali agi', Boko somadikan, aku momandiran ko kaitn: Hidupcam bosamo agatn Allah dalapm koadaan inyo samo watu kaitn ditingkau.

Nosihat mongona'i kawitn damo co kawitn

²⁵ Ni'inan, mongona'i boko urakng inyo bolupm kawitn. Aku co nyiant porintah doi' Tuhatn mongona'i nantai. Apo obai Sio monunju'an koboi'an-Nyo ko aku, ongko aku jadi urakng inyo ulih dipocayo moonji'i nosihat.

²⁶ Obai nantai watu ajab sonsaro paca'an hagar datakng, pondapatku ia'an sotiap urakngsoboi'nyo hidup dalapm Koadaannyo sokarakng ni'in.

²⁷ Masudku, aman siku' urakng lolaki udah kawitn, jangan io saya' agatn bininyo. Aman siku' urakng lolaki kinyo kawitn, jangan io bogoyap bini.

²⁸ Apo aman siku' urakng lolaki kawitn, nantai kinyo dosa. Ubo nian jam, aman siku' urakng botina' kawitn, nantai kinyo dosa. Apo boko urakng inyo kawitn paca'an moalapi banya' ajab sonsaro dalapm dunia ni'in. Kohonda'ku kaitn co moalapi boko ajab sonsaro sama'an nantai.

²⁹ Boko somadikan, masudku ubo ni'in: Co manah agi' watu ni'in paca'an boahir. Obai nantai, mula'i doi' ni'in sotiap urakng inyo bobini gola' bolaku ubo urakng kinyo bobini.

³⁰ Sotiap urakng inyo bulikng gola' bolaku ubo urakng inyo kinyo bulikng. Sotiap urakng inyo rindakng-rigah gola' bolaku ubo urakng inyo kinyo rindakng-rigah. Sotiap urakng inyo momboli sosuatu gola' bolaku ubonyo barakng nantai kinyo umputn io.

³¹ Jadi, sotiap urakng inyo bourusan agatn kodampuan la'apo ja' gola' bolaku ubonyo io co nyiant urusan agatn kodampuan dunia nantai. Obai, co manah agi' dunia inyo kito konal ni'in paca'an boahir.

³² Aku honda' oca' kaitn cado kuatir mongona'i la'apo pan. Siku' urakng lolaki inyo kinyo kawitn ulih borotian boko hal mongona'i Tuhatn, ia'an ubo apo caronyo io ulih monyonangan Tuhatn.

³³ Apo siku' urakng lolaki inyo kawitn gola' borotian mongona'i boko hal di dunia ni'in, ia'an ubo apo caronyo io ulih monyonangan bininyo.

³⁴ Ongko, pohatiannyo songkayo antaro koluarganyo agatn Tuhatn. Siku' urakng botina' inyo bolupm kalo kawitn damo co nyiant lakinyo agi', io ulih borotian boko hal mongona'i Tuhatn. Io honda' hidup husus pakai' Tuhatn, ia'an dalapm caro io monggunoan bukakng-tubuhnyo huatan dalapm pikirannyo. Apo siku' urakng botina' inyo kawitn gola' borotian mongona'i boko hal di dunia ni'in, ia'an ubo apo caronyo io ulih monyonangan lakinyo.

³⁵ Aku cado mongatoan somuo ni'in pakai' bulah pantakng-pomali ko kaitn. Aku bomasud pakai' monulukng kaitn oca' kaitn hidup agatn caro inyo boi', oca' kaitn ulih molayati Tuhatn agatn soboboi'nyo huatan co nyiant gangga'-gua'an la'apo pan.

³⁶ Mongona'i lolaki inyo tongahan botunangan. Mungkitn lolaki nantai bopikir aman io boulahan tunangannyo nantai agatn caro inyo salah. Aman lolaki nantai mooso kinyo molabuhan sopantasnyo ko tunangannyo damo aman tunangannyo nantai mungkitn tuho huatan io mooso pontikng bobini agatn tunangannyo nantai, lolaki nantai ulih am bobini. Hal nantai bilonyo dosa.

³⁷ Apo, aman siku' lolaki udah bulah koputusan di dalapm hatinyo pakai' co kawitn agatn tunangannyo, ongko io kinyo toposo momutusan hal nantai, huatan io ulih monahan napsunyo, jadi boi' aman io totap co kawitn.

³⁸ Jadi, urakng bukai inyo kawitn agatn tunangannyo bulah koboi'an. Apo urakng inyo kinyo kawitn agatn tunangannyo nantai bulah lobih boi' agi'.

³⁹ Mongona'i boko botina' balu agi'. Siku' urakng bini co ulih kawitn agatn urakng bukai somanah lakinyo ija' hidup. Apo aman lakinyo udah mati, botina' nantai uliham kawitn agi' agatn sopo ja' inyo io kohonda'i, asal urakng nantai pocayo ko Yesus.

⁴⁰ Apo pondapatku botina' balu nantai paca'an lobih sonang hidupnyo aman io kinyo kawitn agi'. Aku bopikir pondapatku nantai doi' Roh Allah inyo monyoroto'i aku jam.