1 Korintus 5 - Porjanjian Boharu Torjomahan Baso Dilakng Soari-ari

Tindakan tohadap urakng pocayo inyo bomporajoan oca' io bobali' hidup monyonangan Tuhatn

¹ Aku mondinga' borito obai ado urakng di antaro kaitn inyo bomporajoan. Io pan molabuhan dosa bomporajoan inyo kotakng kotor bondar, ia'an momporajoan agatn indai tirinyo! Boko urakng inyo bolupm mongonal Allah pan co sampai bomporajoan agatn indai tiri sia'.

² Apo kaitn bopangkakng obai porbuatan urakng nantai! Soharusnyo kaitn salu', ongko mongoluaran io doi' antaro kaitn.

³ Sobab, biar pan bukakngku co nyiant bosamo kaitn, apo hatiku ado di antaro kaitn. Samo sama'an timpu aku ado bosamo kaitn, aku momutusan io gola' dihukupm.

⁴ Timpu kaitn bokumpul dalapm damo Yesus, Tuhatn kito, watu nantai jam, hati aku ado bosamo kaitn. Jadi, watu nantai, hukupmcam urakng nian agatn kuaso Yesus, Tuhatn kito.

⁵ Urakng nantai gola' disorahan ko Rajo Sitatn oca' bukakngnyo bonaso. Agatn ubo nian, watu Tuhatn bobali', jiwa urakng nantai paca'an disolamant'an.

⁶ Co boi' kaitn mooso buhau obai porbuatan urakng nantai. Pasti kaitn udah tohu obai sodikit ragi paca'an bulah somuo adonan roti mongombakng. Samo sama'an nian jam, dosa siku' urakng ulih bulah banya' urakng molabuhan dosa.

⁷ Jadi, kaitn gola' monundukng urakng inyo bodosa nian oca' dosa dijouhan doi' kaitn, obai udah soharusnyo dosa kinyo ado agi' di antaro kaitn. Sobab, Kristus udah monjadi sama'an domba inyo disombolih pado Ari Rayo Paskah.

⁸ Obai nantai, huncapm kito morayaan porbuatan Kristus nantai agatn caro ni'in: Jangan agi' hidup agatn hati inyo honda' bulah kojahatan ko urakng bukai. Huatan jangan bulah dosa. Apo hidup monjouhan diri doi' dosa. Huatan hidup sosuai agatn ajaran inyo bondar.

⁹ Aku kalo monulis surat ko kaitn. Dalapm surat nian, aku monyiuh oca' kaitn monjouhi urakng inyo bomporajoan.

¹⁰ Aku kinyo bomasud monyiuh kaitn monjouhi boko urakng inyo hidup agatn caro dunia inyo bolupm pocayo ko Yesus. Memang ado sia' inyo bomporajoan. Ado jam inyo kaha'. Ado jam inyo morampas. Ado jam inyo monyombah lompatukng. Co mungkitn kaitn monjouhan diri doi' somuo urakng nantai. Aman honda' monjouhan diri doi' somuo urakng bodosa, boroti kaitn gola' koluar doi' dunia ni'in.

¹¹ Apo ni'in aku monulis oca' kaitn co bokawal agatn urakng inyo mongaku' pocayo ko Yesus, apo io ija' bomporajoan, ija' kaha', ija' monyombah lompatukng, gala' bojahat urakng bukai, gala' komabu'an, huatan ija' morampas barakng urakng. Jangan sampai makatn pan bosamo urakng sama'an nian.

^12-13 Allah paca'an mohakipi boko urakng inyo bolupm pocayo ko Yesus. Jadi, nian bukai urusan aku. Apo kaitn gola' mohakipi urakng bukai dalapm jomaat. Sama'an inyo totulis di Buku Suci: “Tundukng ja' urakng jahat doi' antaro kaitn.”