1 Korintus 15 - Porjanjian Boharu Torjomahan Baso Dilakng Soari-ariYesus bondar-bondar bobali' hidup doi' komatian ( 15:1-11 ) 1 Boko somadikan, ni'inan aku honda' moingant'an kaitn mongona'i Kabar Boi'. Sokomai aku udah momboritoan Kabar Boi' ko kaitn ongko kaitn monorima'nyo. Kaitn pan udah somombondarannyo pocayo ko Kabar Boi' nantai. 2 Aman kaitn totap somombondarannyo pocayo Kabar Boi' inyo udah aku boritoan ko kaitn, ongko kaitn paca'an disolamant'an. Apo aman kaitn co pocayo somuo Kabar Boi' nantai tomansu' mongona'i komatian Yesus huatan Yesus bobali' hidup doi' komatian, boroti co nyiant pasalnyo kaitn pocayo tontainyo. 3 Aku udah monorima' Kabar Boi' ongko aku monyampaian nantai ko kaitn. Inyo kotakan pontikng doi' Kabar nantai ia'an boko kojadian ni'in: Kristus udah mati obai boko dosa kito. Hal nantai sama'an inyo ditulis dalapm Buku Suci. 4 Lalu Sio dipasaram. Apo watu ari kotigo Sio dihidupan agi', sosuai agatn inyo tulisan di Buku Suci. 5 Lopas nian Sio moniant'an diri Sio ko rasul Petrus, ongko ko koduo bolas rasul-Nyo. 6 Lopas nantai, Yesus moniant'an diri ko lima' ratus urakng pado watu inyo samo. (Banya' doi' sia' inyo ija' hidup sampai watu aku monulis surat ni'in. Apo ado jam inyo udah matiam.) 7 Lopas nian, Yesus moniant'an diri Sio ko Yakobus, ongko ko somuo rasul inyo bukai. 8 Ponsuahannyo toahir, Yesus moniant'an diri Sio ko aku. Aku monjadi rasul di watu inyo songkayo doi' boko rasul bukainyo. Samo sama'an bobia' kocit inyo lahir di watu inyo kinyo topat. 9 Obai, di antaro somuo rasul, aku inyo palikng nyiant pasalnyo. Aku kinyo cucu' disobut rasul, obai komainyo aku mondorako'i boko urakng inyo pocayo ko Yesus. 10 Apo obai koboi'an hati Allah, Sio udah bulah aku monjadi sama'an watu ni'in. Koboi'an hati inyo Allah udah labuhan nantai kinyo bopasal. Malahan, aku bokorojo koras momboritoan Kabar Boi', lobih koras daripado somuo rasul inyo bukai. Apo sobondarnyo aku kinyo molabuhan nantai agatn kokuatan siku'. Aku mampu molabuhan nantai bayo obai koboi'an hati Allah monyoroto'i aku. 11 Obai nantai, kinyo jadi mosalah mo sopo inyo momboritoan Kabar Boi', aku damo boko rasul inyo bukai. Lopas jadi kaitn mondinga'an Kabar Boi', kaitn monjadi pocayo. Urakng pocayo paca'an bobali' hidup doi' komatian ( 15:12-34 ) 12 Jadi, koi momboritoan obai Yesus udah dihidupan agi' doi' komatian. Aman kaitn udah pocayo nantai, co mungkitn kaitn mongatoan obai urakng mati kinyo paca'an dihidupan agi' doi' komatian. 13 Soandainyo urakng mati kinyo paca'an dihidupan agi' doi' komatian, boroti Kristus pan kinyo dihidupan agi' doi' komatian. 14 Soandainyo, Kristus kinyo dihidupan agi' doi' komatian, boroti borito doi' koi nantai tumbukan mo. Alahasil jam kaitn pocayo ko Kristus. 15 Lobih doi' nantai, soandainyo urakng mati bondar-bondar kinyo dihidupan agi', jadi koi ia'an urakng inyo tumbukan mongona'i Allah. Obai, koi udah momandiran obai Allah inyo mombulah Kristus hidup agi', padohal Allah co molabuhan hal nantai. 16 Sokali agi', soandainyo, urakng mati kinyo paca'an dihidupan agi' doi' komatian. Boroti, Kristus pan kinyo dihidupan agi' doi' komatian. 17 Soandainyo, Kristus kinyo dihidupan agi' doi' komatian. Boroti, co nyiant gunonyo kaitn pocayo ko Sio. Kaitn ija' dikuaso'i dosa. 18 Ubo nian jam agatn boko urakng pocayo ko Kristus inyo udah mati. Sia' udah bonaso. 19 Soandainyo, kito yakitn huatan boharap ko Kristus pakai' kohidupan di dunia ni'in mo, kito nantai urakng inyo palikng uyuh doi' somuo monsio. 20 Apo sobondarnyo Allah udah bulah Kristus monjadi urakng potamo inyo dihidupan agi' doi' komatian. 