1 Korintus 10 - Porjanjian Boharu Torjomahan Baso Dilakng Soari-ari

Jangan monyombah boko duato Bolajar doi' dosa urakng Israel joman komai (10:1-13)

¹ Boko somadikan, aku honda' moingant'an kaitn mongona'i angki-bayatn kito urakng Israel. Joman komai, Musa momimpitn sia' koluar doi' hulutn-pacal di tanah Mesir. Allah moirikan somuo sia' agatn tihakng awatn. Ongko, Allah moirikan somuo sia' monyomboraki Lout Mirah.

² Agatn boko mujisat nantai, Allah bulah somuo sia' monjadi pongikut Musa.

³ Watu sia' di padakng pasir, Allah bulah mujisat oca' sia' ado pomakatn. Somuo sia' bopua' pomakatn inyo samo doi' Allah.

⁴ Somuo sia' minum ara'i inyo samo doi' Allah. Ara'i nantai hala mancur doi' batu. Sobondarnyo Kristus ia'an batu nantai obai Sio hala molinduki huatan momborokati sia' urakng Israel nantai.

⁵ Apo sia' totap bodosa tohadap Allah. Jadi, Allah kinyo sonang agatn sobagi'an bosar doi' sia'. Sio mombonasoan kobanya'an doi' sia'. Boko bangkai sia' potukah di padakng pasir.

⁶ Boko kojadian nantai monjadi poumpamoan pakai' kito. Boko kojadian nantai moingant'an kito oca' kito jangan honda' bulah boko hal inyo jahat sama'an sia' urakng Israel joman komai.

⁷ Jangan kaitn monyombah boko duato sama'an boboropo doi' sia'. Musa monulis mongona'i porbuatan sia' nantai di Buku Suci. Ubo ni'in tulisannyo: “Boko urakng nantai makatn, minum ongko bonari pakai' monyombah duato nantai.”

⁸ Solaitn nantai, jangan kaitn bulah dosa bomporajoan sama'an boboropo urakng doi' sia'. Lopas jadi sia' bulah dosa nantai, Allah mohukupm sia' singgatn dalapm soari, ado duo puluh tigo ribu urakng inyo mati.

⁹ Jangan kaitn moncubo'i Kristus, sama'an boboropo doi' sia'. Sia' moncubo'i Kristus sampai Tuhatn mongiripm banya' ular biso pakai' momatu' sia'. Jadi, banya' doi' sia' mati.

¹⁰ Jangan kaitn botuta'-bomamai, sama'an boboropo doi' sia'. Lopas sia' botuta'-bomamai, Allah moutus molekat komatian pakai' mombonasoan sia'.

¹¹ Boko kojadian nantai monjadi contoh pakai' kito. Boko kojadian nantai ditulis pakai' moingant'an kito inyo hidup di ari-ari toahir.

¹² Obai nantai, urakng inyo moanggap dirinyo kuat pocayo gola' boboi'. Jangan sampai io jatu' dalapm dosa.

¹³ Kaitn dicubo'i agatn caro inyo dialapi boko urakng bukai jam. Apo Allah hala sotia. Sio kinyo mombiaran kaitn dicubo'i lobih daripado kokuatan kaitn. Solaitn nantai, watu kaitn dicubo'i, Allah pan paca'an moonji'i jalatn koluar ko kaitn. Oca' kaitn mampu mohadapi coba'an nantai.

Jangan mongobatan diri kaitn agatn boko duato (10:14-22)

¹⁴ Obai somuo nantai, boko somadikan inyo ku kasihi, jangan kaitn monyombah boko duato.

¹⁵ Aku bopandir ko kaitn obai aku tohu kaitn boko urakng pintar-corodi'. Jadi, kaitn siku' ulih momutusan aman pomandiranku ni'in bondar cado.

¹⁶ Watu kito morayaan Porjamuan Tuhatn, kito minum anggur ongko bosukur ko Allah. Nantai monunju'an obai kito bosokutu agatn darah Kristus. Huatan watu kito mombagi-bagian roti pakai' dipua'i sosamo, nantai monunju'an obai kito bosokutu agatn bukakng-tubuh Kristus.

¹⁷ Kito ado banya' urakngnyo, apo samo-samo bopua' doi' sobuti' roti mo. Rotinyo, kito bosatu samo sama'an sobuti' bukakng-tubuh.

