Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

1 Korintus 11 - Porjanjian Boharu Torjomahan Baso Dilakng Soari-ari

1 Jadi, turuticam toladatnku nantai, samo sama'an aku monuruti toladatn Kristus.


Ajaran mongona'i momakai tokulu' huatan korudukng watu sombayakng
( 11:2-16 )

2 Aku momuji kaitn obai kaitn hala moingant aku. Aku pan momuji kaitn obai kaitn hala monuruti boko ajaran inyo komai udah ku sampaian ko kaitn.

3 Apo aku honda' oca' kaitn mongotohu'i ni'in: Kristus bokuaso di pucu' somuo lolaki. Lolaki bokuaso di pucu' botina'. Allah bokuaso di pucu' Kristus.

4 Jadi, watu siku' urakng lolaki bodoa damo monyampaian posatn-pontal doi' Allah, jangan io momakai tokulu'. Aman io molabuhan nantai, boroti io mohayam kopala'nyo siku'.

5 Apo, watu siku' urakng botina' bodoa damo monyampaian posatn-pontal doi' Allah, io gola' momakai koitn korudukng. Aman io co momakai korudukng, nantai samo sama'an rambut inyo digundul, samo sama'an mohayam kopala'nyo.

6 Obai, aman siku' urakng botina' co honda' momakai koitn tungkau kopala', lobih boi' rambutnyo ditota'i ja'. Apo aman botina', monota'i damo mongguntikng rambutnyo nantai sosuatu inyo ngomalu'i. Obai nantai, lobih boi' botina' momakai koitn tungkau kopala'.

7 Obai, Allah bulah lolaki monurut rupo-Nyo huatan monunju'an kobosaran-Nyo molalu'i lolaki. Jadi, lolaki jangan momakai tokulu'. Apo kobosaran lolaki ditunju'an molalu'i botina'.

8 Obai, Allah bulah lolaki kinyo doi' botina'. Apo Allah bulah botina' doi' lolaki.

9 Solaitn nantai, obai, Allah bulah lolaki kinyo pakai' botina'. Apo Allah bulah botina' pakai' lolaki.

10 Obai somuo nantai, botina' gola' momakai koitn tungkau kopala' sobagai tando kuaso. Io pan gola' molabuhan nantai obai boko molekat.

11-12 Biar pan Allah bulah botina' doi' lolaki, jangan jam tongkolupatn botina' inyo molahiran lolaki. Lolaki huatan botina' ongko somuo hal asalnyo doi' Allah. Jadi, dalapm pomandakan Tuhatn, co nyiant botina' aman co nyiant lolaki ongko co nyiant lolaki aman co nyiant botina'.

13 Cubo kaitn pikiran siku' mongona'i hal ni'in: Apobai cucu' pakai' siku' urakng botina' pakai' bodoa ko Allah aman co nyiant koitn korudukng?

14 Somuo urakng udah tohu aman rambut panjakng nantai sosuatu inyo mohilakan oso hormat pakai' lolaki.

15 Apo pakai' botina', rambut panjakng nantai sosuatu inyo dihormati. Obai, Allah moonji'i rambut ko botina' pakai' monungkau'i kopala'nyo.

16 Aman ado urakng inyo honda' bopandir molawatn kobiasa'an ni'in, gola' diingant'an, koi co nyiant kobiasa'an inyo songkayo doi' nantai. Somuo kumpulan urakng pocayo monuruti kobiasa'an nantai.


Ajaran mongona'i Porjamuan Kudus
( 11:17-34 )

17 Dalapm hal ni'in, aku co dapat momuji kaitn. Obai, watu kaitn bokumpul pakai' sombayakng, co nyiant hasil inyo boi'. Malahan sobali'nyo, hasilnyo jahat!

18 Mulo-mulo, aku mondinga' obai watu kaitn bokumpul, kaitn topisah-pisah monjadi boko kolompok inyo salikng botikakng. Aku pocayo sobagi'an borito nantai memang bondar.