21 Obai, somuo urakng gola' mati obai sikuꞌ urakng, ia'an Adapm. Ubo nian jam somuo urakng ulih dihidupan agi' agatn porontaroan sikuꞌ urakng, ia'an obai Kristus. 22 Obai somuo urakng inyo ado hubukan agatn Adapm gola' mati. Sama'an nantai jam, somuo urakng inyo ado hubukan agatn Kristus paca'an dihidupan agi' doi' komatian. 23 Apo ado urutannyo. Potamo, Allah bulah Kristus bobali' hidup. Lopas nian, watu Kristus bobali' ko dunia ni'in, ongko Allah paca'an bulah boko urakng umputn Kristus bobali' hidup. 24 Lopas nantai ahir dunia ni'in datakng, ia'an watu Sio monyorahan Koraja'an ko Allah Bopai, lopas nantai Sio mombonasoan somuo pomorintahan, kokuasa'an ongko kokuatan. 25 Obai, Sio gola' momorintah sobagai Rajo sampai Allah bulah somuo musuh-Nyo tundu' di babah kaki-Nyo 26 Musuh inyo toahir dibonasoan ia'an komatian. 27 Obai, somuo hal udah Sio tundu'an dibabah kaki-Nyo. Apo, aman dipandiran ‘somuo hal udah ditundu'an’. Pasti jam Allah siku' kinyo tomansu' di dalapmnyo. 28 Malah sobali'nyo, lopas somuo hal ditundu'an dibabah kaki Kristus, jadi Sio siku' sobagai Ana' paca'an monundu'an diri-Nyo siku' di babah Allah. Agatn sama'an nian, Allah pan paca'an momorintah somuonyo. 29 Jadi, pasti Allah paca'an bulah boko urakng bobali' hidup doi' komatian. Ado di antaro kaitn inyo dibaptis pakai' mowakili urakng bukai inyo udah mati. Soandainyo urakng mati samo sokali co paca'an dihidupan agi' doi' komatian, jadi inyo sia' labuhan nantai co nyiant pasalnyo. 30 Samo jam agatn koi inyo gola' mohadapi bohayo sotiap watu. 31 Bondar, boko somadikan! Sotiap ari aku ajab sonsaro mohadapi komatian. Aku bosumpah obai nantai bondar, samo sama'an oso bompangkakanku ko kaitn pan bondar. Aku bopangkakng agatn kaitn di dalapm Kristus Yesus. Kristus Yesus nantai Tuhatn inyo bokuaso di pucu' kito. 32 Di kota Efesus, aku bojuakng molawatn boko urakng inyo kotakng ganas. Sia' samo sama'an bonatakng ganas. Doi' pondapat monsio, pasti co nyiant untukng pakai' aku aman molabuhan nantai. Aman Allah co paca'an bulah urakng mati dihidupan agi' doi' komatian, ongko lobih boi' kito moikuti pomandiran ni'in: “Hobu'-luso kito paca'an mati. Jadi, lobih boi' kito makatn, minum huatan bosonang-sonang.” 33 Jangan biaran urakng bukai hala bulah kaitn salah bopikir! Ingant cam porbaso inyo mongatoan: “Pogaulan inyo buru' morusa' kolaku'an inyo boi'.” 34 Jadi, kaitn gola' bopikir agi' agatn boboi'. Jangan hala bulah dosa! Aku mongatoan nantai obai ado di antaro kaitn inyo kinyo bondar-bondar mongonal Allah. Aku honda' oca' kaitn mooso malu mongona'i nantai. Koadaan bukakng-tubuh inyo boharu lopas jadi dihidupan agi' ( 15:35-58 ) 35 Apo mungkitn ja' ado boboropo urakng di antaro kaitn inyo botakutn, “Ubo apo caronyo urakng mati dihidupan agi'? Watu siku' urakng dihidupan agi', bukakng-tubuh urakng nantai sama'an la'apo?” 36 Kaitn inyo botakutn sama'an nantai sobondarnyo budu! Bukakng-tubuh urakng gola' mati sobolupm Allah bulah urakng mati nantai bobali' hidup. Samo sama'an bigi' inyo ditanam di dalapm tanah. Bigi' nantai gola' mati doholu. Hoyu' bigi' nantai tumbuh. 37 Bukakng-tubuh urakng mati bayo samo sama'an bigi' mo, umpamonyo bigi' gandupm damo bigi' inyo bukai. Inyo ditanam nantai bigi' bukainyo batakng inyo udah bosar. 38 Apo, sotiap bigi' tontanaman sosuai agatn kohonda' Allah. Sio moonji'i bontu' tontanaman ko bigi' masikng-masikng. 39 Porotian jam somuo bukakng-tubuh kinyo samo. Bukakng-tubuh monsio kinyo samo agatn bukakng-tubuh bonatakng. Bukakng-tubuh burukng kinyo samo agatn bukakng-tubuh ikatn. 40 Somuo bando di langit bukainyo doi' somuo bando di bumi. Boko bando langit inyo boi' bukainyo doi' boko bando di bumi inyo boi'. 