1 Korintus 12 - Porjanjian Boharu Torjomahan Baso Dilakng Soari-ari

Roh Allah moonji'i bomacapm komampuan husus ko boko urakng pocayo

¹ Ni'inan, boko somadikan, aku honda' monulis mongona'i boko komampuan husus inyo dionji'i Roh Allah. Aku honda' oca' kaitn bondar-bondar mongoroti mongona'i boko hal ni'in.

² Ingant watu kaitn ija' bolupm konal agatn Allah. Kaitn dipongaruhi pakai' monyombah boko duato inyo co ulih bopandirobai boko duato nantai kinyo bobondar hidup.

³ Obai nantai, aku gola' mongajar kaitn mongona'i ubo apo caro Roh Allah bokorojo dalapm hidup urakng inyo pocayo. Aman ado urakng inyo bondar-bondar dikuaso'i Roh Allah, pasti urakng nantai kinyo paca'an bopandir, “Yesus cucu'mo dihukupm!” Sobali'nyo, aman ado urakng inyo bopandir, “Yesus nantai Tuhatn inyo bokuaso!” pasti urakng nantai bondar-bondar dikuaso'i Roh Allah.

⁴ Ado bomacapm komampuan husus, apo bayo ado siku' Roh Allah inyo moonji'i somuonyo.

⁵ Ado bomacapm caro urakng bokorojo pakai' Tuhatn. Apo bayo ado siku' Tuhatn inyo kito layati.

⁶ Ado bomacapm mujisat. Apo bayo ado siku' Allah inyo mongorojoan somuonyo dalapm somuo urakng.

⁷ Allah moonji'i komampuan husus ko masikng-masikng kito. Nantai mombutian obai Roh-Nyo bokorojo di dalapm masikng-masikng urakng inyo pocayo. Apo somuo komampuan husus nantai dionji'i pakai' kountukan bosamo.

⁸ Umpamonyo, ko urakng ni'in Roh Allah moonji'i komampuan bopandir agatn kopintar-corodi'an. Ko urakng nian Roh Allah moonji'i komampuan pakai' mongotohu'i sosuatu ongko monyampaian boko hal nantai agatn jolasko urakng bukai.

⁹ Ko urakng bukainyo agi', Roh Allah inyo samo nantai moonji'i komampuan pakai' pocayo ko Yesus agatn kotakng kuat. Ko urakng bukainyo agi', Roh Allah inyo samo nantai moonji'i komampuan pakai' monyamani.

¹⁰ Ko urakng bukainyo agi', Roh Allah moonji'i komampuan pakai' bulah mujisat. Ko urakng bukainyo agi', Roh Allah moonji'i komampuan pakai' monyampaian boko posatn-pontal doi' Allah. Ko urakng bukainyo agi', Roh Allah moonji'i komampuan pakai' monyongkayoan bomacapm-macapm roh. Ko urakng bukainyo agi', Roh Allah moonji'i komampuan pakai' bopandir dalapm baso roh. Ko urakng bukainyo agi', Roh Allah moonji'i komampuan pakai' monjolasan roti doi' pomandiran dalapm boko baso roh nantai.

¹¹ Bayo ado siku' Roh Allah inyo moonji'i somuo komampuan husus nantai. Roh Allah moonji'i komampuan husus ko sotiap urakng masikng-masikng sosuai agatn kohonda'-Nyo.

Banya' anggota apo sobukakng-sotubuh

^12-13 Ado banya' urakng inyo bukai-mombukai pocayo ko Kristus. Ado boko urakng Yahudi inyo pocayo ko Kristus. Ado jam boko urakng inyo bukainyo urakng Yahudi. Ado hulutn inyo udah pocayo. Ado jam urakng bebas. Apo kito totap sokolompok mo obai kito somuo dibaptis agatn Roh inyo samo. Apo kito somuo pan monorima' Roh inyo samo dalapm hati kito. Obai nantai, kito inyo udah pocayo samo sama'an sobukakng-sotubuh. Bukakng-tubuh nantai sobuti' apo ado banya' bagiannyo.

¹⁴ Bukakng-tubuh nantai kinyo bayo todiri doi' siku' anggota jam. Apo, bukakng-tubuh nantai todiri doi' boko anggota agatn bomacapm gunonyo.

¹⁵ Aman umpamonyo kaki ulih bopandir, “Aku bukainyo longan, jadi aku bukainyo anggota doi' bukakng-tubuh.” Biar pan ubo nian, kaki nantai totap bagian doi' bukakng-tubuh.

