1 Korintus 14 - Porjanjian Boharu Torjomahan Baso Dilakng Soari-ari

Utamoan komampuan husus inyo monguat'an urakng bukai

¹ Bousahacam agatn somombondarannyo pakai' salikng mongasihi. Somombondarannyo jam honda' mondapat'an boko komampuan husus doi' Roh Allah, hususnyo komampuan pakai' monyampaian boko posatn-pontal doi' Allah.

^2-3 Obai, urakng inyo monyampaian posatn-pontal doi' Allah monguat'an urakng bukai. Urakng nantai monosihat'i huatan moonji'i somangant ko urakng bukai. Io pan mongkongkanti'i urakng bukai inyo mohadapi kosusahan. Apo urakng inyo dionji'i komampuan husus pakai' bopandir pakai baso Roh Allah, urakng nantai bopandir ko Allah ongko kinyo bopandir ko monsio obai co nyiant urakng inyo mongoroti pomandirannyo. Roh Allah bulah io bopandir mongona'i boko hal inyo bayo dikotohu'i ulih Allah.

⁴ Urakng inyo bopandir pakai baso roh monguat'an dirinyo siku'. Apo urakng inyo monyampaian posatn-pontal doi' Allah monguat'an urakng bukai inyo pocayo.

⁵ Aku sonang aman kaitn somuo ulih bopandir pakai boko baso roh nantai. Apo lobih boi' agi' aman kaitn ulih monyampaian posatn-pontal doi' Allah. Obai, urakng inyo monyampaian posatn-pontal doi' Allah lobih boguno daripado bopandir pakai baso roh. Apo aman ado inyo monjolasan roti doi' pomandiran boko baso roh nantai, hoyu' pomandiran nantai boguno pakai' monguat'an urakng bukai inyo pocayo.

⁶ Soumpamonyo aku datakng ko kaitn ongko bopandir pakai baso roh, aku co nyiant gunonyo pakai' kaitn! Aku boguno aman monyampaian ko kaitn mongona'i boko hal inyo Allah poniant'an ko aku. Damo aku monjolasan boko hal doi' Roh Allah inyo aku kotohu'i. Damo ku monyampaian posatn-pontal doi' Allah damo mongajar sosuatu ko kaitn.

⁷ Hal nantai ulih diumpamoan agatn bando inyo co nyiant kosihnyo inyo bobunyi sama'an sulikng damo kocapi. Aman boko nada kinyo jolas, co mungkitn urakng bukai ulih mongoroti nyanyiannyo.

⁸ Damo sama'an trompet inyo ditiup pakai' moningkau tontara boparakng. Aman saronyo kinyo jolas, pasti co nyiant urakng inyo paca'an moolikannyo.

⁹ Ubo nian jam agatn kaitn inyo bopandir pakai boko baso roh. Aman pomandiran kaitn kinyo dapat dimongoroti, co mungkitn urakng bukai mongotohu'i pomandiran kaitn nantai! Pomandiran kaitn co nyiant gunonyo samo sama'an kaitn bopandir ko angin.

¹⁰ Memang ado banya' baso di dunia. Somuonyo bisi roti.

¹¹ Apo aman aku co mongoroti baso urakng nantai, ongko aku monjadi urakng inyo co io konal. Io pan monjadi urakng inyo co ku konal.

¹² Ubo nian jam agatn kaitn. Memang kaitn kotakng honda' dionji'i boko komampuan husus doi' Roh Allah. Apo, soharusnyo kaitn mongohonda'i boko komampuan husus nantai oca' kaitn sobondarannyo ulih monguat'an urakng bukai inyo pocayo.

¹³ Obai nantai, urakng inyo bopandir pakai baso roh gola' bodoa oca' io pan dionji'i komampuan pakai' monjolasan roti doi' pomandiran baso nantai ko urakng bukai inyo pocayo.

