1 Korintus 16 - Porjanjian Boharu Torjomahan Baso Dilakng Soari-ari

Bantu'an pakai' jomaat di Yerusalem

¹ Ni'inan aku honda' monulis mongona'i duit inyo paca'an dikumpulan pakai' monulukng boko jomaat di Yerusalem. Aku honda' oca' kaitn moikuti poraturan inyo udah ku onju' ko jomaat di doerah Galatia. Ni'innam poraturannyo:

² Sotiap ari Minggu, kaitn siku'-monyiku' gola' monyisihan sobagi'an doi' pongulihan kaitn pakai' monulukng jomaat di Yerusalem. Simpatn duit nantai oca' kinyo gola' dikumpulan watu aku datakng.

³ Aman aku datakng, kaitn gola' momilih boboropo urakng inyo kaitn anggap ulih dipocayo'i. Aku paca'an moutus sia' pakai' moonju'an sumbakan kaitn nantai ko Yerusalem. Sia' paca'an mombaba' surat poonju' jam.

⁴ Aman pontikng aku botula' jam, ongko sia' paca'an botula' bosamo aku.

Hajat Paulus

⁵ Aku ija' honda' datakng ko kaitn apo aku ado hajat paca'an molalu'i doerah Makedonia doholu.

^6-7 Aku bulah hajat nantai, obai aku co honda' bayo sobontar aja' monjongu' kaitn dalapm pojalatanku. Aman Tuhatn moijitan, aku honda' tinggal cukup manah agatn kaitn. Malah aman ulih sampai musipm dingin botongga'. Lopas nantai kaitn ulih monulukngku dalapm molajuan pojalatanku.

⁸ Apo, sobolupm aku botula' ko Makedonia, aku paca'an tinggal di si'itn di kota Efesus, sampai ari rayo Pentakosta.

⁹ Obai ado banya' kosompatan dalapm polayatan aku di si'itn. Kosompatan nantai bosar huatan boguno bondar. Biar pan banya' jam urakng inyo bolawatan agatn aku.

¹⁰ Aman Timotius datakng ko kaitn, usahaancam oca' io kinyo mooso gola' agatn kaitn. Hormaticam io, obai io bokorojo pakai' Tuhatn, samo sama'an aku jam.

¹¹ Jadi, jangan ado siku' pan di antaro kaitn inyo co mohormati io. Watu io honda' botula' doi' kaitn, tulukngcam io, oca' io ulih molajuan pojalatannyo agatn sonang. Ongko, io ulih bobali' ko aku. Obai, aku monantian io datakng bosamo agatn boko urakng pocayo inyo bukai.

¹² Mongona'i somadikan kito, Apolos. Aku sobondarannyo monyosahan io oca' io tuyut bosamo agatn boko somadikan bukai pakai' monjongu' kaitn. Apo io bolupm honda' botula' sokarakng. Nono, aman io ado kosompatan, io paca'an datakng ko kaitn.

Paulus moahiri suratnyo

¹³ Jagocam diri kaitn! Huatan hala pocayo ko Yesus. Totap ja' borani huatan kuat pocayo ko Tuhatn.

¹⁴ Somuo inyo kaitn labuhan, labuhancam agatn kasih.

¹⁵ Boko somadikan, kaitn mongotohu'i Stefanus huatan koluarganyo. Sia' nantai boko urakng potamo di doerah Akhaya inyo pocayo ko Yesus. Sia' jam bousaha monulukng urakng bukai inyo pocayo. Jadi, aku momuhun oca' kaitn

¹⁶ mohormati sia' sobagai pomimpitn kaitn. Hormati jam urakng bukai sama'an sia' inyo bokorojo koras dalapm molayati Tuhatn.

¹⁷ Sokomai aku rindu agatn kaitn. Apo agatn kodatakan Stefanus, Fortunatus, huatan Akhaikus ko aku, ongko aku mooso sonang. Aku mooso ubonyo aku bonsamo agatn kaitn.

¹⁸ Obai, sia' monyonangan hatiku, samo sama'an sia' monyonangan hati kaitn. Obai nantai, hormaticam sia' huatan urakng bukai samo sama'an sia'.

¹⁹ Boko jomaat di propinsi Asia Kocit ni'in monyampaian salapm ko kaitn. Salapm jam doi' Akwila ongko Priskila huatan jomaat inyo bokumpul di rumah sia'. Sia' somuo monyampaian salapm agatn ponuh kasih dalapm Tuhatn.

²⁰ Salapm doi' somuo urakng pocayo di si'itn. Kohonda'nyo kaitn siku'-monyiku' hala nogur-nyapo.

²¹ Agatn jariku siku' aku monulis ni'in: Salapm doi' aku, Paulus.

²² Biaram somuo urakng inyo kinyo mongasihi Tuhatn Yesus monorima' hukupan! Datakngcam, Tuhatn!

²³ Aku bodoa oca' Yesus, Tuhatn kito monunju'an koboi'an-Nyo ko kaitn.

²⁴ Aku pan mongasihi kaitn somuo di dalapm Kristus Yesus.