¹⁶ Damo umpamonyo kolindakan ulih momandiran, “Aku bukainyo mato, jadi aku bukainyo anggota doi' bukakng-tubuh.” Biar pan ubo nian, mato nantai totap bagian doi' bukakng-tubuh.

¹⁷ Aman, somuo bukakng-tubuh nantai bayo doi' mato mo, kinyo mungkitn bukakng-tubuh nantai ulih mondinga'! Damo aman, somuo bukakng-tubuh nantai bayo doi' kolindakan, kinyo mungkitn bukakng-tubuh ulih monciupm bou!

^18-19 Aman somuo bukakng-tubuh nantai bayo doi' so macapm bagian, ongko bukakng-tubuh nantai kinyo bukakng-tubuh agi'. Apo ubonyo, Allah bulah bukakng-tubuh nantai sosuai agatn kohonda'-Nyo. Sio moatur sotiap bagian siku'-monyiku'oca' boguno dalapm bukakng-tubuh nantai.

²⁰ Memang, ado banya' bagian, apo bayo ado sobuti' bukakng-tubuh.

²¹ Jadi, mato kinyo ulih bopandir agatn longan, “Aku co momontikan kolai!” Kopala' kinyo ulih bopandir agatn kaki, “Aku co momontikan kolai!”

²² Malahan sobali'nyo! Boko bagian bukakng-tubuh inyo ubonyo lomah, sobondarnyo lobih dipontikan.

²³ Boko bagian bukakng-tubuh inyo kito anggap kurakng dihormati, sobondarnyo kito lobih mohormati boko bagian nantai. Caronyo kito monutupi boko bagian nantai agatn pakai'an. Apotolagi' boko bagian bukakng-tubuh inyo co ulih dipontiat'an di muka' umum. Kito mohormati boko bagian nantai agatn borotian boko bagian nantai hala ditungkau'i agatn pakai'an.

²⁴ Apo boko bagian bukakng-tubuh inyo dipontiat'an, boko bagian nantai kinyo pontikng diporotian sama'an nantai. Jadi, kito gola' lobih borotian boko bagian inyo kito anggap kurakng dihormati. Nanam caronyo Allah lobih mohormati boko bagian nantai watu Sio bulah bukakng-tubuh nantai.

²⁵ Sio molabuhan nantai oca' boko bagian bukakng-tubuh nantai kinyo bosongkayo, apo salikng borotian inyo bukai.

²⁶ Aman sobuti' bukakng-tubuh kompodihan, ongko somuo boko bagian bukakng-tubuh inyo bukai kompodihan jam. Aman sobuti' bagian bukakng-tubuh dihormati, ongko somuo bagian bukakng-tubuh inyo bukai sonang-nyaman jam.

²⁷ Kaitn kolompok urakng inyo pocayo samo sama'an sobukakng-sotubuh, ia'an bukakng-tubuh Kristus. Kaitn siku'-monyiku' nantai bagian doi' bukakng-tubuh-Nyo nantai.

²⁸ Allah momilih boko urakng dalapm kolompok urakng pocayo. Inyo potamo, boko rasul, ia'an boko urakng inyo dipilih pakai' momboritoan Kabar Boi'. Inyo koduo, boko nabi, ia'an boko urakng inyo monyampaian posatn doi' Allah. Inyo kotigo, boko urakng inyo dionji'i komampuan pakai' mongajar. Ongko, ado boko urakng inyo dionji'i komampuan pakai' bulah mujisat. Ado jam boko urakng inyo dionji'i komampuan pakai' monyamani, boko urakng inyo dionji'i komampuan pakai' monulukng urakng bukai, boko urakng inyo dionji'i komampuan pakai' momimpitn, ongko boko urakng inyo dionji'i komampuan pakai' bopandir dalapm boko baso roh.

²⁹ Allah kinyo bulah somuo urakng pocayo pakai' jadi rasul. Kinyo somuo urakng pocayo inyo dipilih pakai' jadi nabi. Kinyo somuo urakng inyo dipilih pakai' jadi pongajar. Kinyo somuo urakng inyo dionji'i komampuan pakai' bulah mujisat.

³⁰ Kinyo somuo urakng inyo dionji'i komampuan pakai' monyamani. Kinyo somuo urakng inyo dionji'i komampuan pakai' bopandir dalapm boko baso roh. Kinyo somuo urakng inyo dionji'i komampuan pakai' monjolasan roti doi' pomandiran dalapm boko baso nantai.

³¹ Apo kaitn gola' kotakng kohonda'an monorima' boko komampuan inyo palikng utamo. Ongko ni'in aku paca'an momadahan ko kaitn mongona'i caro momakai boko komampuan nantai agatn kotakan boi'.