¹⁴ Aku momandiran nantai obai aman ado urakng inyo bopandir pakai baso roh, memang rohnyo inyo bodoa. Apo akal budinyo kinyo dipakai.

¹⁵ Jadi, gola' kito molabuhan ni'in: Kito gola' bodoa momakai roh kito. Apo kito pan gola' bodoa momakai akal budi kito. Kito gola' bonyanyi pujian momakai roh kito. Apo kito pan gola' bonyanyi pujian momakai akal budi kito.

¹⁶ Obai, aman ado di antaro kaitn inyo moucap sukur ko Allah pakai baso doi' Roh Allah, ongko urakng bukai inyo hadir co ulih mongoroti pomandiran kaitn nantai. Co mungkitn urakng bukai nantai momandiran ‘Amin’ obai mondinga' ucapan sukur kaitn nantai!

¹⁷ Biar pan kaitn moucap sukur agatn caro inyo kotakng boi', apo caro nantai kinyo monguat'an urakng bukai.

¹⁸ Aku bosukur ko Allah obai aku bopandir pakai baso roh lobih boi' daripado somuo kaitn.

¹⁹ Apo watu urakng pocayo bokumpul pakai' sombayakng, tujuanku pakai' mongajar urakng bukai. Jadi, aku lobih momilih pakai' momandiran lima' kato pandir inyo ulih dimongoroti daripado boribu-ribu kato pandir dalapm baso roh inyo kinyo dapat dimongoroti urakng bukai.

²⁰ Boko somadikan, jadicam sama'an boko bobia' dalapm hal kojahatan obai boko bobia' kinyo tohu porbuatan jahat. Apo jangan monjadi sama'an boko bobia' dalapm kaitn bopikir mongona'i boko komampuan husus doi' Roh Allah. Dalapm hal nantai, kaitn gola' bopikir agatn pintar-corodi' sama'an urakng tuho.

²¹ Poniant'an pomandiran Tuhatn inyo totulis dalapm Hukupm Torat. Kato-Nyo, “Aku paca'an bopandir ko umantku ni'in molalu'i baso bukai. Aku paca'an bopandir ko sia' molalu'i banso bukai. Apo, sia' kinyo honda' mondinga' pomandiran-Ku.”

^22-23 Jadi doi' kojadian nantai, kito tohu komampuan pakai' bopandir dalapm baso roh nantai tando pakai' urakng inyo kinyo pocayo, bukainyo pakai' urakng inyo pocayo. Umpamonyo, somuo kaitn inyo pocayo bokumpul di sobuti' tompat. Watu nantai, somuo kaitn bopandir dalapm boko baso roh. Lopas nian, ado boko urakng luar damo boko urakng inyo kinyo pocayo inyo mansu' ko dalapm tompat nantai. Pasti sia' paca'an mongatoan obai somuo kaitn nantai boko urakng gogilo. Apo, komampuan pakai' monyampaian posatn-pontal doi' Allah nantai tando pakai' urakng inyo pocayo, bukainyo pakai' urakng inyo co pocayo.

²⁴ Umpamonyo, somuo kaitn inyo pocayo bokumpul di sobuti' tompat. Watu nantai, somuo kaitn monyampaian posatn-pontal doi' Allah. Lopas nian, ado urakng luar damo urakng inyo kinyo pocayo inyo mansu' ko dalapm tompat nantai. Somuo pomandiran kaitn paca'an monunju'an boko dosanyo ongko bulah io sadar paca'an boko dosanyo.

²⁵ Obai kaitn monyampaian posatn-pontal doi' Allah, ongko somuo inyo dibumbutn dalapm hati urakng nantai paca'an dikotohu'i. Jadi, io paca'an moncungkukng huatan monyombah Allah kapikng mongatoan, “Allah bondar-bondar ado di tongah-tongah kaitn.”