19 Memang gola' ado popisahan di antaro kaitn. Alasannyo oca' nononyo paca'an jolas sopo di antaro kaitn inyo tahatn uji.

20 Watu kaitn bokumpul, kaitn kinyo bondar-bondar morayaan Porjamuan Tuhatn.

21 Obai, sotiap urakng salikng mondoholu'i momua'i pomakatnnyo siku'. Ongko, ado boko urakng inyo ija' kolaparan apo inyo bukainyo komabu'an.

22 Padohal kaitn ulih makatn huatan minum di rumah kaitn siku'. Jadi, jangan ngomalu'i huatan mohayam kolompok urakng inyo umputn Allah ongko boko urakng jaro agatn porbuatan sama'an nantai. Kaitn mongohonda'i aku paca'an momuji kaitn obai porbuatan sama'an nantai? Pasti cado!

23 Apo aman kaitn bokumpul, rayaancam Porjamuan Tuhatn agatn caro inyo udah ku sampaian ko kaitn. Tuhatn siku' udah moajaran nantai ko aku. Ia'an: Sobolupm Yesus disorahan ko boko musuh-Nyo, timpu malapm inyo samo nantai Sio bokumpul agatn boko murid-Nyo. Yesus monguti' roti

24 ongko moucap sukur paca'an roti nantai. Sio momingkai'-mingkai' roti nantai huatan bopandir, “Ni'innam bukakng-tubuh-Ku inyo disorahan pakai' kaitn. Labuhancam ni'in pakai' monggonang Aku.”

25 Ubo nian jam lopas jadi makatn, Yesus monguti' cangkir anggur huatan bopandir, “Socangkir anggur ni'inam Porjanjian Boharu inyo Allah pulah huatan disahan agatn darah-Ku. Sotiap kali kaitn mominumnyo, labuhancam ni'in pakai' moingant Aku.”

26 Sobab, sotiap kali kaitn bopua' roti huatan minum anggur dalapm porjamuan ni'in, kaitn momboritoan komatian Tuhatn sampai Sio datakng agi'.

27 Jadi, aman ado urakng inyo bopua' roti huatan minum anggur dalapm acara nantai agatn caro inyo kinyo mohormati Tuhatn, ongko io bodosa tohadap bukakng-tubuh huatan darah Tuhatn.

28 Obai nantai, sotiap urakng gola' boriso'i dirinyo doholu. Lopas nantai, hoyu' io ulih bopua' roti huatan minum anggur nantai.

29 Obai, aman io makatn huatan minum dalapm acara nantai apo kinyo moaku'i bukakng-tubuhTuhatn, io paca'an dihukupm.

30 Nantaiam alasannyo banya' doi' kaitn monjadi lomah huatan sakit. Cukup banya' jam inyo udah bomatian.

31 Apo aman kito boriso'i diri kito doholu, ongko kito co paca'an dihukupm.

32 Apo aman Tuhatn mohukupm kito inyo pocayo ko Sio, boroti Sio mondidik kito oca' kito nononyo kinyo paca'an dihukupm bosamo agatn urakng bukai di dunia ni'in inyo co pocayo.

33 Jadi, boko somadikan, kosimpulannyo, watu kaitn bokumpul pakai' makatn pakai' morayaan Porjamuan Tuhatn, kaitn gola' salikng bontontantian inyo bukai. Jangan mondoholu'i momua'i pomakatnnyo siku'.

34 Aman ado urakng inyo kolaparan, soboi'nyo io makatn doholu di rumahnyo. Labuhan cam somuo nantai oca' aman kaitn bokumpul, kaitn co monyobab'an Allah mohukupm kaitn. Watu aku datakng ko Korintus, aku paca'an mongajar kaitn mongona'i boko hal inyo bukai agi'.

ကြှနျုပျတို့နောကျလိုကျပါ:



ကြော်ငြာတွေ