1 Korintus 1 - Porjanjian Boharu Torjomahan Baso Dilakng Soari-ari

Salapm doi' Paulus

^1-2 Surat ni'in ko jomaat Allah di Korintus. Kaitn monjadi borosih socaro rohani molalu'i Kristus Yesus. Allah momilih kaitn pakai' monjadi umant inyo husus pakai' umputn Sio. Kaitn monjadi umant Allah bosamo somuo urakng di mono aja' inyo pocayo ko Tuhatn kito, Yesus Kristus. Sio ia'an Tuhatn inyo bokuaso atas sia' huatan Tuhatn inyo bokuaso atas kito. Surat ni'in doi' aku, Paulus. Aku ditingkau pakai' monjadi rasul Kristus Yesus obai nantai kohonda' Allah. Salapm jam doi' Sostenes, somadikan soiman kito.

³ Kasih karunia ongko sonang-asau doi' Allah, Bopai kito, huatan doi' Tuhatn Yesus Kristus monyoroto'i kolai.

Paulus bosukur obai Allah monunju'an koboi'an-Nyo ko urakng inyo pocayo di Korintus

⁴ Aku hala bosukur ko Allahku obai kaitn. Aku bosukur obai Allah udah monunju'an koboi'an ko kaitn molalu'i Kristus Yesus.

⁵ Masudku, obai kaitn di dalapm Sio, jadi Sio momborokati kaitn dalapm somuo hal. Ia'an, kaitn monjadi mongkitn mampu mongoroti somuo macapm pongotohuan. Kaitn jam monjadi mongkitn mampu momandiran somuo hal nantai ko urakng bukai.

⁶ Somuo nantai tojadi obai pomandiran inyo diboritoan ko kaitn mongona'i Kristus bondar-bondar mansu' ko dalapm hati kaitn.

⁷ Jadi, kaitn co nyiant kokurakan la'apo pan dalapm komampuan husus inyo dionju' Roh Allah. Somontaro kaitn monantian kodatakan Yesus Kristus, Tuhatn kito. Somuo urakng paca'an moniant Sio.

⁸ Sio jam paca'an monguat'an hati kaitn sampai pado ahir joman. Sio paca'an molabuhan nantai oca' kaitn kinyo dianggap salah timpu Yesus Kristus, Tuhatn inyo bokuaso atas kito datakng bobali'.

⁹ Allah hala sotia momonuhi janji-Nyo. Sio inyo udah moningkau kaitn pakai' bosokutu agatn Ana'-Nyo, ia'an Yesus Kristus, Tuhatn inyo bokuaso atas kito.

Posolisihan dalapm jomaat Korintus

¹⁰ Boko somadikan, agatn kuaso Tuhatn kito, Yesus Kristus, aku monosihat'i oca' kaitn bosatu hati. Jangan kaitn bosongkayo monjadi bomacapm kolompok. Apo kohonda'nyo kaitn somombondarannyo bosatu dalapm porasa'an huatan pikiran kaitn.

¹¹ Boko somadikanku, aku bopandir ubo nian obai ado boko urakng doi' koluarga Kloe inyo momadahan ko aku mongona'i kaitn. Sia' momadahan obai kaitn hala botikakng.

¹² Masudku, ado di antaro kaitn inyo bopandir, “Aku urakng doi' kolompok Paulus.” Ado inyo bukai bopandir, “Aku urakng doi' kolompok Apolos.” Damo “Aku urakng doi' kolompok Petrus.” Ado inyo bukai agi' inyo bopandir, “Aku urakng doi' kolompok Kristus.”

¹³ Jangan ubo nian. Co mungkitn Kristus tobagi-bagi! Aku, Paulus samo sokali co mati di kayu salib pakai' kaitn! Kaitn pan samo sokali kinyo dibaptis dalapm damoku!

¹⁴ Aku bosukur aku co mombaptis siku' urakng pan di antaro kaitn kocuali Krispus ongko Gayus.

¹⁵ Jadi ni'inan, co nyiant inyo ulih momandiran obai kaitn dibaptis dalapm damoku.

¹⁶ Ih, aku hoyu' ingant, aku mombaptis koluarga Stefanus jam. Apo solaitn sia' aku co ingant am aman ado urakng bukai agi' di antaro kaitn inyo aku baptis.

¹⁷ Kristus co moutus aku pakai' mombaptis urakng. Apo, Kristus moutus aku pakai' momboritoan Kabar Boi'. Timpu aku momboritoan Kabar Boi', aku co momakai kopandaian bopandir bodasaran akal monsio. Agatn sama'an nian, kuaso doi' komatian Kristus di kayu salib kinyo sia-sia.

