1 Korintus 6 - Porjanjian Boharu Torjomahan Baso Dilakng Soari-ari

Jangan mongaduan somadikan di pongadilan umum

¹ Ado borito obai siku' urakng di antaro kaitn botikakng agatn somadikan bukai. Io cado monyolosaian pokaro nian di antaro jomaat. Apo io malah mombaba' pokaro nian oca' diadili ulih urakng inyo bukai umputn Allah huatan co hidup bondar di hadapan Allah. Jangan sampai io borani molabuhan nian!

² Kaitn gola' tohu obai boko urakng pocayo paca'an mohakipi dunia ni'in! Jadi kaitn tomansu' boko urakng inyo paca'an mohakipi dunia ni'in. Ongko, kaitn pan gola' mampu mohakipi boko pokaro kocit.

³ Kaitn gola' tohu obai kito paca'an mohakipi boko molekat. Ongko, kito pan gola' mampu mohakipi boko pokaro dalapm hidup ni'in.

⁴ Jadi, aman ado di antaro kaitn inyo bisi pokaro dalapm hidup ni'in, jangan kolai mombaba' pokaro nian ko boko urakng di luar jomaat!

⁵ Aku mongatoan sama'an ni'in oca' kaitn mooso malu. Pasti ado urakng di antaro kaitn inyo cukup pintar-corodi' pakai' bulah koputusan dalapm boko pokaro di antaro boko urakng pocayo.

⁶ Apo ado somadikan inyo mongaduan somadikan di hadapan boko urakng inyo co pocayo.

⁷ Jangan pan botula' bopokaro ko urakng inyo bukai umputn Allah, aman ado potikakan di antaro kaitn boroti kaitn udah gagal. Lobih boi' kaitn dipolakuan co adil damo dirugian.

⁸ Apo memang ado urakng di antaro kaitn inyo tumbukan huatan bulah kosalahan. Porbuatan nian lobih kinyo bondar agi' obai kaitn labuhan ko sosamo somadikan.

⁹ Kaitn gola' tohu boko urakng inyo co hidup bujur bondar di hadapan Allah, sia' co paca'an bodapat bagian dalapm Koraja'an Allah! Kaitn gola' sobondarannyo yakitn boko hal ni'in. Boko urakng inyo pombontina', boko urakng inyo monyombah lompatukng, boko urakng inyo bomporajoan, boko urakng inyo bokohonda'an agatn sosamo jonis,

¹⁰ boko urakng inyo mongolit, boko urakng inyo kaha', boko urakng inyo gala' mabu', boko urakng inyo gala' monjahai'an urakng bukai, boko urakng inyo morampas umputn urakng bukai. Somuo urakng sama'an nian pasti kinyo paca'an mondapat bagian dalapm Koraja'an Allah.

¹¹ Ija' komainyo ado boko urakng di antaro kaitn inyo hidup sama'an nian. Apo kaitn udah diborosihi doi' boko dosa. Kaitn udah monjadi umant husus umputn Allah. Kaitn udah dianggap bondar di hadapan Allah. Somuo nian tojadi obai kuaso Tuhatn Yesus Kristus huatan kuaso Roh Allah kito.

Jangan Bomporajoan

¹² Ado inyo bopikir, “Somuonyo ulih pakai' kito.” Apo ingant cam obai kinyo somuo hal boguno pakai' kito ubo nian jam pakai' urakng bukai. Jadi la'apo pan ulih mo pakai'ku, apo aku co honda' hidupku dikuaso'i la'apo pan di dunia ni'in.

¹³ Pomakatn dipulah pakai' moisi'i porut kito. Porut kito dipulah pakai' mooso'i pomakatn: Apo Allah paca'an mohancuran kododuonyo. Allah co bulah bukakng-tubuh kito pakai' bomporajoan. Bukakng-tubuh kito dipulah pakai' molabuhan boko hal inyo monyonangan Tuhatn Yesus. Tuhatn inyo monguaso'i bukakng-tubuh kito.

¹⁴ Allah udah mombulah Tuhatn Yesus bobali' hidup doi' komatian. Allah jam paca'an mombulah kito bobali' hidup agi' doi' komatian agatn kuaso-Nyo.

¹⁵ Co tohu bai kaitn aman bukakng-tubuh kito siku'-monyiku' samo sama'an anggota bukakng-tubuh Kristus. Obai kito anggota bukakng-tubuh Kristus, jadi kito culih monyorahan bukakng-tubuh kito ko lahukng!

¹⁶ Co tohu bai kaitn aman urakng inyo tidu' agatn lahukng monjadi sobukakng-sotubuh agatn io. Sama'an inyo totulis dalapm Buku Suci: “Koduo urakng nian monjadi sobukakng-sotubuh.”

¹⁷ Apo urakng inyo bosatu agatn Tuhatn Yesus, monjadi sobukakng-sotubuh agatn Sio dalapm roh.

¹⁸ Jadi, jangan sokali-kali bomporajoan. Somuo dosa inyo bukai tojadi di luar bukakng-tubuh urakng nian. Apo urakng inyo bomporajoan, bodosa tohadap bukakng-tubuhnyo siku'.

¹⁹ Co tohu bai kaitn aman bukakng-tubuh kaitn masikng-masikng samo sama'an rumah pakai' Roh Allah. Huatan Roh Allah udah moonji'i Roh-Nyo pakai' bodiapm dalapm kaitn. Rotinyo kaitn bukai umputn kaitn siku' agi'.

²⁰ Allah udah momboli kaitn huatan mombayarnyo lunas. Obai nantai, gunoan cam bukakng-tubuh kaitn pakai' moninggian Allah.