Pokumpulan urakng pocayo pakai' sombayakng gola' toatur

²⁶ Jadi ubo ni'in boko somadikan: Watu kaitn bokumpul pakai' sombayakng, ado inyo monyanyi lagu pujian, ado inyo moajaran sosuatu, ado inyo monyampaian sosuatu inyo Allah poniant'an ko io, ado inyo bopandir pakai baso roh, ado inyo monjolasan roti doi' pomandiran dalapm boko baso nantai. Somuo nantai gola' dilabuhan pakai' monguat'an urakng bukai.

²⁷ Aman ado inyo siap bopandir pakai baso roh, ongko bayo duo urakng inyo ulih molabuhannyo, damo palikng banya' tigo urakng. Sia' gola' bopandir bogiliran holu'ai. Huatan gola' ado inyo monjolasan roti doi' pomandiran dalapm boko baso nantai.

²⁸ Aman co nyiant inyo ulih monjolasan roti doi' pomandiran dalapm boko baso nantai, ongko sia' co ulih bopandir pakai' boko baso roh di hadapan urakng bukai watu kaitn bokumpul. Sia' bayo ulih bopandir pakai' boko baso nantai ko Allah dalapm hatinyo.

²⁹ Solaitn nantai pan watu kaitn bokumpul pakai' sombayakng, soboi'nyo duo damo tigo urakng monyampaian posatn-pontal doi' Allah apo gola' ado urakng bukai inyo pocayo monilai aman pomandiran sia' bondar-bondar doi' Allah kata'an cado.

³⁰ Apo, aman Allah monyatoan sosuatu ko urakng bukai inyo hadir, ongko urakng inyo tongahan bopandir gola' botongga'. Biaram urakng bukai nantai bopandir.

³¹ Obai, kaitn somuo ulih monyampaian boko posatn-pontal doi' Allah siku'-monyiku'. Agatn caro nantai, kaitn somuo ulih diajar, dinosihati huatan dionji'i somangant.

³² Poraturan ni'in ulih dituruti somuo urakng inyo bisi komampuan pakai' monyampaian posatn-pontal doi' Allah. Obai komampuan nantai ulih dikondalian.

³³ Somuo komampuan doi' Roh Allah paca'an dipakai socaro toatur. Obai Allah kinyo mongohonda'i kokacauan. Sio mongohonda'i oca' kito ado kodamaian.

³⁴ Samo sama'an boko poraturan inyo dituruti somuo kolompok urakng pocayo. Watu kaitn bokumpul pakai' sombayakng, boko botina' gola' lolangunt. Sia' co ulih bopandir. Apo sia' gola' tundu'. Ni'in sosuai agatn pomandiran inyo ditulis di buku Hukupm Torat.

³⁵ Aman siku' urakng botina' ado sosuatu inyo honda' io kotohu'i, io ulih monakutannyo ko lakinyo di rumah. Obai, kinyo cucu' aman botina' bopandir dalapm pokumpulan urakng pocayo.

³⁶ Jangan bopikir kaitn ulih mongikuti boko poraturan siku'. Ingantcam obai Pomandiran Allah kinyo boasal doi' kaitn di kota Korintus huatan disampaian bukainyo bayo ko kaitn.

³⁷ Aman ado urakng inyo bopikir dirinyo bisi komampuan pakai' monyampaian posatn-pontal doi' Allah, damo io bopikir io bisi komampuan rohani inyo bukai, urakng sama'an nantai gola' mongotohu'i ni'in: Somuo inyo aku pandiran ko kaitn nantai ia'an boko porintah doi' Tuhatn.

³⁸ Aman ado urakng inyo kinyo honda' borotian pomandiranku, jangan kaitn borotian urakng nantai.

³⁹ Jadi, boko somadikanku, kaitn gola' ado kohonda' pakai' monorima' komampuan pakai' monyampaian posatn-pontal doi' Allah. Jangannam morarakng urakng pakai' bopandir pakai baso roh.

⁴⁰ Apo somuonyo gola' dilabuhan agatn caro inyo boi' huatan toatur.