Komatian Yesus moniant'an kopintar-corodi'an huatan kuaso Allah

¹⁸ Ado boko urakng inyo paca'an bonaso. Sia' bopikir obai borito mongona'i Kristus mati di kayu salib nantai sosuatu inyo co nyiant rotinyo. Apo pakai' kito inyo disolamant'an, kabar mongona'i Kristus mati di kayu salib monunju'an kuaso Allah.

¹⁹ Obai, ado pomandiran Allah dalapm Buku Suci inyo totulis, “Aku paca'an mombonasoan pintar-corodi' inyo ado pado boko urakng inyo pandai monurut monsio. Aku paca'an mongacauan pongorotian boko urakng pandai.”

²⁰ Jadi, boko urakng inyo pandai sobondarnyo sia' kinyo ado kopintar-corodi'annyo. Boko guru inyo mongajar Hukupm Torat, sobondarnyo pan sia' kinyo ado kopintar-corodi'annyo. Huatan jam, boko urakng inyo monjadi boko guru pongotohuan, sobondarnyo sia' kinyo ado kopintar-corodi'annyo. Obai Allah udah mombulah kopintar-corodi'an monsio monjadi budu.

²¹ Allah bulah koputusan ni'in sosuai agatn kopintar-corodi'an-Nyo. Ia'an, Sio mombulah oca' monsio kinyo ulih mongonal Sio molalu'i kopintar-corodi'an monsio. Jadi, agatn sonang hati Allah monyolamant'an urakng inyo pocayo agatn momakai caro inyo dianggap budu, ia'an pomboritoan kabar boi'.

²² Banya' urakng Yahudi bayo honda' moniant mujisat. Banya' urakng Yunani bayo bogoyap kopintar-corodi'an monsio.

²³ Apo koi momboritoan obai Kristus, Rajo Inyo Dijanjian Allah mati di kayu salib. Hal nantai bulah boko urakng Yahudi tosinggukng, huatan boko urakng inyo kinyo Yahudi moanggap hal nantai kinyo ado rotinyo.

²⁴ Apo pakai' boko urakng Yahudi huatan inyo kinyo urakng Yahudi inyo udah Allah pilih, Kristus monunju'an kuaso Allah huatan kopintar-corodi'an Allah.

²⁵ Obai, hajat Allah inyo kotiat'annyo kinyo ado rotinyo, sobondarnyo lobih pintar-corodi' doi' kopintar-corodi'an monsio. Porbuatan Allah inyo kotiat'annyo lomah, sobondarnyo lobih kuat doi' kokuatan monsio.

Co nyiant urakng inyo ulih buhau

²⁶ Boko somadikan, pikirancam mongona'i koadaan kaitn timpu kaitn ditingkau pakai' monjadi urakng pocayo. Kinyo banya' doi' antaro kaitn inyo dianggap urakng pandai monurut monsio. Kinyo banya' doi' antaro kaitn inyo dianggap urakng bopongaruh. Kinyo banya' doi' antaro kaitn inyo dianggap urakng pontikng.

²⁷ Apo Allah totap momilih inyo dianggap budu monurut monsio. Sio molabuhan nantai pakai' bulah boko urakng pandai monjadi malu. Sio momilih inyo dianggap lomah pakai' bulah boko urakng bopongaruh monjadi malu.

²⁸ Sio momilih urakng inyo dianggap kinyo pontikng, inyo dianggap kocit, huatan inyo dianggap kinyo boroti monurut monsio. Sio molabuhan nantai pakai' bulah boko hal inyo dirogo'i monsio monjadi kinyo borogo.

²⁹ Tujuan Sio oca' urakng kinyo ulih buhau dihadapan Allah.

³⁰ Jadi, kaitn ado hubukan dokat agatn Kristus Yesus obai porbuatan Allah, bukainyo obai porbuatan kaitn. Yesus monjadi kopintar-corodi'an Allah bagi kito. Molalu'i Yesus, kito monjadi bondar di hadapan Allah. Kito pan monjadi umant husus pakai' umputn Sio. Sio monanggukng hukupan dosa kito pakai' monobus kito.

³¹ Obai nantai, kito gola' molabuhan la'apo inyo totulis dalapm Buku Suci: “Aman ado urakng inyo bopangkakng, sobondarnyo io gola' bopangkakng mongona'i la'apo inyo dilabuhan Tuhatn.”