1 Korintus 13 - Porjanjian Boharu Torjomahan Baso Dilakng Soari-ari

Somuo komampuan husus gola' digunoan pakai' mongasihi urakng bukai

¹ Sokironyo aku ulih bopandir dalapm bomacapm baso monsio damo boko baso molekat, apo aman aku co mongasihi urakng bukai, boroti komampuanku nantai kinyo boguno. Aku samo sama'an totawak inyo sombarakan ditombuh damo lonceng inyo bayo bulah tingal kolindakan mo.

² Soandainyo aku dionji'i komampuan husus pakai' monyampaian posatn-pontal doi' Allah, soandainyo aku mongoroti somuo hajat Allah inyo bolupm dipadahan ko urakng bukai, soandainyo aku mongotohu'i somuo hal, soandainyo aku pocayo agatn kotakng kuat singgatn aku ulih momindahan bukit ko tompat bukai, apo aman aku kinyo mongasihi urakng bukai, aku kinyo boguno.

³ Soandainyo aku mombagi-bagian somuo kodampuan umputnku, apotolagi' aku rela monyorahan bukakng-tubuhku pakai' ditunu'i dalapm api, apo aku kinyo mongasihi urakng bukai, aku samo sokali co boguno.

⁴ Urakng inyo mongasihi ia'an urakng inyo hala sabar huatan hala bulah koboi'an agatn urakng bukai. Urakng inyo mongasihi nantai ia'an urakng inyo kinyo tungi. Io kinyo bopangkakng diri huatan kinyo buhau.

⁵ Urakng inyo mongasihi nantai ia'an urakng kinyo botindak agatn kasar. Io kinyo bayo momikiran kopontikan dirinyo siku'. Io kinyo copat godi. Io kinyo moingant-ingant kosalahan urakng bukai.

⁶ Urakng inyo mongasihi nantai ia'an urakng inyo kinyo rindakng obai urakng bulah kojahatan. Apo io rindakng obai kobondaran.

⁷ Urakng inyo mongasihi nantai ia'an urakng inyo ulih tahatn mohadapi la'apo pan. Io hala pocayo. Io hala yakitn huatan boharap ko Allah dalapm somuo koadaan. Io hala sabar mohadapi la'apo pan.

⁸ Kasih kinyo paca'an kalo botongga'. Apo nononyo, komampuan husus pakai' monyampaian posatn doi' Allah paca'an botongga'. Komampuan husus pakai' bopandir dalapm baso roh paca'an botongga'. Komampuan husus pakai' mongotohu'i boko hal doi' Roh Allah paca'an botongga'.

⁹ Obai watu ni'in, komampuan husus pakai' mongotohu'i boko hal doi' Roh Allah kurakng longkap. Komampuan husus pakai' monyampaian posatn doi' Allah pan kurakng longkap.

¹⁰ Apo watu nononyo inyo sompurna datakng, jadi inyo kinyo sompurna paca'an hilakng.

¹¹ Samo sama'an watu kito monjadi bujakng-bosar, boko hal inyo bosipat bobia' kinyo dipakai agi'. Watu kito ija' bobia', kito bopandir ubo bobia'. Kito bopikir sama'an bobia'. Kito bulah koputusan sama'an bobia'. Apo watu kito monjadi bujakng-bosar, kito botongga' bulah boko hal inyo bosipat sama'an bobia'.

¹² Agatn poumpamoan bukai, kito watu ni'in samo sama'an kito moniant dalapm coromin suatu kombayakan inyo kinyo jolas. Apo nono watu kito ado di sorugo kito paca'an moniant socaro lansukng. Ni'inan kito bayo mongonal Allah socaro kurakng sompurna. Apo nono kito paca'an mongonal Sio agatn sompurna. Samo sama'an Allah udah mongonal kito agatn sompurna.

¹³ Jadi, dalapm koadaan sokarakng ni'in ado tigo hal inyo gola' totap kito labuhan, ia'an: torus pocayo, kinyo botongga' boharap huatan salikng mongasihi. Inyo kotakan pontikng doi' kotigo hal nantai ia'an salikng mongasihi.