1 Korintus 4 - Porjanjian Boharu Torjomahan Baso Dilakng Soari-ari

Ongkah Allah mo inyo bohak monilai boko urakng inyo molayati-Nyo

¹ Jadi, kaitn gola' borotian koi somuo agatn caro ni'in: Koi ninam boko polayatn Kristus. Koi ninam urakng inyo Allah pocayoam pakai' momboritoan roncana-Nyo inyo komai kinyo dikotohu'i monsio.

² Tugas utamo doi' polayatn Tuhatn ia'an sio gola' ulih dipocayo

³ Jadi, aku co poduli aman aku dinilai ulih kaitn damo boko urakng bukai. Damo aku co monilai diriku siku'.

⁴ Obai di dalapm hatiku aku co mooso bosalah. Apo nantai kinyo boroti aku co bosalah dihadapan Tuhatn. Ongkah Sio mo inyo bohak monilaiku.

⁵ Obai nianam, jangan kaitn monilai boko urakng bukai. Tantian sampai Yesus datakng. Sio paca'an monoraki la'apo inyo diombakan di dalapm potakng. Sio paca'an moniant'an somuo pikiran inyo ado dalapm hati sotiap urakng. Ongko, Allah inyo paca'an momuji sia' sosuai agatn polayatan sia' siku'-monyiku'.

Jangan buhau

⁶ Boko somadikan, boko pomandiran inyo aku tulis ni'in bolaku pakai' diri aku siku' huatan Apolos. Tujuannyo oca' doi' toladatn koi, kaitn ulih bolajar roti ungkap'an ni'in: “Jangan mombosar-bosaran apo inyo totulis.” Agatn sama'an nian, kinyo ado di antaro kaitn inyo paca'an bopangkakng agatn moutamoan sikuꞌ urakng di atas urakng bukai.

⁷ Co nyiant urakng di antaro kaitn inyo lobih pontikng daripado urakng bukai. Somuo inyo umputn kaitn dionju' Allah. Jadi jangan kaitn buhau ubonyo pongulihan kaitn siku' mo bukainyo doi' Tuhatn.

⁸ Kaitn bopikir kaitn kinyo pontikng apa'-apo agi'. Kaitn bopikir kaitn udah monjadi dampu. Kaitn botingkah sama'an kaitn udah monjadi boko rajo tanpa koi. Sonang bondar aman kaitn memang udah monjadi boko rajo. Ongko, koi pan ulih momorintah bosamo agatn kaitn.

⁹ Apo, monurut aku, Allah udah moonji'i koi boko rasul-Nyo kodudu'an inyo kotakng babah. Sio bulah koi monjadi samo sama'an boko urakng inyo dibaba' koluar pakai' dihukupm mati. Obai koi diporotian urakng disoluruh dunia, ia'an somuo monsio huatan somuo molekat.

¹⁰ Sama'annyo koi budu obai koi molayati Kristus. Apo kaitn bokopintar-corodi'an obai kaitn pocayo ko Kristus. Koi lomah. Apo, kaitn kuat. Koi kinyo cucu' dihormati. Apo kaitn tohormat.

¹¹ Malahan sampai watu ni'in, koi kolaparan ongko korahakan. Pakai'an inyo koi kona'an udah buru'am. Koi hala dipoduda'an. Koi co nyiant kodiapan obai hala bojalatn konuang-konaing momboritoan Kabar Boi'.

¹² Koi bokorojo koras agatn longan koi siku' monuntukan kopontikan hidup koi. Timpu koi dikutu' boko urakng, koi totap momborokati sia'. Timpu koi didorako'i koi totap tahatn sabar mohadapinyo.

¹³ Timpu boko urakng bopandir monjahai'an koi, koi totap bopandir boi' ko sia'. Sampai ni'in pan, koi monjadi sampah dunia, inyo dibuakan ja'am.

¹⁴ Aku monulis boko hal kinyo pakai' bulah kaitn malu, apo aku honda' monogur kaitn samo sama'an boko ana'ku inyo ku kidah.

¹⁵ Biar pan kaitn ado boribuan urakng inyo mombimbikng kaitn pakai' jumpat Kristus, apo co nyiant urakng inyo samo sama'an Bopai kaitn. Ongkah aku inyo monjadi Bopai kaitn obai aku ninam urakng potamo inyo momboritoan ko kaitn Kabar Boi' mongona'i Kristus Yesus.

¹⁶ Obai nantai, aku monosihat'i kaitn: Tirucam toladatnku.

¹⁷ Aku moutus Timotius ko kaitn oca' monulukng kaitn monuruti toladatnku. Io sama'an ana' inyo kokidahku. Io jam sotia monulukngku molayati Tuhatn. Io paca'an moingant'an kaitn mongona'i caroku hidup dibabah kuaso Kristus Yesus. Caro hidup nantai samo sama'an la'apo inyo udah kuajaran disotiap jomaat di mono-mono.

¹⁸ Ado boboropo urakng di antaro kaitn inyo mongiro obai aku co paca'an datakng agi'. Obai nantai, sia' monjadi buhau.

¹⁹ Apo aman Tuhatn mongohonda'i, aku paca'an copat datakng ko kaitn. Watu nantai, aku co paca'an borotian pomandiran boko urakng inyo buhau nantai. Aku honda' moniant aman sia' bondar-bondar ado kuaso Allah dalapm hidup sia'.

²⁰ Obai Koraja'an Allah kinyo mongona'i momakai pomandiran apo mongona'i kuaso.

²¹ Watu aku datakng, kaitn honda' la'apo? Honda' aku datakng agatn mombaba' ponyipat? Kata'an kaitn honda' aku datakng agatn lomah-lombut monunju'an aku mongasihi kaitn?