41 Matoari ado cohayonyo siku'. Bulatn ado cohayonyo siku'. Somuo bintakng pan ado cohayonyo siku'. Malah sotiap bintakng ado cohayo inyo bukainyo doi' somuo bintakng inyo bukai. 42 Samo sama'an nantai, lopas jadi Allah bulah urakng mati bobali' hidup, bukakng-tubuh urakng nantai kinyo samo agatn bukakng-tubuh io sobolupmnyo. Watu bukakng-tubuh urakng dipasar, bukakng-tubuh nantai paca'an bonaso. Apo watu bukakng-tubuh urakng dihidupan agi', bukakng-tubuh nantai kinyo paca'an bonaso agi'. 43 Watu bukakng-tubuh urakng dipasar, bukakng-tubuh nantai bukakng-tubuh kinyo bopasal. Apo watu bukakng-tubuh urakng dihidupan agi', bukakng-tubuh nantai monjadi bukakng-tubuh inyo kotakng tohormat. Watu bukakng-tubuh urakng dipasar, bukakng-tubuh nantai bukakng-tubuh inyo lomah. Apo watu bukakng-tubuh urakng dihidupan agi', bukakng-tubuh nantai inyo kuat. 44 Watu bukakng-tubuh urakng dipasar, bukakng-tubuh nantai bukakng-tubuh jasmani. Apo watu bukakng-tubuh urakng dihidupan agi', bukakng-tubuh nantai bukakng-tubuh rohani. Obai ado bukakng-tubuh jasmani, ongko pasti ado bukakng-tubuh rohani jam. 45 Sama'an inyo totulis di dalapm Buku Suci, “Allah bulah monsio potamo, ia'an Adapm. Adapm monjadi hidup.” Adapm nantai disobut Adapm potamo. Apo Kristus disobut Adapm toahir. Sio nantai Roh inyo bokuaso moonji'i hidup inyo somombondarannyo. 46 Porotiancam urutannyo! Inyo jasmani datakng doholu. Hoyu' lopas nian inyo rohani datakng. 47 Monsio potamo, ia'an Adapm, dipulah doi' dobu tanah. Hidupnyo socaro jasmani. Apo Adapm koduo, ia'an Kristus, boasal doi' sorugo. 48 Somuo urakng di dunia ni'in samo sama'an Adapm inyo boasal doi' dobu tanah. Somuo urakng inyo mansu' ko sorugo nononyo paca'an monjadi samo sama'an Kristus inyo boasal doi' sorugo. 49 Bukakng-tubuh kito ni'in samo sama'an bukakng-tubuh Adapm, inyo dipulah doi' dobu tanah. Ubo nian jam nononyo bukakng-tubuh kito paca'an monjadi samo sama'an bukakng-tubuh Kristus inyo boasal doi' sorugo. 50 Boko somadikan, ni'in inyo pontikng pakai' dikotohu'i: Bukakng-tubuh kito ni'in, ia'an dagikng huatan darah, kinyo ulih mansu' Koraja'an Allah nononyo. Bukakng-tubuh kito ni'in dapat mati. Jadi, bukakng-tubuh sama'an ni'in kinyo dapat hidup somanah-manahnyo. 51-52 Dinga'anbo! Aku honda' momadahan sosuatu ko kaitn inyo komai kinyo dikotohu'i urakng: Kinyo somuo kito paca'an mati. Apo Allah paca'an morubah bukakng-tubuh kito somuo watu trompet toahir bobunyi. Nantai tojadi dalapm watu sopongirap mo. Allah paca'an bulah boko urakng mati monjadi hidup agi'. Sia' paca'an diubah oca' ulih hidup somanah-manahnyo. Somuo kito inyo ija' hidup watu nantai paca'an diubah sama'an nantai jam. 53 Obai, bukakng-tubuh kito inyo ulih bonaso gola' diubah monjadi bukakng-tubuh inyo kinyo ulih bonaso. Bukakng-tubuh kito inyo ulih mati gola' diubah monjadi bukakng-tubuh inyo kinyo ulih mati. 54 Watu bukakng-tubuh kito diubah sama'an nantai, ongko pomandiran ni'in inyo totulis dalapm Buku Suci paca'an tojadi, “Kuaso komatian udah dikalahan. Tuhatn udah monang.” 55 “Hai komatian, di mono komonangan kolai? Hai komatian, di mono kuaso kolai?” 56 Komatian monjonti' agatn monggunoan dosa. Dosa jadi bokuaso molalu'i Hukupm Torat. 57 Apo bosukurcam ko Allah obai dosa kinyo mongalahan kito agatn caro nantai. Allah bulah kito monang obai Yesus Kristus, Tuhatn inyo bokuaso di pucu' kito. 58 Jadi, boko somadikan inyo aku kasihi, totap pocayo ko Yesus agatn yakitn. Jangan goyah. Bokorojocam agatn rajitn pakai' Tuhatn. Obai, kaitn tohu obai somuo inyo kaitn korojoan pakai' Tuhatn ado kountukannyo. |
LAI 2021
Indonesian Bible Society