1 Korintus 2 - Porjanjian Boharu Torjomahan Baso Dilakng Soari-ari

Caro Paulus momboritoan Kabar Boi' monunju'an Kuaso Allah

¹ Boko somadikan, aku bulah sama'an nantai jam timpu aku datakng ko kaitn. Aku kinyo momakai boko kato-pandir inyo hebat pakai' momboritoan mongona'i hajat Allah inyo komai kinyo dikotohu'i monsio. Aku pan kinyo momakai kopintar-corodi'an monsio timpu nantai.

² Obai, aku jadi bulah koputusan bayo pakai' momboritoan mongona'i Yesus. Ia'an pan aku momboritoan obai Yesus ia'an Rajo Inyo Dijanjian Allah inyo disobut Kristus, huatan Sio mati di kayu salib. Aku co honda' momboritoan ko kaitn mongona'i boko hal inyo bukai.

³ Somanahan aku bosamo agatn kaitn, aku lomah. Aku bogogora' obai gola'.

⁴ Watu aku momboritoan Kabar Boi', aku kinyo momakai kopintar-corodi'an monsio pakai' moyakit'an kaitn oca' monjadi urakng pocayo. Apo aku momboritoan agatn caro inyo monunju'an obai Roh Allah bokuaso.

⁵ Nantai tojadi oca' kaitn monjadi pocayo bodasaran kuaso Allah, bukainyo obai kopintar-corodi'an monsio.

Kopintar-corodi'an doi' Roh Allah nantai kopintar-corodi'an inyo bondar

⁶ Apo di antaro boko urakng inyo bondar-bondar pocayo ko Yesus, koi memang mongajar mongona'i kopintar-corodi'an. Apo kopintar-corodi'an bukainyo doi' kopintar-corodi'an monsio di dunia ni'in, bukainyo doi' kopintar-corodi'an boko pomimpitn di dunia ni'in. Sia' paca'an dibonasoan.

⁷ Inyo koi ajaran nantai kopintar-corodi'an Allah. Sokomai, boko urakng kinyo tohu bondar mongona'i kopintar-corodi'an Allah nantai. Kopintar-corodi'an Allah nantai botapu'. Apo sobolupm Allah bulah dunia ni'in, Sio monyiap'an kopintar-corodi'an nantai. Sio molabuhan nantai, oca' kito pan monorima' komulia'an doi' Sio.

⁸ Boko pomimpitn di dunia ni'in kinyo mongorotikopintar-corodi'an Allah nantai. Sokironyo sia' mongoroti mongona'i nantai, pasti sia' kinyo mohukupm mati di kayu salib Tuhatn Yesus inyo mulia.

⁹ Apo sama'an inyo ditulis dalapm Buku Suci, “Allah jadi monyiap'an boko hal pakai' boko urakng inyo mongasihi Sio. Apo kinyo kalo ado urakng inyo moniant boko hal nantai. Kinyo kalo mombayakan boko hal nantai.”

¹⁰ Apo Allah udah monyatoan roncana-Nyo nantai ko kito. Allah molabuhan nantai molalu'i Roh-Nyo inyo Sio onju' ko kito. Obai, Roh nantai mongotohu'i huatan ulih monorakan somuo hal, malahan boko hal mongona'i Allah inyo tobumbutn dalapm diri-Nyo.

¹¹ Pontiat'ancam. Co nyiant urakng inyo mongoroti boko hal dalapm diri urakng bukai. Bayo roh urakng nantai ulih mongoroti boko hal dalapm diri urakng nantai. Samo jam agatn Allah. Co nyiant urakng mongoroti boko hal dalapm diri Allah. Bayo Roh Allah ulih mongoroti boko hal dalapm diri Allah.

¹² Jadi, kito kinyo monorima' roh inyo boasal doi' dunia ni'in. Molaitan kito monorima' Roh Allah. Agatn sama'an nian, kito ulih mongoroti somuo koboi'an inyo dionju' Allah ko kito.

¹³ Watu koi mongajar, koi mongajar mongona'i somuo koboi'an Allah nantai. Koi momakai pomandiran inyo diajari Roh Allah, bukai pomandiran inyo diajari kopintar-corodi'an monsio. Koi monjolasan boko hal mongona'i Allah nantai ko boko urakng inyo udah monorima' Roh Allah.

¹⁴ Apo boko urakng inyo bayo bopikir socaro dunia, sia' co honda' pocayo boko hal doi' Roh Allah. Sia' moanggap boko hal nantai kinyo boroti. Sia' co ulih mongoroti boko hal nantai obai boko hal nantai bayo ulih diporiso'i socaro rohani.

¹⁵ Apo boko urakng inyo dikuaso'i Roh Allah, sia' mampu momoriso'i la'apo pan. Apo sia' kinyo ulih diporiso'i boko urakng bukai

¹⁶ Sama'an inyo ditulis dalapm Buku Suci, “Co nyiant urakng inyo mongotohu'i pikiran Tuhatn Allah! Co nyiant urakng inyo ulih moonji'i nosihat ko Sio” Apo kito ulih mongoroti obai kito momakai pikiran Kristus.