1 Korintus 3 - Porjanjian Boharu Torjomahan Baso Dilakng Soari-ari

Somuo polayatn Allah gola' sotujuan

¹ Boko somadikan, timpu aku bosamo kaitn, aku kinyo ulih mongajar kaitn sama'an boko urakng inyo dikuaso'i Roh Allah. Aku gola' mongajar kaitn sama'an boko urakng inyo hidup socaro monsio. Obai watu nantai kaitn samo sama'an boko ija' bobia' dalapm Kristus

² Aku mongajar kaitn samo sama'an urakng tuho inyo moonji'i ana'nyo susu bukainyo pomakatn korikng. Aku mongajar kaitn sama'an nantai, obai kaitn bolupm siap. Huatan sampai watu ni'in kaitn pan bolupm siap,

³ obai kaitn ija' hidup samo sama'an monsio dunia! Kaitn ija' tungi-dongkian siku'-monyiku'. Kaitn ija' ado posolisihan siku'-monyiku'. Boko hal nantai monunju'an obai kaitn ija' hidup samo samaꞌan monsio dunia.

⁴ Pomandiran kaitn mombutian obai kaitn ija' hidup sama'an boko urakng dunia. Obai, di antaro kaitn ado inyo mongatoan, “Aku urakng doi' kolompok Paulus.” Inyo bukai bopandir, “Aku urakng doi' kolompok Apolos.”

⁵ Porotiancam! Apobai Apolos pontikng? cado! Apobai Paulus pontikng? cado jam! Koi duo cumo polayatn dibabah kuaso Tuhatn pakai' monulukng kaitn pocayo ko Sio. Koi ongkah molabuhan pokoroja'an inyo Tuhatn onju' ko koi siku'-monyiku'.

^6-9a Kaitn jomaat Korintus sama'an halnyo lakau umputn Allah. Aku samo sama'an urakng inyo monanam kabar boi' ko kaitn, sodakan Apolos samo sama'an urakng inyo monyirapm. Urakng inyo monanam huatan urakng inyo monyirapm kinyo pontikng. Inyo pontikng ia'an Allah, obai Sio inyo mombulah kaitn botumbuh. Obai nantai, koi duo samo-samo bokorojo pakai' Sio. Koi paca'an monorima' upah sosuai agatn pokoroja'an koi siku'-monyiku'.

Jangan sonjumpat'an ajaran inyo kinyo bondar

^9b Kaitn pan ulih disamoan agatn bangunan umputn Allah.

¹⁰ Obai koboi'an Allah ko aku, Sio mombulah aku monjadi samo sama'an sikuꞌ tukakng bangunan inyo pandai. Aku inyo molota'an pondasi bangunan nantai, sodakan watu ni'in ado urakng bukai inyo mombangun di pucu' pondasi nantai. Apo sotiap urakng nantai gola' gogamant agatn caro io mombangun.

¹¹ Obai, pondasi kaitn ia'an Yesus Kristus. Nantaiam pondasi inyo dilota'an. Co nyiant urakng inyo ulih bulah pondasi inyo bukai.

¹² Lopas nian, ado boko urakng mombangun ajaran dipucu' pondasi nantai. Ado inyo monggunoan omas, pira', huatan batu borogo, ado jam inyo monggunoan kayu, rumput, ongko kompilai

¹³ Pokoroja'an somuo urakng nantai paca'an diuji agatn api pado ari ponghakipan. Pado watu nantai paca'an dikotohu'i agatn jolas apobai hasil pokoroja'an sotiap urakng nantai boi' damo cado.

¹⁴ Aman bangunan inyo ditinjakan urakng di pucu' pondasi nantai tahatn dicucul api, urakng nantai paca'an monorima' hadiahnyo.

¹⁵ Apo aman bangunan urakng nantai kocuculan, io paca'an ajab sonsaro. Io sikuꞌ paca'an solamant, apo sama'an urakng inyo lulus bojalatn di api.

¹⁶ Inyo gola' kaitn kotohu'i kaitn samo sama'an Rumah Allah huatan Roh Allah bodiapm di antaro kaitn somuo.

¹⁷ Nantai tompat kodiapan husus umputn Allah. Obai nantai, aman ado urakng inyo mombonasoan Rumah Allah nantai, Allah paca'an mombonasoan io. Kaitn somuo ia'an Rumah Allah nantai.

¹⁸ Jangan sampai ado urakng inyo ngontumbuki dirinyo siku' mongona'i kopintar-corodi'an monsio. Aman ado urakng inyo moanggap dirinyo pintar-corodi' socaro dunia, urakng nantai gola' moanggap hal nantai budu. Io gola' molabuhan nantai oca' io bondar-bondar monjadi pintar-corodi'.

¹⁹ Obai Allah moanggap kopintar-corodi'an monsio kinyo ado rotinyo. Hal nantai udah totulis di dalapm Buku Suci: “Ado boko urakng inyo moanggap diri sia' pintar-corodi'. Apo Allah momakai pomikiran sia' siku' pakai' mongalahan sia'.”

²⁰ Ado jam totulis: “Tuhatn mongotohu'i pikiran boko urakng inyo pintar-corodi'. Sobondarnyo kopintar-corodi'an sia' somuonyo co nyiant rotinyo.”

^21-22 Obai nantai, jangan hala bopangkakng sobagai urakng doi' kolompok aku, damo Apolos damo Petrus. Obai somuonyo umputn kaitn! Dunia umputn kaitn. Aman kaitn hidup damo mati, boko hal inyo tojadi ni'in damo nononyo, somuonyo umputn kaitn!

²³ Apo somuo kaitn umputn Kristus. Huatan Sio pan umputn Allah.