¹⁸ Porotian jam caro urakng Israel monyombah Allah. Sia' mombaba' boko bonatakng pakai' diposombahan di pucu' meja tompat monyorahan posombahan ko Allah di tongahlamanan Rumah Allah. Timpu sia' bopua' dagikng boko bonatakng nantai, rotinyo sia' pan tuyut monyombah Allah.

¹⁹ La'apo masudku inyo sobondarnyo? Aku co bomasud aman boko duato bondar-bondar hidup. Aku pan co bomasud aman dagikng inyo diposombahan ko boko duato nantai kinyo lobih boroti daripado dagikng biaso.

²⁰ Apo masudku ubo ni'in: posombahan ko boko duato sobondarnyo posombahan ko boko roh jahat, bukainyo ko Allah. Aku co honda' aman kaitn bosokutu agatn boko roh jahat!

²¹ Kaitn co ulih minum anggur doi' cangkir Tuhatn, sokaligus jam doi' cangkir roh jahat. Kaitn co ulih makatn doi' meja Tuhatn, sokaligus jam doi' meja roh jahat.

²² Jangan bulah Tuhatn mongomburu! Ingant cam, kito co lobih kuat doi' Tuhatn.

Labuhancam somuo porbuatan boi' oca' Allah dihormati (10:23–11:1)

²³ Ado boko urakng bopikir, “Somuonyo ulih pakai' kito.” Pikiran nantai kinyo salah. Memang bondar kito hidup bebas. Apo kinyo somuo porbuatan boguno. Kinyo somuo porbuatan bulah urakng bukai monjadi lobih kuat socaro rohani.

²⁴ Jadi, watu kaitn molabuhan sosuatu, pikiran cam mongona'i inyo boi' pakai' urakng bukai, daripado inyo toboi' pakai' diri kaitn siku'.

^25-26 Dalapm Buku Suci ado totulis: “Tuhatn mo inyo umputn bumi huatan somuo isinyo.” Obai nantai, kaitn ulih bopua' dagikng la'apo pan inyo dijual di pasar. Padohan botakutn aman dagikng nantai boasal doi' bonatakng inyo diposombahan ko boko duato. Hati kaitn kinyo pontikng mooso bosalah aman bopua' dagikng nantai.

²⁷ Sama'an nantai jam, aman ado urakng inyo bolupm pocayo mohundakng kaitn makatn di rumahnyo. Aman kaitn honda' tuyut, ulih mo. Kaitn ulih bopua' la'apo ja' inyo tongahan ko kaitn. Padohan botakutn aman ado di antaro pomakatn nantai inyo diposombahan ko boko duato. Hati kaitn kinyo pontikng mooso bosalah aman bopua' pomakatn nantai.

²⁸ Apo aman ado urakng bukai inyo momadahan ko kaitn, “Pomakatn ni'in udah diposombahan ko boko duato.” Jangan am dipua'i pomakatn nantai biar pan kolai kinyo bosalah aman momua'inyo. Obai kolai gola' borotian kopontikan urakng nantai huatan saro hati kocit.

²⁹ Kohonda'ku cado saro hati kocit kolai, apo saro hati kocit urakng nantai. Mongkitn ado doi' kaitn inyo botakutn, “Hibo kobebasaku gola' dibatasi ulih saro hati kocit urakng bukai?

³⁰ Aman Aku bopua' pomakatn nantai agatn oso bosukur ko Allah, hibo urakng bukai monyalahan aku obai aku bopua' pomakatn nantai?”

³¹ Apo aku momandiran ni'in: Aman kaitn makatn, damo minum, damo molabuhan la'apo pan, labuhancam somuonyo oca' urakng bukai momuji Allah.

³² Jangan molabuhan sosuatu inyo monyinggukng hati urakng bukai, boi' nantai urakng Yahudi, sama'an nian jam urakng Yunani huatan boko urakng dalapm kolompok urakng inyo pocayo ko Yesus.

³³ Pulahcam samo sama'an inyo ku pulah. Aku hala bousaha oca' somuo porbuatanku kinyo bulah sopo pan tosinggukng. Aku hala moutamoan inyo toboi' pakai' urakng banya', daripado inyo toboi' pakai' diriku siku'. Aku molabuhan somuo nantai oca' sia' ulih disolamant'an.